အောက်တိုဘာ ၁၂ ရက်၊ ၂၀၂၂ ခုနှစ်။ ကေအိုင်စီ
ကော့ကရိတ်မြို့အရှေ့တောင်ဘက်ရှိ ကော့နွဲကျေးရွာထိပ်တွင် ပစ်ခတ်တိုက်ခိုက်မှုကြောင့် ထိခိုက်ပျက်စီးခဲ့ပြီး နှစ်လကြာ ပြုပြင်နိုင်ခြင်းမရှိသည့် လျှပ်စစ်မီးတိုင်များကို ယနေ့ အောက်တိုဘာလ ၁၂ ရက်နေ့၊ နေ့လည်တွင် ပြုပြင်၍ ပြီးစီးသွားပြီဖြစ်ကြောင်း ဒေသခံရွာသားများထံမှ သိရသည်။
မြ၀တီ-ကော့ကရိတ်အာရှ လမ်းသစ်လမ်းပိုင်းအတွင်း ပြီးခဲ့သည့် သြဂုတ်လ ၂၀ ရက်က အာဏာသိမ်းစစ်ကောင်စီ တပ်နှင့် ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတပ်များ နှစ်ဖက်တိုက်ပွဲ ဖြစ်စဉ်အတွင်း လက်နက်ကြီးအပြန်အလှန်ပစ်ခတ်မှုကြောင့် အံကလော်ရွာနှင့် ကော့နွဲကျေးရွာအကြား လျှပ်စစ်ပင်မဓါတ်အား တိုင် ၂၃၀ ကေဗွီဓါတ်တိုင် ၂ ခု ထိခိုက်ပျက်စီးသွားခဲ့ခြင်းဖြစ်သည်ဟု ဒေသခံများက ပြောသည်။
ကော့နွဲကျေးရွာဒေသခံတစ်ဦးက” စစ်ကောင်စီတပ်တွေ အင်အားအလုံးအရင်းနဲ့တက်လာပြီး လုံခြုံရေး ယူပေးတာလား၊ စစ်ဆင်ရေးလုပ်တာလားမသိဘူး မီးတိုင်ပြုပြင်တာအကြိမ်ကြိမ် မအောင်မြင်ဘူး။ နောက်မှ စစ်ကောင်စီမြို့ထဲဘက်ကိုပြန်နေတယ်။ အရပ်သားတွေသက်သက်လာပြင်တော့ လူကြီးတွေ ခွင့်ပြုလိုက်ပြီး ကြားတယ်။ ဒီနေ့ နေ့လည်တော့ပြုပြင်တာပြီးသွားပြီး “ဟု ကေအိုင်စီသို့ ပြောသည်။
အဆိုပါ ဓာတ်တိုင်များ ပျက်စီးခဲ့ခြင်းကြောင့် မြ၀တီ၊ ကော့ကရိတ်၊ ကြာအင်းဆိပ်ကြီးမြို့နယ် ၃ ခုနှင့် ကျေးရွာ ၃၀ ခန့် လျှပ်စစ်မီး ပြတ်တောက်မှုနှစ်လကြာဖြစ်ပွားခဲ့ပြီး ထိုဓာတ်တိုင် ၂ တိုင် ပျက်စီးသည့်ကိစ္စအား စစ်ကောင်စီလျှပ်စစ်ဌာနမှ ပြုပြင်ရန် လုပ်ဆောင်စဉ် တိုက်ပွဲထပ်မံဖြစ်ပွားသဖြင့် လျှပ်စစ်၀န်ထမ်း ၂ ဦးသေဆုံးပြီး ၄ ဦးဒဏ်ရာရှိခဲ့သေးသည်။
လက်ရှိတွင် ကော့နွဲကျေးရွာထိပ်နှင့် အံကလော်ကျေးရွာကြား ၎င်းလျှပ်စစ်မီးတိုင် ၂ တိုင်အား ပြန်လည်ပြုပြင်မှု ပြီးစီးသွားပြီဖြစ်၍ ကော့ကရိတ်နှင့် မြဝတီမြို့များတွင် ယနေ့ညသန်းခေါင်ယံ သို့မဟုတ် နံနက်ဖြန် အစောပိုင်းတွင် မီးပြန်လာမည်ဟု သတင်းများ ထွက်ပေါ်လျက်ရှိသည်။
