ဖေဖော်ဝါရီလ ၂၇ ရက်၊၂၀၂၃ ခုနှစ်။ ကေအိုင်စီ
ကရင်ပြည်နယ် ဖားအံမြို့တွင် မကြာသေးခင်က ဖွင့်လှစ်လိုက်သည့် မြို့ရှောင်လမ်း မကြီးသစ်တွင် ယခုတလော ယာဉ်တိမ်းမှောက်မှု များပြားလာသည်ဟု အနီးအနားရှိ မြို့ခံများက ပြောသည်။
ပြီးခဲ့သည့် ဖေဖော်ဝါရီလ(၁၁)ရက်နေ့ (၇၆)နှစ်မြောက် ပြည်ထောင်စုနေ့ကို ဂုဏ်ပြုခြင်း အနေဖြင့် ဖားအံမြို့ရှောင်လမ်းနှင့် ဖားအံမြို့အဝင် ရတနာဆင်ဖြူတော် ၄ စီး နှင့် ရွှေဖား စည်အဝိုင်းဖွင့်လှစ်ပွဲကို ပြည်နယ်ကောင်စီ ဥက္ကဋ္ဌစောမြင့်ဦးက တက်ရောက်ဖွင့် လှစ်ခဲ့ခြင်းဖြစ်သည်။
“လမ်းက ၄ ဂွဆိုတော့ ဘယ်ဘက်ခြမ်းက ဘာလာလဲဆိုတာမမြင်ရဘူး။ ကားသမားတွေက ဇွတ်မောင်းနေကြတယ်။ မြို့အဝိုင်းကနေ ကမော့ကစင် ရွာအထိ ဖောက်ထားတဲ့လမ်းပေါ့။ ၁၃ ရက်နေ့ကတစ်စီးမှောက်တယ်။ ၁၆ ရက်နေ့မှာလည်း တစ်စီးမှောက်တယ်။ မှောက်တာ အားလုံးပေါင်း ၄ စီးလောက်ရှိနေပြီး။ လမ်းက ခဲကြမ်းတွေခင်းထားတော့ မှောက်တာပေါ့။”ဟု ပြောသည်။
ထို့အပြင် အမြို့မြို့အနယ်နယ်မှ ဝင်လာသည့် ကုန်ကားများနှင့် Express ကားများကိုလည်း နောက်ပိုင်းတွင် ဖားအံမြို့အတွင်းမှ မမောင်းခိုင်းတော့ဘဲ အဝိုင်းပတ်သည့်နေရာမှ မြို့ပြင်နေရာများသို့ သွားလာခွင့်ပြုတော့မည်ဟု မြို့ခံများက ပြောသည်။
