ဇူလိုင် ၁၃ ရက်၊ ၂၀၂၅ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး ထိန်းချုပ်နယ်မြေ ဒူးသထူ(သထုံ)၊ တောအူး(တောင်ငူ)၊ ခလယ်လွီထူ(ညောင်လေးပင်)၊ ဒူးပလာယာ(ကော့ကရိတ်)၊ မူတြော်(ဖာပွန်) နှင့် ဖားအံခရိုင်တို့တွင် လယ်ထွန်စက်များ၊ မျိုးစပါးနှင့်ရေနုတ်မြောင်းများတူးဖော်ပေးခြင်းဖြင့် ကေအဲန်ယူ-ဗဟို စီးပွားရေးကော်မတီ၊ လယ်ယာစိုက်ပျိုးရေးဌာနက ထောက်ပံ့ကူညီခဲ့သည်။
ဗဟိုမှတဆင့် ခရိုင်အသီးသီးရှိ လယ်ယာစိုက်ပျိုးရေးဌာနများသို့ SP 155 Riding Tractor (၄)စီး၊ Rhino Tiller-G 007 အမျိုးအစား Horsepower (၁၂)စီး၊ မျိုးစပါးများ၊ စိုက်ပျိုးလုပ်အားခငွေကြေးထောက်ပံ့မှုအပြင် လယ်ဧက(၄၀၀)အတွက် လုပ်အားအကူအညီနှင့် ရေနုတ်မြောင်းများတူးဖော်ပေးခြင်းတို့ လုပ်ဆောင်ခဲ့ကြောင်း ကေအဲန်ယူ-ဗဟိုက ဇူလိုင်လ(၁၂)ရက်နေ့တွင် ထုတ်ပြန်ထားခြင်းဖြစ်သည်။
“လယ်သမားတွေအတွက် တပ်မဟာ ၆ ခုလုံးမှာ စိုက်ပျိုးစားသောက်နိုင်ဖို့ပါပဲ။ တိုက်ပွဲတွေကြားမှာပြည်သူတွေ စားသောက်နေထိုင်ဖို့ခက်ခဲတယ်။ တချို့ဆို ထွက်ပြေးတိမ်းရှောင်နေရတာတွေ ရှိတယ်။ သူတို့ ဘာသာ ရပ်တည်၊ စိုက်ပျိုး စားသောက်နိုင်ပြီး အဲဒီကရတဲ့ ၂၀ ရာခိုင်နှုန်းကို နယ်မြေထဲရောက်လာတဲ့ စစ်ရှောင်တွေကို ဝိုင်းဝန်းကူညီကြဖို့ ကျနော်တို့ရည်မှန်းပါတယ်။” ဟု ကေအဲန်ယူ လယ်ယာစိုက်ပျိုးရေးဌာန ဌာနမှူး ပဒိုစောလေစေးက ပြောသည်။
ထို့အပြင် ခရိုင်အသီးသီးတွင် ရေနုတ်မြောင်းများတူးဖော်ထားရှိခြင်းဖြင့် လယ်ယာစိုက်ပျိုးမြေဧကများအတွက် ရေစီးရေလာကောင်းပြီး စပါးအထွက်နှုန်းအောင်မြင်ဖြစ်ထွန်းစေမည်ဖြစ်ကြောင်းလည်း ၎င်းက ဆိုသည်။
မြန်မာနိုင်ငံတွင် စပါးစိုက်ပျိုးမှုအများဆုံးဧကမှာ ပဲခူးတိုင်းဒေသကြီးဖြစ်ပြီး ၎င်းတွင် ကေအဲန်ယူ ထိန်းချုပ်ထားသည့် ညောင်လေးပင်ခရိုင်ရှိ ကျောက်ကြီး၊ မုန်းနှင့်ရွှေကျင်မြို့နယ် တို့သုံးခုလုံးပါဝင်သည်။ ထို့အပြင် ကေအဲန်ယူခရိုင်ခုနှစ်ခုအနက် လူဦးရေ ၄ သိန်းကျော်ဖြင့် စစ်ရှောင်အများဆုံးခရိုင်အဖြစ်လည်း ရပ်တည်နေသည်။
ထို့ကြောင့် ကေအဲန်ယူဘက်က လယ်ယာစိုက်ပျိုးရေးအတွက် မျိုးစပါးထောက်ပံ့ပေးခြင်းမျိုး ယခင်ရှိခဲ့ ဖူးသော်လည်း လိုအပ်သူများသည့်အခြေအနေကြောင့် လုံလောက်မှုမရှိဟု ကျောက်ကြီးမြို့နယ်အတွင်းနေ စစ်ရှောင်နေသူလယ်သမားပြည်သူတစ်ဦးက ပြောသည်။
၎င်းက “ကေအဲန်ယူဘက်က ပေးဖူးပါတယ်။ ဒါပေမဲ့ကျနော်တို့ခရိုင်မှာ စပါးစိုက်တဲ့သူတွေအများကြီးပဲလေ။ ဘယ်လုံလောက်မှာလဲ။ ကျနော်တို့လယ်သမားအများစုကတော့ ကိုယ့်မျိုးစပါးကိုယ့်ဘာသာလှောင်ထားပြီး နောက်နှစ်အတွက်ပြန်စိုက်ကြတယ်။ လယ်ထွန်စက်ဆိုလည်း ဆီဈေးကြီးတော့ ကျနော်ကအသေးပဲသုံးတယ်။ ဆီတစ်ဂါလံဆို ကျနော့်လယ်တစ်ဧကရပြီ” ဟု ကေအိုင်စီသို့ ပြောသည်။
နယ်မြေတွင်း အုပ်ချုပ်ရေးအပြင် စစ်ရေးလှုပ်ရှားနေရသည့် ကေအဲန်ယူအနေဖြင့် ယခုနှစ်မိုးစပါးစိုက်ပျိုးရာသီတွင် ခရိုင်အများစု၏လယ်ယာစိုက်ပျိုးရေးလုပ်ငန်းတိုးတက်ရေးအတွက် သိသိသာသာထောက်ပံ့ကူညီမှုများ ပြုလုပ်လာနိုင်ကြောင်း ထုတ်ပြန်ချက်များအရ သိရသည်။
ထို့အပြင် ပြီးခဲ့သည့် ဇွန်လပိုင်းကလည်း ညောင်လေးပင်ခရိုင်၏ လယ်ယာနှင့်စိုက်ပျိုးရေးဌာနမှ ဦးဆောင်ပြီး ရက်တို စိုက်ပျိုးရေးသင်တန်းပေးနိုင်ခဲ့သေးသည်။
