မတ်လ ၁၆ ရက် ၂၀၂၁ ခုနှစ်။ ကေအိုင်စီ
စစ်အုပ်ချုပ်ရေးကြေညာထားသော လှိုင်သာယာနှင့် ရွှေပြည်သာစက်မှုဇုန်များမှ အသင့်ချုပ်ပြီး CMP အထည်များ မြဝတီနယ်စပ်လမ်းကြောင်းမှတဆင့် ထိုင်းနိုင်ငံတွင်းသို့ ထပ်မံတင်ပို့လာနိုင်ဖွယ် မရှိတော့ကြောင်း နယ်စပ်အကောက်အခွန်အသိုင်းအဝိုင်းထံမှ သိရသည်။
ယမန်နေ့ မတ်လ ၁၅ ရက်နေ့က စစ်အုပ်ချုပ်ရေး ကြေညာထားသည့် ရန်ကုန်တိုင်း ၆ မြို့နယ်အနက် လှိုင်သာယာနှင့်ရွှေပြည်သာတို့ရှိ အထည်ချုပ်စက်ရုံများမှ အသင့်ချုပ်ပြီး CMP အထည်များကို ယခင်က မြဝတီနယ်စပ်မှတဆင့် ထိုင်းနိုင်ငံတွင်းသို့ ပို့ဆောင်မှုများရှိခဲ့သည်။
သို့သော် ယခုအခြေအနေတွင် အဆိုပါမြို့များမှ ရွှေ့ပြောင်းလုပ်သားများ သိန်းနှင့်ချီ၍ နေရပ်ပြန်နေပြီး အထည်ချုပ်စက်ရုံများတွင်လည်း မလည်ပတ်နိုင်တော့သည့် အခြေအနေကြောင့် မြဝတီနယ်စပ်မှတဆင့် ထိုင်းဘက်သို့ ထပ်မံပို့ဆောင်လာနိုင်ဖွယ် မရှိနိုင်တော့ကြောင်း ထိုင်း-မြန်မာ အမှတ် ၂ တံတား Cargo Gate မှ အကောက်အခွန် အရာရှိတစ်ဦးက သုံးသပ်ပြောဆိုသည်။
ပြီးခဲ့သည့် မတ်လ ၁၄ ရက်နေက လှိုင်သာယာ နှင့် ရွှေပြည်သာမြို့တို့တွင် စစ်အာဏာရှင်ဆန့်ကျင်ရေး ဆန္ဒပြပြည်သူများအား စစ်တပ်မှ ပစ်ခတ်ဖြိုခွင်းမှုကြောင့် လူ ၅ဝ ကျော်ခန့် သေဆုံးခဲ့ပြီး ယင်းမြို့ရှိ စက်မှုဇုန်များမှ အထည်ချုပ်စက်ရုံ အပါအဝင် စက်ရုံ ၅ ရုံခန့် မီးလောင်ကျွမ်းမှု ဖြစ်ခဲ့ကြောင်း သိရသည်။
