ဇွန် (၂၇) ရက်၊ ၂၀၂၆ ခုနှစ်။ ကေအိုင်စီ
မြန်မာနိုင်ငံ တာချီလိတ်မြို့ဘက်ကို သယ်ယူမည့် ဘတ်ငွေ ၂၃ သန်းကျော်အား ထိုင်းနိုင်ငံ၊ မယ်ဆိုင်နယ်စပ်တွင် ဇွန်လ(၂၆)ရက်နေ့က ဖမ်းဆီးရမိခဲ့ပြီး မူးယစ်ဆေးဝါးအပါအဝင် တရားမဝင်ရာဇဝတ်လုပ်ငန်းများနှင့် ဆက်စပ်မှုရှိ၊ မရှိ ထိုင်းအာဏာပိုင်များက စစ်ဆေးနေသည်ဟု ထိုင်းသတင်းများကဖော်ပြသည်။
ထိုင်းဘတ် ၁ထောင်တန် အရွက်(၁,၀၀၀)ပါ (၂၃)အုပ်နှင့် (၂၃) ရွက်အား မုန့်ဘူးများအတွင်း ထည့်သွင်းသိုလှောင်ထားခြင်းဖြစ်ပြီး စုစုပေါင်းတန်ဖိုး ဘတ် ၂၃,၀၂၃,၀၀၀ ရှိသည်။
၎င်းငွေများကို မြန်မာလိုင်စင်တပ် မော်တော်ယာဥ်တစ်စီးဖြင့် မြန်မာနိုင်ငံသားတစ်ဦးက ချင်းရိုင်ခရိုင်၊ လူဝင်မှုကြီးကြပ်ရေးဂိတ်ကို ကျော်ဖြတ်သယ်ဆောင်ခဲ့အပြီး အကောက်ခွန်စစ်ဆေးရေးဂိတ်အနီး ၁၀ မီတာတွင် ထိုင်းအာဏာပိုင်များက ဖမ်းဆီးမိခဲ့ကြောင်း သိရသည်။
ယာဥ်မောင်းနှင်သူ အသက် ၃၁ နှစ်အရွယ် မြန်မာနိုင်ငံသားကို အာဏာပိုင်များဖမ်းဆီးထားပြီး အကောက်ခွန်လုပ်ထုံးလုပ်နည်းအရမဟုတ်၊ ခွင့်ပြုချက်မရှိဘဲ ထိုင်းနိုင်ငံပြင်ပသို့ ငွေအမြောက်အများ သယ်ယူမှုဖြင့် အမှုဖွင့်ထားသည်။
ထို့အပြင် နယ်စပ်ဖြတ်ကျော် ထိုင်းဘတ်ငွေအမြောက်အများ ခိုးထုတ်မှုအပေါ် တရားမဝင် လုပ်ငန်းများနှင့်ဆက်စပ်မှု ရှိ မရှိ စစ်ဆေးမှုနေသည်ဟုလည်း သတင်းများကဖော်ပြသည်။
ကျူးလွန်သူအား အကောက်ခွန်ဥပဒေအပြင် ထိုင်းနိုင်ငံခြားငွေလဲလှယ်မှု ထိန်းချုပ်ရေး အက်ဥပဒေအရပါ တရားစွဲဆိုအရေးယူမည်ဖြစ်ကြောင်း သိရသည်။
ထိုင်းနိုင်ငံ၊ မယ်ဆိုင်ဒေသအတွင်း အကောက်ခွန်ရေးရာမူဝါဒ ချိုးဖောက်မှုများအပေါ် တင်းကြပ်ဖို့ ထိုင်းအစိုးရမှညွှန်ကြားထားကြောင်း မယ်ဆိုင်အကောက်ခွန် အကြီးအကဲ မစ္စတာ ဝါရစ်ဗီဆာရာထနွန်က အတည်ပြုထားခြင်းလည်း ရှိသည်။
