စက်တင်ဘာလ ၂၀ ရက်၊ ၂၀၂၂ ခုနှစ်။ ကေအိုင်စီ
ကရင်အမျိုးသားအစည်းအရုံး၊ ကော်သူးလေ တပ်မဟာ(၅)ထံသို့ လက်နက်ချ လာရောက်ပူးပေါင်းခဲ့သည့် စစ်ကောင်စီတပ်သား (၂)ဦးအား ဆုငွေများ ပေးအပ်ချီးမြှင့်ခဲ့ကြောင်း KNU မူတြော်ခရိုင်သတင်းစဉ်က ယနေ့ သတင်းထုတ်ပြန်ထားသည်။
ဖာပွန်ခရိုင်အခြေစိုက် စစ်ဆင်ရေးကွပ်ကဲမှုဌာနချုပ် စကခ (၈) ခြေမြန်တပ်ရင်း-ခမရ (၄၀၁) တပ်သားသာလှ (၂၄)နှစ်နှင့် ရဲသီဟထွန်း (၂၁)နှစ်တို့သည် ပြီးခဲ့သည့် သြဂုတ်လ (၂၁) ရက်နေ့တွင် တပ်ကို စွန့်ခွာကာ (3A−4)လက်ဖြောင့်သေနတ် (၁)လက်၊ ကျည်(၁၆)တောက်နှင့်အတူ ကော်သူးလေ တပ်မဟာ ၅ထံသို့ လာရောက်ပူးပေါင်းခဲ့ခြင်းဖြစ်သည်ဟု မူတြော်ခရိုင်သတင်းစဉ်တွင် ဖော်ပြထားသည်။
လက်နက်ယူဆောင်လာသူ တပ်သားမောင်သာလှကို (၁၅)သိန်းကျပ်နှင့် လက်နက်မယူဆောင်လာသူ တပ်သားရဲသီဟထွန်းအား (၅)သိန်းကျပ် ဆုငွေပေးအပ်ခဲ့ကြောင်းလည်း မူတြော်ခရိုင်သတင်းစဉ်က ထုတ်ပြန်ထားသည်။
စစ်တပ်အာဏာသိမ်းသည့် ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှစ၍ စစ်ကောင်စီတပ်များသည် KNU တပ်မဟာ ၅ ထံသို့ လာရောက်ပူးပေါင်းမှု ပိုမိုလုပ်ဆောင်လာသလို ၂၀၂၁ ခုနှစ်အစောပိုင်းမှ ယခုနှစ် ဇန်နဝါရီလ ၂၆ ရက်နေ့အထိ လာရောက်ပူးပေါင်းသည့် စစ်ကောင်စီတပ်သား ၈၀ ဦးကျော်ရှိသည်ဟု ကော်သူးလေ တပ်မဟာ ၅ ထုတ်ပြန်ထားသော မှတ်တမ်းအရ သိရသည်။
