ဇွန် ၉၊ ၂၀၂၅ ခုနှစ်။ ကေအိုင်စီ
ကောကရိတ်မြို့နယ်၊ ပိုင်ရပ်ကျေးရွာ ကိုယ်ထူကိုယ်ထ ယာယီ စာသင် ကျောင်း ကို ယနေ့ ဇွန် ၉ ရက် မွန်းလွဲ ၂ နာရီအချိန်တွင် စစ်ကောင်စီက ဗုံးကြဲတိုက်ခိုက်သည့်အတွက် ၄ ဦး သေဆုံးပြီး ၃၅ ဦး ဒဏ်ရာရရှိခဲ့သည်ဟု ဒေသခံများက ပြောသည်။
အဆိုပါ ဗုံးကြဲခံရမှု ဖြစ်စဉ်တွင် ကလေး ၂ ဦး အပါအဝင် ကျောင်းဆရာမ ၁ ဦး၊ ယာယီကျောင်းအဖြစ် ဖွင့်လှစ်ထားသည့် အိမ်ရှင် ၁ ဦး၊ စုစုပေါင်း ၄ ဦး သေဆုံးခဲ့သည်ဟု မျက်မြင်တွေ့ရှိသူ ရွာသားတစ်ဦးက ယခုလို ပြောသည်။
“အဲဒီရွာမှာ စကစ ကျောင်း မဖွင့်ဘူး၊ မဖွင့်တော့ ကလေးတွေ စာမတတ်မှာစိုးလို့ ဆရာမငှားပြီး ကိုယ်ထူကိုယ်ထ စာသင်တယ်။ စာသင်တဲ့အိမ်ကို တစ်လုံးကျတယ်။ ရွာထဲကို ၃ လုံး ကြဲသွားတယ်။ စာသင်ဖို့နေရာ ပေးတဲ့အိမ်ရှင် ၁ ယောက်ရယ်၊ ဆရာမ ၁ ယောက်ရယ်၊ ကလေး၂ ယောက် ပွဲချင်းပြီး ဆုံးသွားတယ်။ ကျန်တဲ့ကလေးတွေ၊ လူကြီး တွေ ၃၅ ယောက် အထက် ဒဏ်ရာရတယ်။ ဒဏ်ရာပြင်းထန်တာ ၂ ယောက်၊ ၃ ယောက်ပါတယ်။ အခြေ အနေက စိုးရိမ်ရတယ်” ဟု ၎င်းက ပြောသည်။
အဆိုပါ ကညင်ကတိုက်ကျေးရွာ၌ တိုက်ပွဲဖြစ်ပွားခြင်းမရှိဘဲ စစ်ကောင်စီက ယာယီစာသင်ကျောင်းကို ပစ်မှတ်ထား တိုက်ခိုက်ခြင်းဖြစ်သည်ဟု ဒေသခံတစ်ဦးက ပြောသည်။
ကညင်ကတိုက်ရွာသို့ ဗုံးကြဲတိုက်ခိုက်ပြီးနောက် ကျုံဒိုး၊ အုန်းတစ်ပင်၊ အင်းကြီးကျေးရွာများသို့ ဗုံးကြဲ တိုက်ခိုက်ခဲ့ပြီး ခမရ ၅၄၅ – ၅၄၆ တပ်ရင်းမှ ကော့ဝါလဲနှင့် ကမ်းနီကျေးရွာ များဘက်သို့ လက်နက်ကြီး ပစ်ခတ်တိုက်ခိုက်နေကြောင်း သိရသည်။
အဆိုပါ ယာယီစာသင်ကျောင်းကို စစ်ကောင်စီက ဗုံးကြဲတိုက်ခိုက်သည့်အတွက် ဒဏ်ရာရရှိသူများကို ကျေးရွာ လူမှုကူညီရေး အဖွဲ့အစည်းများက မော်လမြိုင်ဆေးရုံသို့ ပို့ဆောင်ပေးပြီး ဆေးကုသမှုခံယူနေသည်ဟု သိရသည်။
