ဧပြီလ ၂၃ ရက်၊ ၂၀၂၄ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံးထိန်းချုပ်နယ်မြေ ဒူးပလာယာခရိုင်/တပ်မဟာ(၆) ဝင်းရေးမြို့နယ် ရုံးခန်းမဆောင်နှင့် နှစ်အိမ်ရွာစာသင်ကျောင်းကို ယနေ့ ဧပြီလ ၂၃ ရက်နေ့ နံနက်ပိုင်း အချိန်တွင် စစ်ကောင်စီတပ်က ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့သည်ဟု ဒေသခံထံမှ သိရသည်။
ယနေ့ နံနက် ၉ နာရီကျော်အချိန်တွင် ဝင်းရေးမြို့နယ်၊ နှစ်အိမ်ရွာကိုယ်ထူကိုယ်ထစာသင်ကျောင်း ဗုံးကြဲ တိုက်ခိုက်ခံရ၍ ကျောင်းဆောင် ၃ ဆောင် ထိခိုက်ပျက်စီးသည့်အပြင် နံနက် ၁၁ နာရီဝန်း ကျင်အချိန်ခန့်တွင် ဖားပြကျေးရွာအနီးရှိ ကေအဲန်ယူ ဝင်းရေးမြို့နယ်ရုံးကိုလည်း လေယာဉ်ဖြင့် ဗုံးကြဲတိုက်ခိုက်ခံရသည့်အတွက် ခန်းမဆောင်တစ်ခုလုံး ထိခိုက်ပျက်စီးသွားရကြောင်း သိရသည်။
ဒေသခံတစ်ဦးက “ ဘာတိုက်ပွဲမှမရှိဘူး၊ ဒီလိုဘဲဗုံးလာကြဲသွားတာ။ အဲဒီနှစ်နေရာက မနီးဘူး နည်းနည်းဝေးတယ်။ ကျနော်တို့ သိတာက နှစ်နေရာပဲ။ အဆောက်အဦးထိခိုက်မှုများတယ်။ လူထုတွေ ကတော့ထိခိုက်သွားတာမရှိလို့ တော်သေးတယ်။ ကျန်တဲ့နေရာတွေက ပစ်ရင်ပစ်အုံးမယ် ။ လက်နက် ကြီးလား၊ ဗုံးကြဲသံလားမသိဘူး။ အသံအကျယ်ကြီး ၈ ချက်ကြားရတယ်”ဟု ကေအိုင်စီသို့ ပြောသည်။
ယခုအချိန်တွင် နှစ်စဉ်ဖားပြကျေးရွာဘုရားပွဲတော်ကျင်းပသည့်အချိန်ဖြစ်သလို စစ်ကောင်စီ ဗုံးကြဲ တိုက်ခိုက်သည့်နေရာသည် ဘုရားပွဲတော်ကျင်းပသည့် နေရာနှင့်နီးသည့်အတွက် ပွဲလာရောက်သူများလည်း ထွက်ပြေးတိမ်းရှောင်နေကြရကြောင်း ရွာသားများက ပြောသည်။
ထို့အပြင် ဝင်းရေးမြို့နယ်တွင် စစ်ကောင်စီတပ်မှ ဂျက်တိုက်လေယာဉ်နှင့် ကင်းထောက်မှု နေ့စဉ်နီးပါး လုပ်ဆောင်လျက်ရှိသလို ယနေ့ ညအချိန်တွင်လည်း ကင်းထောက်လေယာဉ်လာရောက်ပျံဝဲ သေးကြောင်း ဒေသခံထံမှ သိရသည်။
ဧပြီလ ၂၂ ရက်၊ ယမန်နေ့တွင်လည်း ကေအဲန်ယူ တပ်မဟာ(၃) ညောင်လေးပင်ခရိုင် လယ်ဒိုမြို့နယ် ဖောဝါထ(ဘောကထ)ကျေးရွာထဲတွင် တိုက်ပွဲဖြစ်ပွားခြင်းမရှိဘဲ စစ်ကောင်စီမှ အလားတူ ဗုံးကြဲ တိုက်ခိုက်ခဲ့သည့်အတွက် ဒေသခံနှစ်ဦးသေဆုံးပြီး ၈ လသားအရွယ် ကလေးငယ်တစ်ဦးအပါအဝင် ၈ဦး ထိခိုက် ဒဏ်ရာရရှိသွားကြောင်းလည်း ကရင်ငြိမ်းချမ်းရေး အထောက်အကူပြုကွန်ရက်-KPSNက ထုတ်ပြန်ထားသည်။
အလားတူ ပြီးခဲ့သည့် ဧပြီလ ၂၀ ရက်နေ့ကလည်း တိုက်ပွဲတစ်စုံတရာ ဖြစ်ပွားခြင်းမရှိဘဲ ကေအဲန်ယူ တပ်မဟာ(၁) ဖားအံမြို့နယ် ထီးနူကျေးရွာဘုန်းကြီးကျောင်းဝင်းထဲသို့ စစ်ကောင်စီက လေယာဉ်ဖြင့် လာရောက်ဗုံးကြဲတိုက်ခိုက်သည့်အတွက် ဒေသခံနှစ်ဦး ထိခိုက်ဒဏ်ရာရရှိခဲ့သေးကြောင်း သိရသည်။
