ဇွန် (၂)ရက်၊ ၂၀၂၆ ခုနှစ်။ ကေအိုင်စီ
မြန်မာနိုင်ငံ၏ထင်ရှားသော ရုပ်ရှင်ဒါရိုက်တာနှင့် လူ့အခွင့်အရေးလှုပ်ရှားတက်ကြွသူ မင်းထင်ကိုကိုကြီးမှာ ယနေ့ မေလ(၂)ရက်နေ့ မနက်ပိုင်းတွင် အသည်းကင်ဆာရောဂါဖြင့် ပြည်တွင်း၌ ကွယ်လွန်သွားကြောင်း သူ၏မိတ်ဆွေအသိုင်းအဝိုင်းက ပြောသည်။
လူ့ဂုဏ်သိက္ခာရုပ်ရှင်သိပ္ပံ-HDFIနှင့် ရုပ်ရှင်ပွဲတော် တည်ထောင်သူလည်းဖြစ်သလို ကဗျာဆရာတစ်ဦးလည်းဖြစ်သည့် ဒါရိုက်တာမင်းထင်ကိုကိုကြီးမှာ အသည်းကင်ဆာရောဂါဝေဒနာကို ကာလကြာရှည်ခံစားခဲ့ရပြီး ကွယ်လွန်ချိန်တွင် အသက်(၆၅)နှစ် ရှိသည်။
“သူ့မှာ အသည်းကင်ဆာဖြစ်နေတာ နည်းနည်းကြာပြီ၊ ကျန်းမာရေးမကောင်းဘူး။ ဒီနေ့မနက်တော့ ဆုံးသွားပြီလို့သိရတယ်” ဟု မင်းထင်ကိုကိုကြီးနဲ့ နီးစပ်သူတစ်ဦးက ပြောသည်။
ဒါရိုက်တာမင်းထင်ကိုကိုကြီးသည် HDIF တည်ထောင်ခြင်းအပြင် ၂၀၁၃ ခုနှစ်က မြန်မာနိုင်ငံတွင် ပထမဆုံးဖြစ်ခဲ့သည့် လူ့အခွင့်အရေး၊ လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်ကို ၂၀၁၇ ခုနှစ်အထိ ၅ နှစ်တိုင်တိုင် စတင်ဦးဆောင်ကျင်းပနိုင်ခဲ့သူလည်း ဖြစ်သည်။
ထို့အပြင် ၎င်း၏မှတ်တမ်းရုပ်ရှင်လက်ရာများတွင် ထိုင်းနိုင်ငံအတွင်း ပြောင်းရွှေ့အခြေချနေထိုင်ရသည့် ပဒေါင်လူမျိုးများအကြောင်း ရိုက်ကူးထားသော “မနုဿလှောင်ချိုင့်” အပါအဝင် လူ့အခွင့်အရေးနှင့်သက်ဆိုင်သည့် မှတ်တမ်းရုပ်ရှင်များက ထင်ရှားပြီး ပြည်တွင်းပြည်ပ အနုပညာအသိုင်းအဝိုင်းမှ အသိအမှတ်ပြုမှုခံရသည်။
ဒါရိုက်တာ မင်းထင်ကိုကိုကြီးမှာ ပြီးခဲ့သည့် ၂၀၁၉ ခုနှစ်က ၂၀၀၈ ဖွဲ့စည်းပုံအခြေခံဥပဒေနှင့် စစ်တပ်နိုင်ငံရေးတွင်ပါဝင်ပတ်သက်မှုအပေါ် လူမှုကွန်ရက်မီဒီယာမှတဆင့် ဝေဖန်ရေးသားခြင်းကြောင့် စစ်အုပ်စု၏ဖမ်းဆီးထောင်ချမှု ခံခဲ့ရသည်။ ထိုစဥ်ကတည်းက ကျန်းမာရေးချို့တဲ့သဖြင့် အယူခံအကြိမ်ကြိမ်ဝင်ခဲ့ရကြောင်းလည်း သိရသည်။
၎င်းကွယ်လွန်ခြင်းအတွက် သူ၏ဆွေမျိုး၊ မိတ်ဆွေအသိုင်းအဝိုင်းနှင့် ပရိသတ်များကလည်း ဝမ်းနည်းကြောင်း လှုမှုကွန်ရက်ပေါ်တွင် ရေးသားဖော်ပြနေကြခြင်းရှိသည်။
