မေလ ၂၄ ရက်၊ ၂၀၂၆ ခုနှစ်။ ကေအိုင်စီ
၁၇ ကြိမ်မြောက် ပြည်သူ့ဂုဏ်ရည်ဆုပေးပွဲ အခမ်းအနားကို ထိုင်းနိုင်ငံမြောက်ပိုင်း၊ ချင်းမိုင်မြို့ရှိ ဘွဲ့နှင်းသဘင်ခန်းမ၌ ယမန်နေ့ (မေလ ၂၃ ရက်) က ကျင်းပခဲ့သည်။
အဆိုပါ အခမ်းအနားသို့ ပြည်သူ့ဂုဏ်ရည်အသင်း (နိုင်ငံတကာ) ဌာနခွဲအသီးသီးမှ တာဝန်ရှိသူများနှင့်အတူ နိုင်ငံရေးအင်အားစုများ တက်ရောက်ခဲ့ကြသည်။
ထိုင်းနိုင်ငံ၊ ပြည်သူ့ဂုဏ်ရည် (ချင်းမိုင်ဌာနခွဲ) က လက်ခံကျင်းပသည့် ယခု ၁၇ ကြိမ်မြောက် အခမ်းအနားတွင် ၂၀၂၆ ခုနှစ်အတွက် “ပြည်သူ့ဂုဏ်ရည်ဆု” ကို ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်အား ရွေးချယ်ချီးမြှင့်ပေးအပ်ခဲ့သည်။
ပြည်သူ့ဂုဏ်ရည်ဆုကို မြန်မာနိုင်ငံအတွင်း ကိုယ်ကျိုးစွန့် အနစ်နာခံကာ လူမှုရေး၊ ပညာရေး၊ နိုင်ငံရေးနှင့် ပရဟိတလုပ်ငန်းများကို စွမ်းစွမ်းတမံ ဆောင်ရွက်နေကြသည့် လူပုဂ္ဂိုလ်များနှင့် အဖွဲ့အစည်းများကို ရွေးချယ်၍ နှစ်စဉ် ချီးမြှင့်ပေးနေခြင်း ဖြစ်သည်။
