ဩဂုတ် ၁၇ ရက်၊ ၂၀၂၅ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ တပ်မဟာ(၄)၊ မြိတ်-ထားဝယ်ခရိုင်၊ ရေဖြူမြို့နယ် ကော့လှိုင် ကျေးရွာအနီးတွင် ဩဂုတ်လ(၁၅)ရက်နေ့က နတ်အိမ်တောင်ကိုစစ်ကူပို့ရန်လာသည့် စစ်ကောင်စီနှင့် တော်လှန်ရေးတပ်ဖွဲ့များ တိုက်ပွဲထပ်မံဖြစ်ပွားပြီး စစ်ကောင်စီဘက်မှ အရာရှိ(၃)ဦးအပါအဝင် (၁၇)ဦး သေဆုံးခဲ့ကြောင်း တော်လှန်ရေးအင်အားစုများမှ သိရသည်။
ထိုင်း-မြန်မာနယ်စပ်မျဥ်းပေါ်ရှိနတ်အိမ်တောင်စစ်ကောင်စီတပ်စခန်းနှင့် ၂၇ ကီလိုမီတာဝန်းကျင်ခန့် ကွာဝေးသည့် ကော့လှိုင်ကျေးရွာအနီးသို့ စစ်ကြောင်းထိုးလာသော စစ်ကောင်စီတပ်နှင့် မွန်၊ ကရင်၊ ထားဝယ်တော်လှန်ရေးအင်အားစုများ ပူးပေါင်းပါဝင်သော တပ်ဖွဲ့တို့ ထိတွေ့တိုက်ပွဲ ၂ နာရီကြာ ဖြစ်ပွားခဲ့ခြင်းဖြစ်သည်။
တိုက်ပွဲအတွင်း စစ်ကောင်စီဘက်မှ အရာရှိ(၃)ဦးပါဝင်သော (၁၇)ဦး သေဆုံးပြီး (၇)ဦးထက်မနည်း ထိခိုက်ဒဏ်ရာရရှိခဲ့သည်ဟု ရေးပြောက်ကျားတပ်ဖွဲ့က ယနေ့(ဩဂုတ်လ ၁၇ ရက်)တွင် သတင်းထုတ်ပြန်ထားသည်။
စစ်ကောင်စီက ပြန်လည်တိုက်ခိုက်မှုကြောင့် တော်လှန်ရေးပူးပေါင်းတပ်ဘက်မှ တပ်ဖွဲ့ဝင် (၅)ဦး ဒဏ်ရာရရှိခဲ့သော်လည်း မစိုးရိမ်ရကြောင်း ထုတ်ပြန်ချက်ကဖော်ပြသည်။
ပြီးခဲ့သည့် ဩဂုတ်လ (၁၃)ရက်နေ့ကလည်း အင်အားရာနှင့်ချီသော အဆိုပါစစ်ကောင်စီတပ်ဖွဲ့နှင့် တော်လှန်ရေးပူးပေါင်းတပ်တို့ တိုက်ပွဲနှစ်ကြိမ်ဖြစ်ပွားခဲ့ပြီး နှစ်ဖက်ထိခိုက်မှုရှိခဲ့သေးသည်။
ကေအဲန်ယူ တပ်မဟာ(၄)နယ်မြေ၊ ထားဝယ်ခရိုင်၊ ထိုင်း-မြန်မာနယ်စပ်တကြောတွင် နောက်ဆုံးသိမ်းပိုက်ရန် ကျန်ရှိသည့် နတ်အိမ်တောင်စခန်းကို စစ်ကူဖြည့်လာသည့် စစ်ကောင်စီတပ်များကို ကရင်အမျိုးသားလွတ်မြောက်ရေးတပ်မတော်-KNLA၊ ကော်သူးလေတပ်မတော်-KTLA(ကြယ် လင်းရောင်တပ်ရင်း)၊ ရာမညမွန်တပ်တော်-RMA၊ မွန်ပြည်တော်လှန်ရေးတပ်-MSRFပါဝင်သော တော်လှန်ရေးတပ်ဖွဲ့များ ပူးပေါင်းကာ အကြိမ်ကြိမ်ဖြတ်တိုက်ထားနိုင်ခြင်းဖြစ်သည်။
