စက်တင်ဘာ (၂၉) ရက်၊ ၂၀၂၆ ခုနှစ်။ ကေအိုင်စီ
ငြိမ်းချမ်းရေးတွေ့ဆုံဆွေးနွေးမှုများကို အများလက်ခံနိုင်ပြီး အဓိပ္ပာယ်ပြည့်ဝသောငြိမ်းချမ်းရေး ရုပ်လုံးမပေါ်သေးမီ အချိန်ကာလအထိ အပစ်ရပ် NCA စာချုပ် ညှိနှိုင်းစဉ်ကာလကဲ့သို့ အခင်းအကျင်း ဖြစ်ပေါ်လာအောင် ကြိုးပမ်းရန်ဆန္ဒရှိကြောင်း 7 EAO Alliance က ယနေ့ (စက်တင်ဘာလ ၂၉ ရက်) တွင် ထုတ်ပြန်သည်။
စစ်အုပ်စု၏ငြိမ်းချမ်းရေးဖော်ဆောင်မှုကော်မတီ(NSPNC)နှင့် NCA အပစ်ရပ်အဖွဲ့များ ရန်ကုန်မြို့တွင် ယနေ့စတင်ပြုလုပ်သည့် ငြိမ်းချမ်းရေးလုပ်ငန်းစဉ်ဆိုင်ရာ ပြန်လည်သုံးသပ်ခြင်း တတိယအကြိမ်မြောက် တွေ့ဆုံဆွေးနွေးပွဲ အမှာစကားတွင် အဖွဲ့ခေါင်းဆောင် ဗိုလ်မှူးကြီး စိုင်းငင်း က ထိုသို့ထည့်သွင်းပြောဆိုထားခြင်း ဖြစ်သည်။
အပစ်ရပ် တိုင်းရင်းသားလက်နက်ကိုင်(၇)ဖွဲ့ပါဝင်သည့် ၎င်းတို့ 7 EAO Alliance အနေဖြင့် လူအများလက်ခံနိုင်ပြီး အဓိပ္ပာယ်ပြည့်ဝသောငြိမ်းချမ်းရေးလုပ်ငန်းစဉ် မပေါ်ပေါက်ခင်အထိ တွေ့ဆုံဆွေးနွေးရေးကို NCA စာချုပ် ညှိနှိုင်းဆွေးနွေးစဉ်ကာလ ဆွေးနွေးမှုများကဲ့သို့ ကြိုးပမ်းလိုသည်ဟု ထုတ်ပြန်ချက်တွင် ဆိုသည်။
ငြိမ်းချမ်းရေးလုပ်ငန်းစဥ်များ ပုံမှန်စတင်နိုင်ရေး တတ်နိုင်သလောက်ကြိုးပမ်းနေသလို ၎င်းတို့၏ ငြိမ်းချမ်းရေးဖော်ဆောင်မှုအား အခြားတိုင်းရင်းသားလက်နက်ကိုင်များ နားလည်နိုင်ရန် လုပ်ဆောင်နေကြောင်းလည်း ထည့်သွင်းပြောဆိုသွားသည်။
နှစ်ရက်ကြာမြင့်မည့် ယခုတတိယအကြိမ်မြောက်ဆွေးနွေးပွဲသည် ပြီးခဲ့သည့်ဇူလိုင်လ၊ တတိယအပတ်က ဆွေးနွေးပွဲနှင့်ဆက်စပ်နေပြီး ထိုပွဲမှနှစ်ဖက်အဖွဲ့အဆိုပြုချက်များကို ဆက်လက်ဆွေးနွေး၊ သဘောထားစုစည်းသွားကြရန်ရှိကြောင်း သိရသည်။
အာဏာသိမ်းပြီးနောက် မူလက စစ်အုပ်စုနှင့် NCA အပစ်ရပ်လက်မှတ်ထိုးထားသည့် တိုင်းရင်းသားလက်နက်ကိုင် (၁၀) ဖွဲ့ပူးပေါင်းထားသော မဟာမိတ်အဖွဲ့အတွင်း သဘောထားကွဲလွဲမှုများ ဖြစ်လာခဲ့ပြီး စစ်အုပ်စုနှင့်ငြိမ်းချမ်းရေးဆက်လက်ဆွေးနွေးလိုသည့် (၇)ဖွဲ့ က မဟာမိတ်အဖြစ် ကျန်ရှိနေသည်။
ထို့နောက် ၂၀၂၄ ခုနှစ်တွင် 7 EAO Alliance အဖြစ်ပြောင်းလဲဖွဲ့စည်းလိုက်ပြီးနောက် အဖွဲ့လိုက်ဖြစ်စေ၊ တစ်ဖွဲ့ချင်းဖြစ်စေ စစ်ခေါင်းဆောင်ဦးဆောင်သော အစိုးရအဖွဲ့နှင့် ငြိမ်းချမ်းရေးဆွေးနွေးမှုများ ယနေ့အချိန်ထိ ဆက်လက်လုပ်ဆောင်လာကြောင်း သိရသည်။
