မတ်လ ၁၇ ရက်၊ ၂၀၂၂ခုနှစ်။ ကေအိုင်စီ
ကော့ကရိတ်မြို့တွင် ယခုရက်ပိုင်းအတွင်း စစ်ကောင်စီတပ်မှ တပ်အင် အားအလုံးအရင်းဖြင့် ရပ်ကွက်လမ်းထိပ်များ၊ မြို့တွင်း မြို့ပြင် ဝင်ထွက်ရာလမ်းမများတွင် ယာယီသဲအိတ်ဘန်ကာများ ပြုလုပ်ကာ ကင်းပုန်းဝပ် လုံခြုံရေးယူထားသည့် အသွင်ဖြင့် စစ်အင်အားချထား နေရာယူထားသည့်အတွက် မြို့တွင်းတိုက်ပွဲဖြစ်လာမည်ကို မြို့ခံများက စိုးရိမ်လျက်ရှိသည်ဟု သိရသည်။
ပြီးခဲ့သည့် မတ်လ ၁၄ရက် ညက ခြေလျင်တပ်ရင်း-ခလရ ၉၇ အတွင်း တိုက်ပွဲဖြစ်ပွားခဲ့ပြီးနောက်ပိုင်း စစ်အင်အားအလုံးအရင်းဖြင့် ရပ်ကွက်လမ်းထိပ်များ၊ မြို့တွင်း မြို့ပြင် ဝင်ထွက်ရာလမ်းမများနှင့် ၉၇ တပ်ဝင်း ပတ်ဝန်းကျင်အနီးရှိ ဘုန်းကြီးကျောင်းဝင်းများအတွင်း ယာယီသဲအိတ်ဘန်ကာများပြုလုပ်ကာ ကင်းပုန်းဝပ် စစ်အင်အားချထား နေရာယူထားသည့်ဖြစ်စဉ်များကြောင့် မြို့တွင်းတိုက်ပွဲဖြစ်ပွားလာမည်ကို စိုးရိမ်ထိတ်လန့်လျက်ရှိသည်ဟု မြို့ခံများက ပြောသည်။
“မြို့ဝင်မြို့ထွက်၊ လမ်းထိပ်ရွာထိပ်တွေမှာ စစ်တပ်နဲ့ ရဲအစောင့်တွေ အင်အား စုပေါင်း ၅၀ လောက် ကင်းချထားတယ် ။ ဒီမနက်ပိုင်း စကခ ၁၂ ဘက်ကနေ မြို့လယ်က ၉၇ တပ်ကို စစ်ကား ၅ စီးအင်အား ၁၀၀ လောက် လာပို့သွားပြီးတော့ တပ်ဘေးက ဘုန်းကြီးကျောင်းတွေထဲကို ကင်းပုန်းချတဲ့ ပုံစံမျိုးနေရာဝင်ယူလာပြီး ဘုန်းကြီးတွေ မနေရဲရင် နေရာရွှေ့နေကြဖို့ ပြောတယ်။ ညကတော့ လေယာဥ် ၂ ကြိမ် လာပျံပြီး ကင်းထောက်တယ်။ မြို့ခံတွေကတော့ မကြုံစဖူး မြို့ထဲ သဲအိတ်ဘန်ကာတွေနဲ့ စက်သေနတ်တွေ ထောက်ပြီးကင်းချထားတာမျိုးဆိုတော့ နေရာပြောင်းနေကြဖို့တော့ ပြင်နေကြပြီ။ “ဟု ကော့ကရိတ်မြို့ခံ တစ်ဦးက ကေအိုင်စီသို့ ယနေ့တွင် ပြောသည်။
အဆိုပါ KNU တပ်မဟာ ၆ နယ်မြေ ကော့ကရိတ် ဧရိယာအတွင်းမှ စစ်ကောင်စီတပ်များ ၃ ရက်အတွင်း ပြန်လည်ဆုတ်ခွာရန် မတ်လ ၇ ရက်နေ့က စာထုတ်အကြောင်းကြား ထုတ်ပြန်ထားပြီးသည့်နောက်ပိုင်း ဒေသတွင်းရှိ အာရှလမ်းသစ်လမ်းပိုင်း ၊ တောင်ကြာအင်းကျေးရွာဘက်နှင့် ကော့ကရိတ် မြို့အနီး၊ ဝါဆိုဦး ရပ်ကွက်အပိုင်း၊ ခလရ ၉၇ တပ်ဝင်းတို့တွင် တိုက်ပွဲများ ဖြစ်ပွားမှုရှိခဲ့သည်။
ထို့အပြင် ယနေ့ နံနက်ပိုင်းအထိတောင်ကြာအင်း ကျေးရွာဘက်တွင် ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတပ်ဖွဲ့များနှင့် စစ်ကောင်စီတပ်များ ဆက်လက် ပစ်ခတ်တိုက်ခိုက်မှုများရှိနေသေးကြောင်း၊ ဒေသခံများအနေဖြင့် ဓာတ်လောင်းဘုရာကုန်းဘက်နှင့် လောင်းကိုင်၊ ဖားကျ ၊ သမိန်ဒွတ် ကျေးရွာများ ဘက်သို့ စစ်ဘေး ရှောင်နေကြရကြောင်း သိရှိရသည်။
