သြဂုတ်လ ၉ ရက်၊ ၂၀၂၃ ခုနှစ်။ ကေအိုင်စီ
မွန်ပြည်နယ် ဘီးလင်းမြို့နယ်ရှိ ရွှေရောင်ပြနှင့် ကျုံအိတ်တံတားကြားတွင် လမ်းမကြီးပေါ်ရေကျော်လာ သောကြောင့် မော်တော်ယာဉ်များ ဖြတ်သန်းသွားလာ၍မရတော့ကြောင်း ယာဉ်မောင်းသူများထံမှ သိရသည်။
အဆိုပါ လမ်းပိုင်းသည် ရန်ကုန်မှ ဖားအံ-မော်လမြိုင်စသည့်နေရာများသို့ အသွားအလာပြုလုပ်ရာတွင် အဓိကကျသည့်လမ်းပိုင်းဖြစ်ပြီး သြဂုတ်လ ၅ ရက်နေ့မှစ၍ ကားလမ်းမကြီးပေါ် ရေကျော်လာ သော်လည်း မော်တော်ယာဉ်များ သွားလာ၍ရနေသေးပြီး ယနေ့တွင် ရေပိုပြီးမြင့် တက်လာခြင်းကြောင့် မည်သည့်မော်တော်ယာဉ်များမဆို သွားလာ၍မရတော့ကြောင်း ယာဉ်မောင်း တစ်ဦးက ကေအိုင်စီသို့ ပြောသည်။
၎င်းက “မနေ့မနက်က ကျနော် ရန်ကုန်ပြန်တက်တုန်းက လမ်းကသွားလို့ရတယ်။ ညနေလူကြိုပြီး ပြန် ဆင်းလာတော့ မိုးကြီးပြီး ရေပိုများလာတော့ ဖြတ်ရတာအဆင်မပြေတော့ဘူး။ ကားကြီးတွေနဲ့ ကုန်ကား တွေတော့သွားရတယ်။ ၅ နာရီထဲက အဲ့ဒီရေလမ်းကိုဖြတ်တာ ၈ နာရီလောက်မှ ကုန်းလမ်း ရောက် တယ်။ တစ်ဘီးချင်းစီ လိမ့်ပြီးစမ်းမောင်းရတာဆိုတော့ အန္တရာယ်လည်းများတာပေါ့။ ဒါပေမယ့်လမ်း ကိုမမြင်ရတော့ ဒီလိုပဲထိန်းမောင်းရတယ်။ ဒီနေ့တော့ ဘယ်ကားမှ သွာလို့မရတော့ဘူး”ဟု ပြောသည်။
ထို့အပြင် ဘီးလင်းမြို့နယ်အတွင်းရှိ ရေကြီးရေလျှံမှုကြောင့် ကားလမ်းပိုင်းနစ်မြှုပ်မှုများရှိသလို နီးစပ်သည့်ကျေးရွာအတွင်းရှိ နေအိမ်များလည်း ရေနစ်မြှုပ်မှုဖြစ်ပေါ်နေကြောင်း ဘီးလင်း ဒေသခံတစ်ဦးကလည်း ယခုလို ပြောသည်။
“ကားလမ်းမနဲ့နီးတဲ့နေရာတွေတော့ ရေမြှုပ်ကုန်ပြီး။ ကယ်ဆယ်ရေးအဖွဲ့တွေကတော့ ဒီမနက်မြှုပ်တဲ့ အိမ်တွေမှာ လူကယ်ထုတ်ပေးနေတယ်။ မိုးကလည်းမတိတ်တော့ ရေလည်းဆက်တက် ရေစီးလည်း တော်တော်ကြမ်းနေတယ်။ ရပ်ကွက်အလိုက်တော့ ယာယီကယ်ဆယ်ရေး စခန်းဖွင့်ထားပေးတယ်”ဟု ၎င်းက ကေအိုင်စီသို့ပြောသည်။
မွန်ပြည်နယ်အတွင်းရှိ ပဲခူးမြစ်ရေသည် စိုးရိမ်ရေအမှတ်အဆင့်သို့ ရောက်ရှိနေပြီး နောက်တစ်ရက်တွင် လက်ရှိရေမျက်နှာပြင်ထက် ၂ ပေခန့်အထိ မြင့်တက်လာနိုင်သည်ဟု မိုးလေဝါသနှင့် ဇလဗေဒပြန်ကြား ရေဦးစီးဌာန၏ ယနေ့သြဂုတ်လ ၉ရက်နေ့၏ တိုင်းတာချက်အရ သိရသည်။
အလားတူ မိုးအဆက်မပြတ်ရွာသွန်းမှုနှင့် မြစ်ရေ၊ ချောင်းရေ မြင့်တက်လာမှုကြောင့် ကရင်ပြည်နယ်၊ မွန်ပြည်နယ်နှင့်စသည့်နေရာများတွင် လမ်းပိုင်းပျက်စီးမှု၊ မြေကြီးပြိုကျမှုများနှင့် နေအိမ်နစ်မြှုပ်မှုများ ဖြစ်ပေါ်လျက်ရှိသည်။
