စက်တင်ဘာ ၈၊ ၂၀၂၅ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ တပ်မဟာ(၄)၊ မြိတ်-ထားဝယ်ခရိုင် လယ်မူလား(ပုလော) မြို့နယ်၊ မြိတ်-ထားဝယ် ပြည်ထောင်စု လမ်းမကြီးပေါ် ထမင်းမစားကျေးရွာရှိ အာဏာသိမ်း စစ်တပ် စခန်းကို ကရင် အမျိုးသားလွတ်မြောက်ရေး တပ်မတော်-KNLA နှင့် တော်လှန်ရေးပူးပေါင်းတပ်က ယနေ့ နံနက် ၇ နာရီ ချိန်တွင် သိမ်းပိုက်လိုက်သည်ဟု ကေအဲန်ယူက ထုတ်ပြန်ထားသည်။
အဆိုပါ ထမင်းမစား ရွာရှိ စစ်တပ်စခန်း၌ ခြေလျင်တပ်ရင်း (ခလရ-၂၈၀) ၊ အမြောက်တပ် (အမတ-၃၀၉) တပ်ရင်းနှင့် အမှတ် (၁၂) တပ်မတော်လေ့ကျင့်ရေး သင်တန်းကျောင်းတို့မှ တပ်ဖွဲ့ဝင် စုစုပေါင်း အင်အား ၄၀ ကျော် တပ်စွဲထားသည့် စခန်းတစ်ခု ဖြစ်သည်ဟု သိရသည်။
ထမင်းမစားရွာ တပ်စခန်းသိမ်းတိုက်ပွဲတွင် စစ်အုပ်စု၏ လက်နက်ကြီး၊ လက်နက်ငယ်များ ကိုလည်း သိမ်းယူ ရရှိခဲ့သည်ဟု ကေအဲန်ယူက သတင်းထုတ်ပြန် ထားသည်။
စခန်းသိမ်း တိုက်ပွဲအား တပ်မဟာ (၄) ရှိ၊ ကရင်အမျိုးသား လွတ်မြောက်ရေးတပ်မတော်-KNLA အထူးတပ်ဖွဲ့၊ ကရင်အမျိုးသား ကာကွယ်ရေးတပ်ဖွဲ့ (KNDO)၊ တပ်ရင်း(၇)၊ တပ်ခွဲ(၂)၊ တပ်ခွဲ့(၅) နှင့်အတူ ပုလောပြည်သူ့ ကာကွယ်ရေး တပ်ဖွဲ့ (PDF) စသည့် တော်လှန်ရေး ပူးပေါင်းတပ်ဖွဲ့တို့ ပူးတွဲ တိုက်ခိုက်သိမ်းပိုက်ခဲ့ခြင်း ဖြစ်သည် ဟု သိရသည်။
ထမင်းမစားကျေးရွာသည် ထားဝယ်-မြိတ် ပြည်ထောင်စုလမ်းမကြီးပေါ်တွင် တည်ရှိသည့် ကျေးရွာတစ်ရွာ ဖြစ်ကာ ထိုကျေးရွာကို စစ်အုပ်စုဘက်မှ လေယာဉ်ဖြင့် ဗုံးကြဲတိုက်ခိုက်မှု မကြာခဏ ပြုလုပ်ခဲ့သည်ဟု မြိတ်-ထားဝယ် ခရိုင် ထံမှသိရသည်။
