ဇူလိုင် ၂၁ရက်၊ ၂၀၂ဝ ပြည့်နှစ်။ နေနော်
ကရင်ပြည်နယ် မြဝတီခရိုင်အတွင်းရှိ အခြေခံပညာအထက်တန်းကျောင်း (အ.ထ.က) ပေါင်း ၂ဝ ကျောင်းကို ကျန်းမာရေးဝန်ကြီးဌာန၏ ညွှန်ကြားချက်နှင့်အညီ ယနေ့ (ဇူလိုင်လ ၂၁ ရက်) နံနက်ပိုင်းက စတင်ဖွင့်လှစ်နေပြီ ဖြစ်သည်ဟု သိရသည်။
ကိုဗစ်ကပ်ရောဂါကာလအတွင်း ပညာရေး ဝန်ကြီးဌာန၏ သတ်မှတ်ချက်နှင့်အညီ ယနေ့ မြဝတီခရိုင်အတွင်းရှိ အ.ထ.က ကျောင်း ၊ အ.ထ.က (ခွဲ) ကျောင်း ၁၉ ကျောင်း နှင့် ရွှေလမင်း ကိုယ်ပိုင်အထက်တန်းကျောင်း ၁ ကျောင်း စုစုပေါင်း ကျောင်းပေါင်း ၂ဝ ကျောင်းအား စတင်ဖွင့် လှစ်လိုက်ခြင်းဖြစ်သည်။
မြဝတီမြို့ အမှတ် ၄ ရပ်ကွက်ရှိ အ.ထ.က (ခွဲ) အောင်မြေရွှေဘုံကျောင်း မှ ကျောင်းအုပ်ဆရာမကြီး ဒေါ်နှင်း လဲ့စိမ်းက “ကျမတို့ ကျောင်းမှာက ၉ တန်း/၁ဝတန်း တက်တဲ့ ကျောင်းသား/သူ ဦးရေ ၂၀ဝ ခန့်ရှိပါတယ်။ အထက်တန်းပြ စာသင်ခန်း ၅ ခန်းရှိတဲ့အတွက် ကျောင်းသား ၁၀ဝ ခန့်ကို တစ်ပတ်ခြားစီ အလှည့်ကျကျောင်း တက်စေတာပါ။ စာသင်ချိန်ကိုလည်း မနက် ၈ နာရီမှ နေ့လည် ၁၂ နာရီထိ သတ်မှတ်ထားပါတယ်”ဟု ကေအိုင်စီသို့ ပြောသည်။
လတ်တလောတွင် နဝမတန်းနှင့် ဒသမတန်း ကျောင်းသူ/ ကျောင်းသား များသာ ကျောင်းတက်လက်ခံသေးခြင်း ဖြစ်ပြီး ကျန်းမာရေးဝန်ကြီးဌာန၏ လမ်းညွှန်ချက်နှင့်အညီ စာသင်ခန်းတစ်ခန်း၌ ကျောင်းသား/သူ ဦးရေ ၂ဝ ဦးကို ၆ ပေအကွာ ထားရှိကာ သင်ကြားပေးလျက်ရှိသလို အလယ်တန်းနှင့်မူလတန်းအဆင့်များကိုလည်း COVID-19 ရောဂါ ပြန့်ပွားကူးစက်မှု အခြေအနေအပေါ်မူတည်၍ တစ်ဆင့်ချင်းစီ ဖွင့်လှစ်သွားမည်ဟု ပညာရေးရေးတာဝန်ရှိသူများက ပြောသည်။
“အထက်တန်းကျောင်းသားဦးရေ များပြားတဲ့ အ.ထ.က (၁) မြဝတီကျောင်းမှာတော့ ကျောင်းတက်ချိန်ကို မနက် ၇ နာရီမှ နေ့လည် ၁၁ နာရီလျှင် တစ်ချိန်၊ နေ့လည် ၁နာရီမှ ညနေ ၅ နာရီထိ ကျောင်းသားဦးရေ ၇၀ဝ ကျော်ကို နှစ်ချိန်ခွဲသင်ကြားပေးလျက်ရှိပါတယ်” ဟု အ.ထ.က (၁)မှ ကျောင်းအကျိုးတော်ဆောင် ဦးထွန်းထွန်းဦးက ပြော သည်။ လက်ရှိမြဝတီမြို့တွင် အခြားဖြေလျှော့မှု တစ်ချို့ရှိသော်လည်း ည ၁၂ နာရီမှ နံနက် ၄ နာရီအတွင်း ညမထွက်ရ အမိန့်အား ဆက်လက်ထုတ်ပြန်ထားဆဲ ဖြစ်ကြောင်း သိရသည်။
ထို့အတူ ကရင်ပြည်နယ်တွင် သတ်မှတ်ချက်နှင့်ကိုက်ညီသည့် အခြေခံပညာ အထက်တန်းကျောင်း ၁၆၉ ကျောင်းကို ယနေ့ စတင်ဖွင့်လှစ်နိုင်ခဲ့ပြီး ကျန် ၁၂ ကျောင်းကိုလည်း နှစ်ရက်အတွင်း ဖွင့်လှစ်နိုင်အောင် ဆောင် ရွက်လျက်ရှိသည်ဟု ပြည်နယ် လူမှုရေးဝန်ကြီး ဦးဘိုဘိုဝေမောင်၏ လူမှုကွန်ရက်စာမျက်နှာတွင် ဖော်ပြ ထားသည်။
