အောက်တိုဘာ ၂၃ ရက်၊ ၂၀၁၇ ခုနှစ်။ စောရှား
ကွယ်လွန်သူ ကရင်အမျိုးသားအစည်းအရုံး(KNU)အထွေထွေအတွင်းရေးမှူးချုပ်ဟောင်း ပဒိုမန်းရှာလားဖန်းနှင့် ဇနီး နမ့်ရွှေကျင်တို့အား ရည်စူး၍ Phan Foundation မှ ပေးအပ်ချီးမြှင့်သော ၂၀၁၇ ခုနှစ် ပဒိုမန်းရှာလားဖန်း လူငယ်ခေါင်း ဆောင်ဆုအတွက် အမည်စာရင်းကို စတင်အဆိုပြုနိုင်ပြီဟု အောက်တိုဘာ ၁၉ ရက်နေ့တွင် Phan Foundation မှ ထုတ် ပြန်ကြေညာလိုက်သည်။
ပဒိုမန်းရှာလားဖန်း လူငယ်ခေါင်းဆောင်ဆုသည် မိမိကိုယ်ကျိုးအတွက် မကြည့်ဘဲ ကရင်အမျိုးသား တိုးတက်ရေး အတွက် ပညာရေး၊ လူ့အခွင့်အရေးနှင့် ရိုးရာယဉ်ကျေးမှုဆိုင်ရာ စသည့်ကရင်လူမျိုးတို့၏ လိုအပ်ချက်များကို အထောက် အကူဖြစ်အောင် စွမ်းစွမ်းတမံ လုပ်ဆောင်ပေးသူ အသက် ၃၅ နှစ်အောက် ကရင်လူငယ်များအား နှစ်စဉ်ပေး အပ်ချီးမြှင့်ခြင်းဖြစ်သည်။
ပဒိုမန်းရှာလားဖန်း၏ သားကြီးဖြစ်သူ စောစေးစေးဖန်းက “ လျှောက်လွှာတင်လာတဲ့ Community (အသိုင်းအဝိုင်း) ဖြစ်ဖြစ်၊ အဖွဲ့အစည်းဖြစ်ဖြစ် တင်ခံရသူရဲ့ လှုပ်ရှားမှုစာသားကိုကြည့်ပြီးတော့ ဆုံးဖြတ်ရတယ်။ ရွေးခံရတဲ့လူက ဆုနဲ့ မသင့်တော်ဘူး။ Phan Foundation က ဘက်လိုက်တယ်လို့ တချို့ကလည်း ပြောကြတယ်။ ဒါကြောင့် တင်လာလို့ရှိရင် တကယ့်ပြည့်ပြည့်စုံစုံနဲ့ အရည်အချင်းရှိလူငယ်တွေတော့ မျှော်လင့်ထားပါတယ်။״ဟု ကေအိုင်စီသို့ ပြောသည်။
ထိုဆုအတွက် စာရင်းတင်သွင်းရာ၌ အမည်၊ အသက်၊ မွေးသက္ကရာဇ်၊ နေရပ်နှင့် အဖွဲ့အစည်းနာမည်များဖြင့် တကွ မိမိကိုယ်ကို အဆိုတင်သွင်းခြင်းမှလွဲ၍ မည်သည့်ကရင်အဖွဲ့အစည်း၊ ဆွေမျိုးသားချင်းကိုမဆို လာမည့် ၂၀၁၇ ခုနှစ် ဒီဇင်ဘာလ ၃၁ ရက်နေ့နောက်ဆုံးထားပြီး ကရင်၊ မြန်မာနှင့် အဂင်္လိပ်ဘာသာများဖြင့် bwabwa.phan @phanfoundation.org သို့ အမည်စာရင်းကို တင်သွင်း ပို့ဆောင်ပေးရမည်ဖြစ်သည်။
သတ်မှတ်ထားသည့်စံနှုန်းနှင့် ကိုက်ညီမှုအရှိဆုံး လူငယ်ကို ဆုငွေ အမေရိကန်ဒေါ်လာ ၂,၀၀ဝ ဖြင့် ရွေးချယ် ဆုပေးသွား မည်ဖြစ်ပြီး ၂၀၁၈ ခုနှစ် အစောပိုင်းကာလတွင် ကြေညာသွားမည်ဟု ဖန်းဖောင်ဒေးရှင်းက ထုတ်ပြန်ထားသည်။
မြန်မာနိုင်ငံလူငယ်မူဝါဒ(National Youth Policy Development) ဗဟိုကော်မတီဝင် (Central Committee Member) နန်းထက်ထက်လင်းစိုးက
“လူငယ်တွေရဲ့ လုပ်နိုင်စွမ်းကို အသိအမှတ်ပြု မြှင့်တင်ပေးတဲ့အနေနဲ့ ဆုပေးတာဖြစ်တယ်။ သေး သည်ဖြစ်စေ၊ ကြီးသည်ဖြစ်စေ ကဏ္ဍတစ်ခုခုမှာ အရမ်းလုပ်နိုင်စွမ်းရှိပြီး ကြိုးစားမှုတွေနဲ့ ပြုလုပ်ခဲ့တယ်။ ထပ်ပြီးတော့ လူငယ်တစ်ဦးအနေနဲ့ ကြိုးစားဆဲ။ လူငယ်တွေအတွက် တွန်းအား ဖြစ်စေတဲ့ လုပ်ရပ်လုပ်ပေးခဲ့တဲ့ မည်သူမဆို ဒီဆုကိုရစေချင်တယ်״ ဟုပြောသည်။
ဖန်းဖောင်ဒေးရှင်းကို ၂၀၀၈ခုနှစ်၊ ဖေဖော်ဝါရီလ ၁၄ ရက်နေ့တွင် ထိုင်းနိုင်ငံ၊ မဲဆောက်မြို့၌ အမည်မသိ သေနတ် သမားနှစ်ဦး၏ သတ်ဖြတ်ခြင်းခံရသော KNU အထွေထွေအတွင်းရေးမှူးချုပ်ဟောင်း ပဒိုမန်းရှာလားဖန်းနှင့် ကွယ်လွန်သူ နမ့်ရွှေကျင်တို့အား ဂုဏ်ပြုသည့်အနေဖြင့် ကျန်ရစ်သူ သားသမီးများဖြစ်ကြသော စောစေးစေးဖန်း၊ နမ့်ဘွားဘွားဖန်း၊ နမ့်ဇိုယာဖန်းနှင့် စလုံ့ဖန်းတို့က တည်ထောင်ခဲ့ခြင်းဖြစ်သည်။
၂၀၀၈ခုနှစ်မှစ၍ ပေးအပ်ချီးမြှင့်သော ပဒိုမန်းရှာလားဖန်း လူငယ်ခေါင်းဆောင်ဆုကို ညောင်လေးပင်ခရိုင်မှ နော်ဖောကဘလာထူး၊ ဖာပွန်ခရိုင်မှ စောညွှန့်ဝင်း၊ ဘိတ်-ထားဝယ်ခရိုင်မှ နော်ဒီဇင်ဘာဖော၊ Free Burma Ranger)အဖွဲ့မှ စောထူးထူးအယ်၊ ကရင်အမျိုးသမီးဖွံ့ဖြိုးတိုးတက်ရေးအဖွဲ့(KWEG)မှ နမ့်သန္တာအောင်၊ ကရင်အမျိုးသမီးအစည်း အရုံး(KWO)မှ နော်ကညောဖောနှင့် ကရင်သဘာဝပတ်ဝန်းကျင်နှင့် လူမှုရေးဆိုင်ရာ လှုပ်ရှားမှုအဖွဲ့မှ နော်ဆာမူး၊ Hpa-An Youth Network မှ စရှိုင်းနှင့် အင်တာနက် လူမှုကွန်ရက်များမှတစ်ဆင့် ကရင်စာပေဖွံ့ဖြိုးရေးလုပ်ငန်းများ ဦးဆောင်လုပ် ကိုင်နေသူ စသူလှိုင်ဝင်းတို့အား အသီးသီး ပေးအပ်ချီးမြှင့်ခဲ့ပြီဖြစ်သည်။
