ဧပြီ ၂၆ ရက်၊ ၂၀၂၁ ခုနှစ်။ ကေအိုင်စီ
ကရင်ပြည်နယ်၊ ဖားအံမြို့တွင် ပြုလုပ်သည့် စစ်အာဏာရှင် ဆန့်ကျင်ရေး လှုပ်ရှားမှုအတွင်း ပါဝင်သည်ဟုဆိုကာ ယမန်နေ့(ဧပြီ ၂၅) ည ၉ နာရီကျော်တွင် စစ်ကောင်စီ၏ စစ်တပ်နှင့် ရဲတပ်ဖွဲ့ များပူးပေါင်း၍ လူငယ်နှစ်ဦးကို လာရောက်ဖမ်းဆီးခေါ်ဆောင်သွားခဲ့သည်ဟု သိရသည်။
အဆိုပါ မောင်အောင်ပြည့်မြတ်နှင့် စောအောင်ခိုင်မျိုးတို့ လူငယ်နှစ်ဦးကို ဆိုင်ကယ်လိုင်စင်နံပါတ်၊ နာမည်၊ ဓာတ်ပုံမှတ်တမ်းများနှင့်တကွ လာရောက်ဖမ်းဆီးခဲ့ခြင်းဖြစ်သည်ဟု နီးစပ်သူများက ကေအိုင်စီသို့ ပြောသည်။
“မနေ့ညက လာခေါ်သွားတယ်။ ဆိုင်ကယ်သပိတ်မှာ ပါဝင်လို့ဆိုပြီး ဆိုင်ကယ်လိုင်စင်နံပါတ်ရယ်၊ ကောင်လေး တွေရဲ့ဓာတ်ပုံရယ်၊ နာမည်အတိအကျမေးပြီး ဖမ်းသွားတယ်။ ဘယ်နေ့က record (မှတ်တမ်း) ကိုကြည့်ပြီး ဖမ်းသွားတာလဲတော့ မသိဘူး။”ဟု ထိုလူငယ်များနှင့် နီးစပ်သူတစ်ဦးက ယနေ့ ဧပြီလ ၂၆ ရက်နေ့တွင် ပြောသည်။
အဆိုပါ လူငယ်နှစ်ဦးသည် ဖားအံမြို့ အမှတ် ၅ ရပ်ကွက်၊ အောင်နန်း ၃ လမ်းတွင် နေထိုင်ကြပြီး မောင်အောင်ပြည့်မြတ်သည် ဖားအံတက္ကသိုလ် ဘူမိဗေဒ တတိယနှစ်ကျောင်းသားတစ်ဦးဖြစ်သည်။
လက်ရှိ ကရင်ပြည်နယ် ဖားအံမြို့တွင် စစ်ကောင်စီတပ်ဖွဲ့၏ ဖမ်းဆီးခြင်းခံထားရသည့် လူငယ် စုစုပေါင်း ၁၀ဝ ဦးကျော်ပြီဟု သိရသည်။
