မေလ ၁၇ ရက်၊ ၂၀၂၅ ခုနှစ်။ ကေအိုင်စီ
ကချင်လွတ်လပ်ရေးအဖွဲ့ချုပ်-KIO ဥက္ကဋ္ဌ ဦးလညော်ဇောင်းဟရား ကွယ်လွန်မှုအပေါ် ဝမ်းနည်း အလေးပြုကြောင်း ကေအဲန်ယူ-ကရင်အမျိုးသားအစည်းအရုံး ဗဟိုဋ္ဌာနချုပ်က ယနေ့ မေလ ၁၇ ရက်နေ့ရက်စွဲဖြင့် သဝဏ်လွှာပေးပို့သည်။
ဘဝတူတိုင်းရင်းသားများနှင့်အတူလက်တွဲကာ ကချင်လူမျိုးများ၏ တန်းတူညီမျှမှုနှင့်ကိုယ်ပိုင်ပြဌာန်းခွင့် ရရှိရန် KIO ဥက္ကဋ္ဌအဖြစ် တာဝန်ထမ်းဆောင်သည့် ၂၀၀၆ ခုနှစ်မှ ၂၀၁၇ ခုနှစ်အထိ ကာလပတ်လုံး ပူးပေါင်းဆောင်ရွက်ခဲ့သည့် ဦးလညော်ဇောင်းဟရား၏ သေဆုံးမှုအပေါ် ကေအဲန်ယူအနေဖြင့် ကြေကွဲဝမ်းနည်းရပါကြောင်း သ၀ဏ်လွှာတွင် ဖော်ပြသည်။
ဦးလညော်ဇောင်းဟရား၏ သေဆုံးမှုသည် KIO အပါအဝင် ကချင်လွတ်မြောက်ရေးတပ်မတော်-KIA နှင့် ကချင်ပြည်သူတစ်ရပ်လုံး၏ ဆုံးရှုံးမှုလည်း ဖြစ်သည်ဟု ကေအဲန်ယူက ဆိုသည်။
မေလ (၁၅)ရက်၊ နံနက် ၇နာရီ ၁၅ မိနစ် က လူကြီးရောဂါဖြင့် ကွယ်လွန်ချိန်၊ အသက် (၈၇)နှစ်အရွယ်ရှိပြီဖြစ်သည့် ဦးလညော်ဇောင်းဟရားသည် ၁၉၆၄ ခုနှစ်မှစတင်ကာ KIA အဖွဲ့အတွင်းစတင်ဝင်ရောက်ခဲ့သည်။ သူသည် KIO ဥက္ကဋ္ဌတာဝန်မှ အနားယူသည့်အချိန်အထိ နှစ်ပေါင်း ၅၀ ကျော်ကြာ နိုင်ငံရေး၊ စစ်ရေးဖြတ်သန်းမှုရှိသူလည်းဖြစ်ကြောင်း သိရသည်။
၎င်းကွယ်လွန်ခြင်းအပေါ် ရက္ခိုင်အမျိူသားအဖွဲ့ချုပ်-ULA၊ ကျောင်းသားတပ်မတော်-ABSDF တို့ကလည်း ဝမ်းနည်းကြောင်း သဝဏ်လွှာအသီးသီးပေးပို့ခဲ့သလို ၎င်း၏မိတ်ဆွေများ၊ ရဲဘော်ရဲဘက်များကလည်း လူမှုကွန်ရက်မှတဆင့် ဝမ်းနည်းကြောင်း ပြောဆိုထားကြသည်။
