စက်တင်ဘာ (၂) ရက်၊ ၂၀၂၆ ခုနှစ်။ ကေအိုင်စီ
ကရင်ပြည်နယ် ဖားအံမြို့အပါအဝင် မဒေါက်၊ ပဲခူးနှင့် ရွှေကျင်မြို့တို့တွင် မြစ်ရေများ စိုးရိမ်ရေမှတ်အထက် ကျော်လွန်ရောက်ရှိနေကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာန၏ ယနေ့ စက်တင်ဘာလ ၂ ရက်နေ့ ထုတ်ပြန်ချက်အရ သိရသည်။
ယနေ့ စက်တင်ဘာလ ( ၂) ရက်နေ့ နံနက် ၈ နာရီ ထုတ်ပြန်ချက်အရ သံလွင်မြစ်ရေသည် ဖားအံမြို့၏ စိုးရိမ်ရေမှတ်အထက် ၃ ပေ ၉ လက်မခန့် ကျော်လွန်ရောက်ရှိနေပြီး လာမည့် ၂၄ နာရီအတွင်း ၃ လက်မခန့် ပြန်လည်ကျဆင်းနိုင်သော်လည်း စိုးရိမ်ရေမှတ်အထက်တွင် ဆက်လက်ရှိနေမည် ဖြစ်ကြောင်း သိရသည်။
ယခင်မြင့်တက်ခဲ့သည့် ရေမှတ်ထက် ကျော်လွန်လာသည့် သံလွင်မြစ်ရေကြောင့် ဖားအံမြို့တွင် မြေနိမ့်ပိုင်းနေရာများရှိ လူနေအိမ်တချို့ ရေနစ်မြှုပ်နေကြောင်း ဖားအံမြို့ခံများက ပြောသည်။
မြို့ခံ အမျိုးသားတစ်ဦးက “ ဒီမနက်တော့ ရေက ထပ်မတက်ဘဲ ငြိမ်နေတယ်။ ဒါပေမယ့် ပထမတစ်ခေါက် တက်တဲ့ရေထက် ကျော်သွားပြီ။ ရေပေါ်ဈေးဆို ရေက ခြေမျက်စိလောက် ဝင်နေပြီ။ ဈေးတွေလည်း ရွှေ့ပြောင်းရတယ်။ အချို့ဆိုင်တွေလည်း ပိတ်ကုန်ပြီ။ အနိမ့်ပိုင်းအိမ်တွေ မြုပ်နေပြီး မမြုပ်သေးတဲ့နေရာတွေ ရေထပ်တက်လာရင်တော့ ရွှေ့ရမှာပေါ့” ဟု ကေအိုင်စီကို ပြောသည်။
လက်ရှိတွင် မီးသတ်တပ်ဖွဲ့၊ ကယ်ဆယ်ရေးအဖွဲ့များနှင့် သက်ဆိုင်ရာတာဝန်ရှိသူများက ဖားအံမြို့ရှိ ရေဘေးသင့်ပြည်သူများကို ဘုန်းကြီးကျောင်းနှင့် မိုးလုံလေလုံအားကစားရုံများသို့ ယာယီနေရာချထားပေးလျက် ရှိသလို ရေမမြုပ်သေးသည့် နေရာများသို့ လှေများဖြင့်သွားရောက်ကာ စားနပ်ရိက္ခာများ လိုက်လံဖြန့်ဝေပေးနေကြောင်း သိရသည်။
အလားတူ ပဲခူးမြို့တွင်လည်း ပဲခူးမြစ်ရေသည် စိုးရိမ်ရေမှတ်ထက် ၉ လက်မခန့် မြင့်တက်နေပြီး လာမည့် ၂၄ နာရီအတွင်း ၁ ပေခန့် ထပ်မံမြင့်တက်နိုင်ကြောင်း မိုးဇလက အသိပေးထားသည်။
ပဲခူးမြို့၌ မိုးရွာသွန်းမှုနှင့် မြစ်ရေတက်မှုကြောင့် စက်တင်ဘာ ၁ ရက် ညပိုင်းမှစ၍ မြေအနိမ့်ပိုင်း ရပ်ကွက်များတွင် ရေဝင်ရောက်မှုဖြစ်ပေါ်ပြီး စက်တင်ဘာ ၂ ရက် နံနက်ပိုင်းတွင် ရန်ကုန်-ပဲခူး လမ်းမပေါ်အထိ ရေတက်လာကြောင်း ဒေသတွင်းသတင်းဖော်ပြချက်များအရ သိရသည်။
ထို့အပြင် စစ်တောင်းမြစ်ရေသည် မဒေါက်မြို့၏ စိုးရိမ်ရေမှတ်အထက် ၃ ပေ ၁ လက်မခန့်နှင့် ရွှေကျင်မြစ်ရေသည် ရွှေကျင်မြို့၏ စိုးရိမ်ရေမှတ်အထက် ၄ လက်မခန့် အသီးသီး ကျော်လွန်နေကြောင်း မိုးဇလ၏ ထုတ်ပြန်ချက်တွင် ဖော်ပြထားသည်။
