ဖေဖော်ဝါရီ ၁၄ ရက်၊ ၂၀၂၄ခုနှစ်။ ကေအိုင်စီ
မွန်ပြည်နယ်၊ ရေး-မော်လမြိုင် ကားလမ်းတစ်လျှောက်ကို လက်ရှိတွင် တော်လှန်ရေးပူးပေါင်းတပ်ဖွဲ့များ ထိန်းချုပ်ထားပြီဖြစ်ကြောင်း ဒေသခံပြည်သူများ၏ ပြောပြချက်အရ သိရသည်။
အဆိုပါ ရေး-မော်လမြိုင်ကားလမ်းဘေး နေထိုင်သူ ဒေသခံတစ်ဦးက “ တော်လှန်ရေးတပ်ဖွဲ့တွေ ၇၀ ရာခိုင်နှုန်းထိန်းချုပ်နိုင်ပြီး ပြောရမယ်။ တပ်စခန်းတွင်းမှာတော့ စစ်ကောင်စီတပ်ဖွဲ့အချို့ရှိသေးတယ်။ လမ်းမှာတော့ တော်လှန်ရေးတပ်ဖွဲ့တွေပဲ အမြဲရှိတယ်။ သွားလာတဲ့ပြည်သူ တွေ အေးအေးဆေးဆေးပါပဲ”ဟု ကေအိုင်စီသို့ ယနေ့တွင် ပြောသည်။
အဆိုပါ ကားလမ်းမတစ်လျှောက်တွင် ကျန်ရှိနေသေးသော စစ်ကောင်စီတပ်အနေဖြင့် ခံစစ်အနေ အထားမှ ခွာစစ်အနေအထားသို့ ရောက်ရှိနေပြီဖြစ်ကြောင်းလည်း ဒေါနစစ်ကြောင်းမှူးစောဒါးကိုက ကေအိုင်စီသို့ ပြောသည်။
“တိုက်ပွဲက ၂၀၂၃ခုနှစ်၊ ၉လပိုင်း ၁၀ လပိုင်းကနေ ၂၀၂၄ ခုနှစ်အထိ အရှိန်တဖြည်း ဖြည်းမြင့်လာတယ်။ စစ်ကောင်စီတပ်က ခံစစ်ထက်၊ ခွာစစ်ကို အားပြုလာတယ်။ တစ်ချို့အင်အားနည်းတဲ့စခန်းတွေ၊ တပ်ရင်း တွေဆို တခြားနေရာနဲ့သွားပေါင်းနေရတယ်။ စခန်းသေးအချို့လည်း ရုပ်လိုက်ပြီး”ဟု စစ်ကြောင်းမှူး စောဒါးကိုက ပြောသည်။
ရေး-မော်လမြိုင်လမ်းကို တော်လှန်ရေးပူးပေါင်းတပ်မှ ထိန်းချုပ်ထားသည့်အပြင် ကျန်ရှိနေသေးသည့် စစ်ကောင်စီတပ်စခန်းအချို့ကိုလည်း တော်လှန်ရေးတပ်ဖွဲ့များ၏ မကြာခဏသွားရောက် ပစ်ခတ်လေ့ရှိသည့်အတွက် စခန်းရှိ စစ်ကောင်စီတပ်ဖွဲ့ဝင်များမှာ စခန်းပြင် ထွက်မရဲကြကြောင်း ဒေသခံများက ပြောသည်။
