ဖေဖော်ဝါရီ ၇၊ ၂၀၂၅ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံးထိန်းချုပ်နယ်မြေ၊ ဒူးပလာယာခရိုင်၊ တပ်မဟာ(၆)၊ ဝင်းရေးမြို့နယ် အနန်းကွင်းကျေးရွာ၌ လူနေအိမ် ၅၀ လုံးကျော်ကို စစ်ကောင်စီ မီးရှို့ဖျက်ဆီးခဲ့သည်ဟု နယ်မြေခံ ကေအဲန်ယူ တာဝန်ရှိသူက ပြောသည်။
အဆိုပါ အနန်းကွင်းကျေးရွာရှိ စစ်ကောင်စီဗျူဟာကုန်းတပ်စခန်းကို စစ်ကူအင်အားတိုးပို့ထားပြီးနောက် ဝေဟင်မှ လေယာဉ်ဖြင့် လွယ်ကူစွာ ရိက္ခာချပေးနိုင်ရန်အတွက် ယခုလို ကျေးရွာအတွင်းရှိ လူနေအိမ်အများအပြားကို မီးရှို့ဖျက်ဆီး ခဲ့ခြင်းဖြစ်သည်ဟု ကေအဲန်ယူ မြို့နယ်တာဝန်ရှိသူ တစ်ဦးက ပြောသည်။
“သူတို့က လူအင်အားလဲ ပို့ထားတယ်ဆိုတော့ ရိက္ခာကို လေယာဉ်နဲ့ဘဲ ချပေးနေရတယ်။ နေရာချဲ့လိုက်တာ။ အဲဒါကို ရဟတ်ယာဉ်ဆင်းသက်ဖို့၊ ပြီးတော့ ရိက္ခာ၊ လက်နက်တွေချ နိုင်ဖို့အတွက် နေအိမ်တွေကို မီးရှို့ဖျက်ဆီး လိုက်တာ။ ပြီးတော့ ပစ်ကွင်းအဖြစ် မြင်ကွင်းရှင်းအောင် သူတို့လုပ်တယ်။ အခု မီးရှို့တဲ့နေရာတွေမှာ သူတို့ ရှင်းထားတာ ရှိတယ်” ဟု ၎င်းက ဖေဖော်ဝါရီ ၇ ရက်နေ့တွင် ပြောသည်။
ထို့အပြင် အနန်းကွင်းကျေးရွာ၌ ယနေ့ထိ စစ်ကောင်စီက လူနေအိမ်များကို မီးရှို့နေဆဲဖြစ်သလို ရဟတ်ယာဉ် ဆင်းသတ်ရန် နေရာရှင်းထားပြီး အနီးဝန်းကျင်ပတ်ပတ်လည်တွင် မြေမြှုပ်မိုင်းများ ထောင်ထားသည်ဟု မြေပြင်အခြေအနေကို စောင့်ကြည့်နေသူ ကေအိုင်စီ သတင်းရင်းမြစ်က ပြောသည်။
ပြီးခဲ့သည့် ၂၀၂၄ ခုနှစ်အတွင်း အနန်းကွင်းဗျူဟာ စခန်းသိမ်းတိုက်ပွဲ ပြင်းထန်စွာ ဖြစ်ပွားခဲ့သည်။ စစ်ကောင်စီက ဗျူဟာမကျရေး ၃ ကြိမ်ခန့် စစ်ကူအင်အားပို့ဆောင်ခဲ့ပြီး တော်လှန်ရေးတပ်များနှင့် တိုက်ပွဲ ဖြစ်ပွားခဲ့ရာ သေဆုံး၊ ဒဏ်ရာရသူ အများအပြား ရှိခဲ့သည်။ လက်ရှိ အနန်းကွင်းဗျူဟာ စခန်းနှင့် အနီးဝန်းကျင်၌ စစ်ကောင်စီ အင်အား ၃၀၀ ဦးခန့် ရှိသည်ဟု မြေပြင်သတင်းရင်းမြစ်က ပြောသည်။
အဆိုပါ အနန်းကွင်းကျေးရွာတွင် လူနေအိမ် စုစုပေါင်း ၄၀၁ လုံးရှိကာ၊ အိမ်ထောင်စု ၄၃၄ စု၊ လူဦးရေစုစုပေါင်း ၂,၄၈၅ ဦး ရှိသည့် ကျေးရွာကြီး ဖြစ်သည်။ ပြီးခဲ့သည့် ၂၀၂၄ ခုနှစ် နှစ်ဆန်းပိုင်းမှစ၍ စစ်ရေးအရှိန်မြင့် တင်လာ သောကြောင့် ဒေသခံ နေရပ်မပြန်နိုင်သေးသလို ယနေ့အချိန်ထိ တိမ်းရှောင်နေကြရဆဲဖြစ်ကြောင်း သိရသည်။
