စက်တင်ဘာလ ၂၇ ရက်၊ ၂၀၂၁ ခုနှစ်။ ကေအိုင်စီ
ကရင်ပြည်နယ်၊ ကော့ကရိတ်မြို့နယ်ထဲတွင် ပြီးခဲ့သည့် စက်တင်ဘာလ ၂၅ ရက်နေ့က စစ်ကောင်စီ စစ်လေယာဉ် မကြာခဏ လာရောက်ပျံဝဲမှုလုပ်ဆောင်ခဲ့သည့်အတွက် ဒေသခံများ စိုးရိမ်မှုမြှင့်တက်လျက်ရှိသည်ဟု သိရှိရသည်။
ယခုလို စစ်လေယာဉ်ပျံဝဲလာမှုအပေါ် ကော့ကရိတ်မြို့နယ်မှ ဒေသခံတစ်ဦးက ” တခြားဒေသတွေလို ဗုံး လာကြဲမှာ ကြောက်တယ်ပေါ့နော်။ အခုက မိုးတွင်းလည်းဖြစ်၊ ကလေးခလောက်တွေနဲ့ စစ်ရှောင်ပြေး ရမယ်ဆို လည်း အဆင်မပြေဘူး။ ပြီးတော့လည်း အစားအသောက်တွေလည်း အဆင်ပြေမှာ မဟုတ်ဘူးလေ။ ” ဟု ကေအိုင်စီသို့ ပြောသည်။
စစ်အာဏာသိမ်းပြီးနောက်ပိုင်း ကော့ကရိတ်မြို့နယ်ထဲတွင် ဒရုန်းနှင့်ဖြစ်စေ၊ လေယာဉ်နှင့်ဖြစ်စေ စစ်ကောင်စီဘက်မှ မကြာခဏဆိုသလို လာရောက်ထောက်လှမ်းခြင်းများရှိသည်ဟုလည်း နယ်မြေခံ တာဝန်ရှိသူများက ပြောဆိုသည်။
ယခင်လ ဩဂုတ်လ တတိယအပတ်က ကော့ကရိတ်တောင်ပိုင်း ကမိုင်ကုန်းနှင့် အံဖလေးရွာတွင် ကရင်အမျိုး သားလွတ်မြောက်ရေး တပ်မတော်(KNLA) တပ်မဟာ(၆) တပ်ရင်း(၁၈) နှင့် စစ်ကောင်စီ၏ စစ်ဆင်ရေးကွပ် ကဲမှုဌာနချုပ်-စကခ(၁၃) တပ်ဖွဲ့တို့အကြား စစ်ရေးပဋိပက္ခဖြစ်ပွားပြီးနောက် စစ်ကောင်စီဘက်မှ စစ်လေယာဉ် လာရောက်ပျံဝဲမှု နှစ်ကြိမ်ထက်မနည်း လုပ်ဆောင်ခဲ့သည်ဟု ဒေသခံများ၏ ပြောဆိုချက်အရ သိရှိရသည်။
ပြီးခဲ့သည့် ဧပြီလတုန်းကလည်း ကေအဲန်ယူ မူတြော်ခရိုင်အတွင်းရှိ စစ်ကောင်စီတပ်၏ နယ်စပ်စခန်းအချို့ကို KNLA တပ်မဟာ ၅ တပ်ဖွဲ့ဝင်များက သိမ်းပိုက်ရယူခဲ့ပြီးနောက် စစ်ကောင်စီဘက်က ကေအဲန်ယူ မူတြော် ခရိုင်နယ်မြေကို လေကြောင်းတိုက်ခိုက်မှုများ လုပ်ဆောင်ခဲ့သည်။ ထိုသို့ လေကြောင်းတိုက်ခိုက်မှုကြောင့် သောင်းနှင့်ချီသည့် ဒေသခံကရင်လူထုများ ထွက်ပြေးတိမ်းရှောင်ခဲ့ရပြီး ယခုအချိန်နေရပ်မပြန်နိုင်သေး သူများရှိနေဆဲဖြစ်သည်။
ထို့အတူ လက်ရှိ ကေအဲန်ယူ တပ်မဟာ ၁ နှင့် ၃ နယ်မြေဘက်တွင် စစ်ကောင်စီတပ်နှင့် ကရင်အမျိုးသား လွတ်မြောက်ရေးတပ်မတော် (KNLA) တပ်ဖွဲ့တို့အကြား ပစ်ခတ်မှုများ ဆက်တိုက်ဖြစ်ပွား လျက်ရှိသလို တပ်မဟာ(၁) နယ်မြေတွင် စစ်ကောင်စီတပ်ဘက်မှ ဒေသခံအမျိုးသမီးများကို ခေါ်ယူကာ အဓမ္မ ခိုင်းစေမှုများ လုပ်ဆောင်နေကြောင်း ဒေသခံများ၏ ပြောပြချက်အရ သိရှိရသည်။