ဧပြီ (၁၂) ရက်၊ ၂၀၂၆ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ တပ်မဟာ(၃)၊ ခလယ်လွီထူ(ညောင်လေးပင်)ခရိုင်၊ မူး(မုန်း)မြို့နယ်၊ ကရင်အမျိုးသားလွတ်မြောက်ရေးတပ်မတော်-KNLA တပ်ရင်း(၈)ထံသို့ ဧပြီလ(၉)ရက်နေ့က စစ်အုပ်စုတပ်ဖွဲ့ဝင်(၃)ဦး လက်နက်နှင့်တကွဘက်ပြောင်းခိုလှုံလာကြောင်း ကေအဲန်ယူထုတ်ပြန်ချက်အရ သိရသည်။
အသက်(၂၀)မှ (၂၄)နှစ်ကြား အာကာ၊ ကျော်မင်းခန့်၊ ကောင်းခန့်ကို ဆိုသူ တပ်ဖွဲ့ဝင်(၃)ဦးမှာ လက်နက်ခဲယမ်းသယ်ဆောင်၍ တောင်စုကျေးရွာ၊ စစ်အုပ်စုခြေမြန်တပ်ရင်း ခမရ-၅၈၁ မှ ထွက်ပြေးလာခြင်းဖြစ်ပြီး ၎င်းတို့ကိုကေအဲန်ယူက လက်ခံဆောင်ရွက်ပေးခဲ့သည်ဟု ဖော်ပြသည်။
“အရင်ကလည်း မုန်းဘက်မှာ ၅ ယောက်တစ်စု ၆ ယောက်တစ်စု အဲ့လိုပဲပြန်လာကြတယ်။ များသောအားဖြင့် လူငယ်လေးတွေ၊ လူကြီးပိုင်းလူလတ်ပိုင်းနည်းတယ်။ စိစစ်တဲ့အခါလည်း တပ်သားသစ်တွေများတယ်။ တချို့ကသထုံ၊ တချို့ကမန္တလေး နေရာအစုံကပဲ” ဟု မုန်းမြို့နယ် အုပ်ချုပ်ရေးပိုင်းမှတာဝန်ရှိသူတစ်ဦးက ပြောသည်။
ကေအဲန်ယူသတ်မှတ်နယ်မြေအရ မူးမြို့နယ်၊ လယ်ဒို(ကျောက်ကြီး)မြို့နယ်နှင့် ဆောထိ(ရွှေကျင်)မြို့နယ်တို့မှာ ခလယ်လွီထူခရိုင်အတွင်း ပါဝင်သည်။
စစ်အုပ်စုက တရားဝင်စစ်သင်တန်းများခေါ်ပေးခြင်း၊ တရားမဝင်တပ်သားစုဆောင်းခြင်း လုပ်ဆောင်ပြီးနောက်ပိုင်း မြို့နယ်အလိုက် KNLA တပ်ရင်းများထံ လာရောက်ခိုလှုံသူ သိသိသာသာများပြားလာသည်။
ထို့အတူ မူးမြို့နယ်အနေဖြင့် ၂၀၂၅ ခုနှစ်အကုန်ပိုင်းမှစပြီး ယခု ၂၀၂၆ ခုနှစ် ဧပြီအထိ စစ်အုပ်စုဘက်မှဘက်ပြောင်းခိုလှုံလာသူ (၂၀)ဦးကျော်ရှိကြောင်းလည်း မြို့နယ် ကေအဲန်ယူ၏စာရင်းအရ သိရသည်။
