မေလ ၂၁ ရက်၊ ၂၀၂၂ ခုနှစ်။ ကေအိုင်စီ
မိုးအဆက်မပြတ် ရွာသွန်း၍ သောင်ရင်းမြစ်ရေ တိုးဝင်လာခြင်းကြောင့် မြဝတီမြို့ မြေနိမ့်ပိုင်းရပ်ကွက်များတွင် ရေကြီးရေလျှံမှုဖြစ်ပွားသည့်အ တွက် ပြည်သူအချို့ စာသင်ကျောင်းများတွင် ယာယီရွှေ့ပြောင်း နေထိုင်ကြရသည်ဟု သိရသည်။
မြဝတီမြို့နယ် အမှတ် ၃ ရပ်ကွက် ငှက်ပျောတောနှင့် ကျွန်းတောလမ်းများဘက်တွင် ယမန်နေ့ မေလ ၂၀ရက်မှ ယနေ့အချိန်ထိ မိုးသည်းထန်စွာ ရွာသွန်းမှုကြောင့် မြေအနိမ့်ပိုင်းရှိ စကိတ်ကွင်းအနောက်ဘက်ခြမ်း ရပ်ကွက်များတွင် အိမ်ခြေ ၇ အိမ်ခန့် နစ်မြှုပ်နေ၍ ရပ်ကွက်နေ ပြည်သူအချို့ နီးစပ်ရာစာသင်ကျောင်းများတွင် ရွှေ့ပြောင်းခိုလှုံနေကြရသည်ဟု ရေဘေးသင့် ပြည်သူတစ်ဦးက ပြောသည်။
၎င်းက” အိမ်တော့တော်တော်မြှုပ်သွားပြီ။ အောက်ထပ်မှာကလုံးဝမရတော့ဘူး ၊ ကျနော်တို့အိမ်နဲ့ အနောက်တန်းလျားတွေကအစမြှုပ်တယ်။ တန်းလျားကလူတွေကတော့ စာသင်ကျောင်းကိုပြောင်းသွားကြပြီး အခုအိမ်မှာ ရေက ပေါင်လောက်ရှိနေပြီ”ဟု ကေအိုင်စီသို့ ပြောသည်။
ထို့အတူ ယခုလို မိုးများဆက်တိုက်ရွာသွန်းမှုကြောင့် ကရင်ပြည်နယ်၊ မြဝတီမြို့တောင်ဘက် ဒေါနအရှေ့ဘက်ခြမ်းရှိ သောင်ရင်းမြစ်ကမ်းနံဘေးတစ်လျှောက်တွင် ခိုလှုံနေကြရသည့် သောင်းနှင့်ချီသော စစ်ဘေးရှောင်များသည်လည်း နေရာထိုင်ခင်းနှင့် စားရေးသောက်ရေး အခက်အခဲကြုံတွေ့နေရသည်ဟု စစ်ရှောင်ကူညီသူများထံမှ သိရှိရသည်။
