ဩဂုတ် ၈ ရက်၊ ၂ဝ၂၂ ခုနှစ်၊ ကေအိုင်စီ
KNU-ကရင်အမျိုးသားအစည်းအရုံး ဒူးပလာယာခရိုင် နို့တကောမြို့နယ်(ကြာအင်းဆိပ်ကြီးမြို့နယ်) ကြခတ်ချောင်းကျေးရွာ၏ ပထမဦးဆုံးအကြိမ် ကရင်ရိုးရာလက်ချည်ပွဲအခမ်းအနားကို ယမန်နေ့ဩဂုတ် ၇ ရက်နေ့တွင် ကျင်းပခဲ့သည်။
ကျင်းပရေးကော်မတီ တာဝန်ရှိသူတစ်ဦးက “ ကရင်အချင်းချင်း ညီညွတ်စေချင်တယ်။ စိမ်ဝမ်းမကွဲဘဲ စည်းလုံးစေချင်တယ်။ ကိုယ့်ရိုးရာယဉ်ကျေးမှုတွေ မပပျောက်အောင် ထိန်းသိမ်းသိရှိလာအောင် ရည်ရွယ်ပြုလုပ်တာပေါ့နော်။” ဟု ကေအိုင်စီသို့ ပြောသည်။
ယမန်နေ့ လက်ချည်ပွဲအခမ်းအနားတွင် ကျေးရွာအသီးသီးမှ လူဦးရေ ၂၀၀ ဝန်းကျင် တက်ရောက်ကြပြီး ကရင့်ရိုး ရာဒုံးအက၊ လက်ချည်ပွဲ သရုပ်ဖော်အကများဖြင့် ဖျော်ဖြေကြသလို လက်ချည်ပွဲဖြစ်ပေါ်လာပုံအကြောင်းနှင့် လက်ချည်ပွဲတွင် ပါဝင်သည့်ပစ္စည်းအမျိုးအမည်များ၏ အနက်အဓိပ္ပါယ်ကိုလည်း တစ်ခုချင်းစီအလိုက် ရှင်းလင်းတင်ပြခဲ့သည်။
ကရင်တိုင်းရင်းသားများသည် ဝါခေါင်လရောက်တိုင်း မိသားစုအလိုက်ဖြင့်လည်းကောင်း၊ ကျေးရွာ ၊ မြို့နယ်အဆင့်ဖြင့်လည်းကောင်း စုပေါင်းလက်ချည်ပွဲ အခမ်းအနားပြုလုပ်ကြပြီး ရောဂါဘယကပ်စွဲမှု ကင်းဝေးစေရန်နှင့် စည်းလုံးညီညွတ်မှုရှိကြစေရန် လက်ကောက်ဝတ်တွင် ချည်ဖြူဖြင့် ရစ်ပတ်ဆုတောင်းကြသည်ဟု သိရသည်။
KNU ဒူးပလာယာခရိုင် မြို့နယ်အသီးသီးရှိ ကျေးရွာအများစုတွင် နိုင်ငံရေးနှင့် စစ်ရေးအခြေအနေများကြောင့် ယခုနှစ်တွင် ရိုးရာလက်ချည်ပွဲအခမ်းအနားကို ကျေးရွာအချို့များသာ ပြုလုပ်ကျင်းပနိုင်ခဲ့ကြသေးသည်ဟု ကျေးရွာတာဝန်ရှိသူများထံမှ သိရသည်။
