စအိုင်ခန့် (နှင်းခဲမြေ)
ရွာနီးချုပ်ကမိတ်ဆွေဆီအလည်သွားတာပါလို့
အမေ့ကို မညာဖူးတဲ့ကျနော်
ရွာကနေထွက်လာခဲ့တာ
စစ်သင်တင်းတက်ပြီးခါမှ
သား စစ်ထဲဝင်သွားမှန်းသိခဲ့ရတဲ့အမေ။
ဆင်းရဲဒုက္ခမျိုးစုံတွေနဲ့
ကြမ်းတမ်းတဲ့တော်လှန်ရေးရဲ့လောကဓံကို
ရင်ဆိုင်ရမယ့်သားကို
ကြိုသိနေတဲ့အမေမျက်ဝန်းမှာ
ဆို့နင့်သောက မျက်ရည်စတွေ
ဟန်ဆောင်အပြုံးကြားက ကျခဲ့ပေမယ့်လည်း
သားလုပ်ရပ်ကိုဘာတစ်ခုမှ
အပြစ်မြင်မတားဆီးခဲ့တဲ့အမေ။
မိတ္ဆာတွေရမ်းကားမင်းမူတဲ့ အမေတို့ရွာ
ပိုးစုန်းကြူးလေးတွေကွန့်မြူးတဲ့
လယ်တောစပ် မဟူရာညအမှောင်ထဲက
အမေ့ရဲ့လယ်တဲလေးမှာ
အမေ့ဆီတိတ်တခိုးလေးရောက်လာတဲ့ကျနော့်ကို
သွားလေရာလာလေရာ
အမြဲသတိရှိပါဘုရားတရားမမေ့နဲ့လု့ိုု့့
ကွမ်းသံဗလုံးထွေးနဲ့ပြောခဲ့တဲ့အမေ။
စစ်မြေပြင်မှာဘေးမတွေ့ရအောင်
အသုဘတွေဆီကရတဲ့ပိတ်ဖြူစကို
ရွာဦးကျောင်းက ဆရာတော်ဆီမှာ
အပြေးအလွှားသွားယူလာကာ
ခြေဖဝါးနှစ်ဖက်ကိုဆီနဲ့လိမ်းအိုးမဲနဲ့သုတ်
ပိတ်ဖြူပေါ်မှာခြေရာထင်ကျန်အောင်ပြုလျှက်
အန္တရာယ်ကင်းအဆောင်အဖွဲ ့အဖြစ်
သားကိုဆောင်စေခဲ့တဲ့အမေ။
အနန္တဂိုဏ်းဝင်တဲ့ဂရုနာရှင်
အမေ့ခြေရာတော်အဆောင်အဖွဲ ့အါးကိုးနဲ့
စစ်တိုက်ခဲ့တဲ့အမေ့ရဲ့သားလေး
အောင်ပွဲအလီလီနှစ်တွေလည်းအလီလီ
ကြာညောင်းခဲ့ပြီးအမေရယ်။
သားတို့ရဲ့အမျိုးသားတော်လှန်ရေး
အနှစ်ခြောက်ဆယ်ကျော်
ကာလအစိတ်အပိုင်းတစ်ခုထဲမှာ
အမေရဲ့ဩဝါဒအမေရဲ့ခြေရာတွေနဲ့
သားရဲ့ဘဝအစိတ်အပိုင်းတစ်ခုကို
သားပြည်သူအတွက်ပေးဆပ်ခွင့်ရတာ
အတိုင်းအတာတစ်ခုအထိ
သားကျေနပ်ပါတယ်အမေရယ်။
သားရဲ့လွတ်မြောက်ခြင်းတိုက်ပွဲရဲ့အောင်ပွဲတိုင်းဟာ
သားတို့ပြည်သူတွေကျရောက်နေတဲ့
စစ်မိတ္ဆာစနှစ်ဆိုးရဲ့လောင်းရိပ်အောက်က
ငရဲခန်းရဲ့တံခါးတွေကိုရိုက်ချိုးခဲ့တာပါအမေရယ်။
အဲဒီတိုက်ပွဲရဲ့အောင်ပွဲတွေကို
အမေရဲ့ခြေရာကဖြစ်စေခဲ့တဲ့
မဟာခွန်အားသတ္တိတွေနဲ့
သားတိုက်ခဲ့တာပါအမေရယ်။
ဒီအချိန်မှာ အမေ့ခြေရာတော်ဟာ
ဘယ်လောက်တန်းဘိုးရှိလဲလို့
တစ်စုံတစ်ဦးကမေးလာခဲ့ရင်အမေရယ်
ဂျပန်ပြည်ကို အလည်သွားခဲ့တဲ့
ကမ္ဘာကျော်မင်းသမီး လေဒီကာကာရဲ့
လက်ဖက်ရည်ကြမ်းပန်းကန်လုံးပေါ်က
ဒေါ်လာခုနှစ်သောင်းတန် နှုတ်ခမ်းတော်ရာထက်
အမေ့ခြေရာတွေက သားဘဝနဲ့ သားပြည်သူတွေအတွက်
တန်ဘိုးကြီးမြတ်ပါတယ်အမေရယ်။
စအိုင်ခန့် (နှင်းခဲမြေ)
May 13 2012 နေ့တွင်ကျရောက်သော အမေများနေ့သို့ ဂုဏ်ပြုအပ်ပါသည်
