ဩဂုတ် (၁၀) ရက်၊ ၂၀၂၆ ခုနှစ်။ ကေအိုင်စီ
ပဋိပက္ခဒေသများတွင်ပိုမိုအားထားနေရသော ဌာနေတိုင်းရင်းသား သားဖွားဆရာမ(ရိုးရာလက်သည်) များကို ကာကွယ်ပေးရန်လိုအပ်ကြောင်း ဩဂုတ်လ(၉)ရက်နေ့တွင် ကျရောက်သည့်အပြည်ပြည်ဆိုင်ရာ ကမ္ဘာ့ဌာနေတိုင်းရင်းသားများနေ့တွင် သံလွင်ငြိမ်းချမ်းရေးဥယျာဉ်ကော်မတီနှင့် ကရင်အမျိုးသမီးအစည်းအရုံး-KWO တို့က တိုက်တွန်းတောင်းဆိုသည်။
၂၀၂၆ ခုနှစ် အပြည်ပြည်ဆိုင်ရာ ကမ္ဘာ့ဌာနေတိုင်းရင်းသားများနေ့၊ ဆောင်ပုဒ်တွင် ဌာနေတိုင်းရင်းသား သားဖွားဆရာမများအား ဂုဏ်ပြုခြင်း၊ အသက်ဇီဝနှင့်ကျန်းမာသုခများကို ကာကွယ်စောင့်ရှောက်စို့ဟု သတ်မှတ်ထုတ်ပြန်ထားခြင်းဖြစ်သည်။
လက်ရှိဒေသတွင်းအခြေအနေသည် ထိုဆောင်ပုဒ်နှင့်ကိုက်ညီနေသည့်အတွက် တောင်းဆိုရခြင်းဖြစ်ကြောင်း သံလွင်ငြိမ်းချမ်းရေးဥယျာဉ်ကော်မတီဥက္ကဌ စောပေါလ်စိန်ထွားက ပြောသည်။
“ရပ်ရွာ ဒေသမှာ ဆေးရုံ၊ ဆေးခန်းမရှိတဲ့အချိန် ဒီလက်သည်တွေကပဲ မိခင်တွေ ကိုယ်ဝန်ဆောင်ချိန်ကစပြီး ကလေးမွေးပြီးတဲ့အထိ တာဝန်ယူကြည့်ပေးရတာ။ အခက်အခဲတွေကြားက သူတို့က လုပ်ဆောင်ပေးနေရတာ။ သူတို့ဟာ ရှေ့တန်းမှာ လိုအပ်ချက်တွေကို တာဝန်ယူထားတာဖြစ်တယ်။ သူတို့ရဲ့တာဝန်က အရမ်းကြီးတယ်။ ဒါကို အသိမှတ်ပြုသင့်တာအမှန်ပဲ” ဟု စောပေါလ်စိန်ထွားက ပြောသည်။
သံလွင်ငြိမ်းချမ်းရေးဥယျာဉ်ကော်မတီအနေဖြင့် ကမ္ဘာ့ဌာနေတိုင်းရင်းသားများနေ့ ထုတ်ပြန်ချက်တွင် ၎င်းတို့ ဥယျာဉ်အတွင်းရှိ ဌာနေတိုင်းရင်းသားများအတွက် အချက်(၅)ချက်ကို တောင်းဆိုထားခြင်းဖြစ်သည်။
ယင်းတွင် ဌာနေတိုင်းရင်းသား သားဖွားဆရာမများကိုအသိမှတ်ပြုရန်၊ ၎င်းတို့လိုအပ်သည့် ထောက်ပံ့ပစ္စည်းများကိုထောက်ပံ့ရန်နှင့် အရေးပေါ် လွှဲပြောင်းကုသရေးများကိုဖြည့်ဆည်းကာကွယ်ပေးရန်တို့ ပါဝင်သည်။
သံလွင်ငြိမ်းချမ်းရေးဥယျာဉ်သည် “ဒေပေါ်ထူး(ချက်ကြိုးတော)”ကို ဆောင်ပုဒ်အဖြစ်ထားရှိသလို ကရင်ရိုးရာဓလေ့များကို လေးစားတန်ဖိုးထား၍ ဌာနေသားဖွားဆရာမများကို သင်တန်းဆင်းဆရာမများနှင့်တန်းတူဆက်ဆံ ပူးပေါင်းဆောင်ရွက်ရန်၊ တောတောင်နှင့်ဆေးဖက်ဝင်အပင်များကို ကာကွယ်ရန်နှင့် မျိုးဆက်သစ်လူငယ်များထံ လက်ဆင့်ကမ်းပေးရန်လည်း တိုက်တွန်းတောင်းဆိုထားသည်။
ထို့အတူ လက်ရှိ တိုက်ပွဲကာလတွင် တောတောင်ထဲ ထွက်ပြေးတိမ်းရှောင်နေရသည့် မိခင်များမှာ ရိုးရာလက်သည် သားဖွားဆရာမများကိုသာ အမှီပြုနေရသည့်အတွက် ၎င်းတို့ကို ဂုဏ်ပြုဖို့ ထိုက်တန်ကြောင်း KWO ဥက္ကဌ နော်ကညောဖောက ဆိုသည်။
နော်ကညောဖောက “ဒီသားဖွားဆရာမတွေမှာ အခကြေးငွေဆိုတာမရှိဘူး ကူညီဖို့အတွက်သက်သက်ပဲ။ သူတို့တွေဟာ အတန်းပညာနဲ့သင်ထားတာမဟုတ်ဘူး ဘိုးဘွားစဉ်ဆက် အဆင့်ဆင့်လက်ဆင့်ကမ်းပြီး ရလာတဲ့ပညာဖြစ်တယ်။ ဒါကိုလေးစားတန်ဖိုးထားရမယ်” ဟု ကေအိုင်စီကို ပြောသည်။
ကော်သူးလေဒေသတွင် ဌာနေသားဖွားဆရာမများဖြစ်သည့် လက်သည်အများအပြားကျန်ရှိနေသေးပြီး KWO အနေဖြင့် ၎င်းတို့ကို ကူညီထောက်ပံ့ပေးခြင်းများရှိခဲ့သည်ဟုလည်း နော်ကညောဖောကဖြည့်စွက်ပြောသည်။ ထို့အတူ ကရင်ကျန်းမာရေးနှင့်ကယ်ဆယ်ရေးဌာန-KDHW ကလည်း ရိုးရာလက်သည်များအား ထောက်ပံ့ကူညီနေခြင်းရှိသည်။
ဩဂုတ်လ (၆)ရက်နေ့က စစ်ခေါင်းဆောင် မင်းအောင်လှိုင်အား ထိုင်းနိုင်ငံက တရားဝင် လက်ခံတွေ့ဆုံချိန်တွင် သံလွင်ငြိမ်းချမ်းရေးဥယျာဉ်ထဲရှိ ကျေးရွာတစ်ရွာသို့ လေယာဉ်ဗုံးကြဲတိုက်ခိုက်မှုဖြစ်ပွားခဲ့ရာ လူထိခိုက်သေဆုံးမှုနှင့် လူနေအိမ်၊ ဘုန်းကြီးကျောင်းအဆောက်အအုံများ ပျက်စီးမှုရှိခဲ့ကြောင်းလည်း ယမန်နေ့က ထုတ်ပြန်ချက်တွင် တဆက်တည်းတွေ့ရသည်။
ယင်းကြောင့် ဌာနေတိုင်းရင်းသားများသည် လေးလံသော နှလုံးသားများနှင့် လူနေမှုဘဝကို ဖြတ်သန်းနေကြရကြောင်းလည်း သံလွင်ငြိမ်းချမ်းရေးဥယျာဉ်ကော်မတီက ထည့်သွင်းပြောဆိုသည်။
