ဇွန်လ ၁၆ရက်။ ၂၀၁၂ခုနှစ်။ နော်ဆဲကလယ် (ကေအိုင်စီ)
ရခိုင်ပြည်နယ်ရှိ ကယ်ဆယ်ရေးစခန်းများတွင် ခိုလုံနေကြသည့် ပြည်သူလူထုများ၏ ကျန်းမာရေးအတွက် အကူအညီများ လိုအပ်လျက်ရှိသည်ဟု ကယ်ဆယ်ရေးလုပ်ငန်းများကို ဦးဆောင် ကူညီပေးနေသော ဦးထွမ်းစိုး က ကေအိုင်စီကိုပြောသည်။
“အဓိဌာန်ကျောင်းမှာ မနေ့က ဝမ်းရေါဂါဖြစ်တယ်။ ဒါနဲ့ အိမ်သာအားနည်းချက်ရှိတာ တွေ့လို့ ဒီနေ့ အိမ်သာဆောက် ပေးလိုက်ကြပါတယ်။ အအေးမိဖျားတာ တစ်ယောက် နှစ်ယောက် တော့တွေ့နေရပါတယ်။ မဏိရတနာကျောင်းက လည်းဝမ်းပျက်တာနဲ့ ဖျားတာကိုတွေ့ရပါတယ်။ “ဟု ၎င်းက ပြောသည်။
ဓညဝတီကျောင်းမှာ လူဦးရေ(၃၅ဝ ) ရှိပြီး အခင်းများ၊ စောင်များမလုံလောက်သည့် အခက်အခဲများနှင့် ရင်ဆိုင်နေရသလို မဏိရတနာ ကျောင်းမှာလည်း အပေါ်ထပ်တွင် ရဟန်းတော်များနေထိုင်ကြရပြီး အောက်ထပ်တွင် လူဦးရေ ၃၀ဝ နီးပါး ခိုလှုံနေထိုင်ကြသည်ဟုသိရသည်။
“ ရေက ရေသန့်သောက်ကြတာပါ။ ဒါပေမယ့် မလောက်ဘူးလေ ။ ဓညဝတီကျောင်းဆို မူလတန်းကျောင်းလေ ဒီတော့ အခင်းတွေဘာတွေမရှိဘူးပေါ့။ ခြင်ထောင်လဲ လိုတယ်။ ခြင်ကတအားကိုက်တယ်လေ။ အစာအစားတွေကတော့ ဆန်တွေက စားလို့ မရတဲ့ဆန်တွေပါတယ်လေ။ ဟင်းက မရှိဘူး။ ငါးပိကို အရည်ကျဲကျဲနဲ့စားကြရတာလေ။ “ ဟု ကယ်ဆယ်ရေးစခန်းတွင် ခိုလှုံနေထိုင်သူတဦးက ပြောသည်။
လူများစုမှာ စိတ်ဓာတ်များကျနေကြပြီး စိတ်ဓာတ်ပိုင်းဆိုင်ရာ ကုသမှုလည်းလိုအပ်သည်ဟု သိရသည့်အပြင် ကျန်းမာရေးအတွက် ကုသပေးမည့် ဆေးဝန်ထမ်းများလည်းလိုအပ်နေကြောင်း သိရသည်။
“ ဦးကျော်သူတို့က တစ်ယောက် ၅၀၀ဝ ကျပ်ပေးမယ်ပြောတော့ သူတို့ ပျော်နေကြတယ်လေ။ သူတို့ကို စိတ်ဓာတ်ရေးရာအရ အားပေးဖို့လည်း လိုနေပါတယ်” ဟု ကယ်ဆယ်ရေးစခန်းတွင်ရှိ လူထုများကို ကူညီပေးနေသော ကယ်ဆယ်အဖွဲ့ဝင်တဦးကလည်း ကေအိုင်စီကို ပြောသည်။
စစ်တွေမြို့နယ်တွင် ကယ်ဆယ်ရေးစခန်း ၃၇ ခု ဖွင့်ထားပြီး လူဦးရေ ၃၀၀၀၀ကျော်ရှိ်သည်ဟု ပြည်တွင်းသတင်းမီဒီယာများက ဖော်ပြခဲ့သည်။
