ဧပြီ ၁၀ရက်၊ ၂၀၂၂ ခုနှစ်။ ကေအိုင်စီ
KNU-ကရင်အမျိုးသားအစည်းအရုံး တပ်မဟာ ၆ နယ်မြေ လေးကေကော်ဒေသရပ်ကွက်များတွင် နယ်မြေခံ ကရင်အမျိုးသားလွတ်မြောက် ရေးတပ်မတော်-KNLA ပူးပေါင်းတပ်ဖွဲ့နှင့် စစ်ကောင်စီတပ်တို့အကြား ယနေ့ နံနက် ၂ နာရီမှ စတင်ကာ နေ့လည်ပိုင်းအချိန်ထိ တိုက်ပွဲပြင်းထန်စွာဖြစ်ပွားနေကြောင်း မြေပြင်သတင်းအရ သိရသည်။
ဧပြီလ ၁၀ ရက်၊ နံနက် ၂ နာရီခန့်တွင် စစ်ကောင်စီတပ်က ဗျူးပွိုင့်အမြှောက်ကုန်းနှင့် မဲ့ထော်သလေးဘက်တို့မှ စစ်ကြောင်း ၂ခု ဖြင့် လေးကေကော် ဒေသခံများနေထိုင်သည့် ရပ်ကွက်များအတွင်း စစ်ကြောင်းထိုးကာ လက်နက်ကြီး၊ လက်နက်ငယ်များ ပစ်ခတ်တိုက်ခိုက်လာသည့်အတွက် နယ်မြေခံ KNLA ပူးပေါင်းတပ်များနှင့် လက်ရှိအချိန်ထိ တိုက်ပွဲ အပြင်းအထန် ဆက်လက် ဖြစ်ပွားနေကြောင်း စစ်ရေးနယ်မြေ သတင်းအရင်းအမြစ်က ကေအိုင်စီသို့ ပြောသည်။
” ဒီမနက် ၂ နာရီ လောက်မှာ စစ်ကြောင်း ဆင်းလာတယ်။ ၊ ဗျူးပွိုင့်ကုန်း၊ ခွေးကုန်း (အမြှောက်ကုန်း)ဘက်ရော၊ မယ်ထော်သလေး ၊ ဖလူးဘက်ကရော တက်လာပြီး လေးကေကော် ရပ်ကွက်တွေထဲက ကရင်ကင်းအဖွဲ့တွေရှိ တဲ့နေရာတွေကို လက်နက်ကြီးနဲ့ စပစ်ရာကနေ တိုက်ပွဲ ဖြစ်တာပေါ့၊ ကရင်အဖွဲ့တွေ က အစုခွဲပြီး ပြန်တိုက်တာ မှာ စစ်ကောင်စီဘက်က အထိနာနေတော့ ပိုပြီးလက်နက်ကြီး တွေပစ်ထုတ်နေတာမှာ လူနေအိမ်တွေ တော်တော် ထိတယ်။ KNLA ရဲဘော်တစ်ယောက်တော့ လက်နက်ကြီး အစ မှန်ထားတယ်လို့ သိရတယ်၊ တိုက်ပွဲ ကတော့ အခုထိပစ်နေတယ်” ဟု ၎င်းစစ်ရေးနယ်မြေ သတင်းအရင်းအမြစ်က ပြောသည်။
အဆိုပါ လေးကေကော် ဒေသတွင် ယခု ရက်ပိုင်းအတွင်း စစ်ကောင်စီ ကင်းစခန်းများအား KNLA ပူးပေါင်းအဖွဲ့ များနှင့် ပြောက်ကြား တိုက်ခိုက်မှုများကြောင့် စစ်ကောင်စီဘက်မှ ထိခိုက်သေဆုံးမှုများရှိနေကြောင်း KNLAဘက်က ပြောသည်။
ယမန်နေ့ ဧပြီ ၉ ရက်၊ ညပိုင်းတွင်လည်း လေးကေကော် ရပ်ကွက်များ ၊ ထီးမယ်ဝါးခီးကျေးရွာအတွင်း စစ်ရေးလှုပ်ရှားနေသည့် KNLA ပူးပေါင်းအဖွဲ့များအား နယ်မြေ ရှင်းလင်းရေးအသွင်ဖြင့် စစ်ကောင်စီဘက်မှ တပ်မ ၂၂ လက်အောက်ခံ တပ်များ၊ ကမ်းရိုးတန်းတိုင်းတပ်ရင်းများ၊ တပ်မ ၄၄ လက်အောက်ခံတပ်ရင်းများ၊ စစ်ကောင်စီ၏ နယ်ခြားစောင့်တပ် -BGF တပ်များ ပူးပေါင်းအင်အား၂၀၀ ခန့် စစ်ကြောင်း ၂ ခုမှ ဝင်ရောက်တိုက်ခိုက်မှု လုပ်ဆောင်ခဲ့သည့်အတွက် နှစ်ဘက်ထိတွေ့တိုက်ပွဲဖြစ်ပွားခဲ့သေးသည်။
ယခုဖြစ်ပွားနေသော လေးကေကော်တိုက်ပွဲတွင် ပြီးခဲ့သည့် မတ်လ ၂၅ ရက်နေ့က KNLA ပူးပေါင်းတပ်ဖွဲ့ထံ လာရောက်ပူးပေါင်းခဲ့သူ ခမရ ၅၈၅ ဒုတပ်ရင်းမှူး ဗိုလ်မှူးတင်လင်းအောင် အပါအဝင် CDM တပ်မတော်သားအချို့လည်း KNLA ပူးပေါင်းတပ်ဖွဲ့ဘက်က စစ်ကူတိုက်ပေးနေသည်ဟု သိရသည်။
