ဒီဇင်ဘာ ၂၄ရက်၊ ၂၀၂ဝ ပြည့်နှစ်။ နေနော်
ထိုင်းနိုင်ငံအတွင်း တကျော့ပြန် ကိုဗစ်ဂယက်ကြောင့် ထိုင်းတပ်မတော် အမှတ်(၃) အရှေ့ တိုင်းမှူး ဒုတိယဗိုလ်ချုပ်ကြီး အဖိချေ့ဆုစပ်မှ ယနေ့ (ဒီဇင်ဘာ ၂၄ ရက်)နံနက်ပိုင်းက ထိုင်း-မြန်မာ နယ်စပ် မြဝတီ-မဲဆောက် သောင်ရင်းမြစ်ကမ်းတလျှောက် စစ်ဆေးမှုများပြုလုပ်ခဲ့ပြီးနောက် လုံခြုံရေးတိုးမြှင့် ဆောင်ရွက်လျက်ရှိကြောင်း သိရသည်။
ပြီးခဲ့သည့် ရက်ပိုင်းမှစ၍ မြန်မာအလုပ်သမား အများစုနေထိုင်ရာ ထိုင်းနိုင်ငံ စမွတ်ဆာခွန်ခရိုင် မဟာချိုင်နယ်မြေအတွင်း Covid-19 ပိုးတွေ့လူနာ ၁,၀၀ဝ ကျော် တွေ့ရှိခဲ့ပြီးနောက် ယခုလို ထိုင်း-မြန်မာနယ်စပ်တွင် နှစ်နိုင်ငံ တရားမဝင်နယ်စပ် ဖြတ်ကျော်ခြင်းများ မပြုလုပ်နိုင်ရေးအတွက် ယနေ့ နံနက်ပိုင်းက ထိုင်းတပ်မတော်မှ အမှတ် (၃) အရှေ့တိုင်းမှူး ဒုတိယဗိုလ်ချုပ်ကြီး အဖိချေ့ဆုစပ် ကိုယ်တိုင်လာရောက်စစ်ဆေးပြီး လုံခြုံတိုးမြှင့်ဆောင်ရွက်ရန် ညွှန်ကြားခဲ့ခြင်းဖြစ်သည်။
ထိုသို့ ဒုတိယဗိုလ်ချုပ်ကြီး အဖိချေ့ဆုစပ်၏ ညွှန်ကြားမှုအရ ထိုင်းဘက်ခြမ်း သောင် ရင်းမြစ် ကမ်းတလျှောက်မှာ သံဆူးကြိုးများ ကာရံခြင်း ၊ CCTV ကင်မရာများ တပ်ဆင်ခြင်း၊ ဒေသတာဝန်ရှိ ဌာနဆိုင်ရာများပါဝင်သော ပူးပေါင်းအဖွဲ့မှ စောင့်ကြည့်ခြင်းစသည်ဖြင့် လုံခြုံရေးတိုးမြှင့်ဆောင်ရွက်ထား သည်ဟု ထိုင်းဘက်ခြမ်းက သိရသည်။
၎င်းအပြင် နေရပ်ပြန် ထိုင်းရောက်မြန်မာလုပ်သားများအပေါ် မြန်မာနိုင်ငံအစိုးရဘက်က ထိုင်း-မြန်မာ မြဝတီ-မဲဆောက် အမှတ် ၂ တံတား မှတဆင့် ကြိုဆိုလက်ခံခြင်းများ ပြုလုပ်ပေးနေသလို မြန်မာနိုင်ငံ တွင် အကြောင်းအမျိုးမျိုးဖြင့် ရောက်ရှိနေသည့် ထိုင်းနိုင်ငံသားများကိုလည်း အလားတူ လက်ခံကြိုဆို သွားမည်ဟု ထိုင်းဘက်ခြမ်းက ပြောသည်။
ထိုကဲ့သို့ ထိုင်းဘက်ခြမ်းက ယခုရက်ပိုင်းအတွင်း သောင်ရင်းမြစ်ကမ်းတလျှောက် လုံခြုံရေး တိုးမြှင့် ဆောင်ရွက်ထားသော်လည်း နှစ်နိုင်ငံကုန်သွယ်မှု မထိခိုက်စေရေးအတွက် ထိုင်း-မြန်မာ မဲဆောက်-မြဝတီ အမှတ် ၂ တံတားမှတဆင့် ပုံမှန်အတိုင်းခွင့်ပြုပေးသွားမည်ဟု သိရသည်။
နှစ်နိုင်ငံနယ်စပ်ဖြတ်ကျော်ရာတွင် ယခင်ကပုံမှန်အသုံးပြုခဲ့သော အမှတ် (၁) ချစ်ကြည်ရေး တံတားနှင့် သောင်ရင်းမြစ်ကမ်းတလျှောက်ရှိ လှေဆိပ် ၃၃ ခုကို ပြီးခဲ့သည့် မတ်လ ၁၆ ရက်နေ့ကတည်းက ပိတ် ထားခြင်းဖြစ်ပြီး ယခုအခါ ထိုင်းနိုင်ငံတွင်း တကျော့ပြန် ကိုဗစ်ဂယက်ကြောင့် ထိုင်းဘက်ခြမ်းမှ လုံခြုံရေးတိုးမြှင့် ဆောင်ရွက်လာခြင်း ဖြစ်သည်။
လက်ရှိ ထိုင်း-မြန်မာနယ်စပ် မြန်မာဘက်ခြမ်း မြဝတီမြို့တွင် ကိုဗစ်ပိုးတွေ့လူနာ ၄၀ဝ ကျော်ရှိ နေပြီး ထိုင်းနိုင်ငံဘက်ခြမ်း မဲဆောက်မြို့တွင်လည်း ယခုရက်ပိုင်းအတွင်း ကိုဗစ်လူနာ ၅ ဦးထပ်မံတွေ့ရှိ ထားပြီဖြစ်သည်ဟု မဲဆောက်ဆေးရုံကြီး ၏ ဒီဇင်ဘာ ၂၃ရက်နေ့ ထုတ်ပြန်ချက်အရ သိရသည်။