ဒီဇင်ဘာ ၂၂ရက်၊ ၂၀၁၉ခုနှစ်။ နန်းဝေဖြိုးဇာ
ကရင်လူငယ်ကွန်ရက်-KYN ၏ ရှေ့လုပ်ငန်းစဉ်များတွင် တစ်နိုင်ငံလုံးရှိကရင်လူငယ်များအားကိုယ်စားပြုနိုင်သည့် ကရင်လူငယ်မူဝါဒတစ်ခုရေးဆွဲသွားရန်ကိုဒီဇင်ဘာလ ၂ဝရက်နေ့က ကျင်းပပြီးစီးသွားခဲ့သည့် တစ်နိုင်ငံလုံးဆိုင်ရာကရင်လူငယ်တွေ့ဆုံပွဲတွင် ဆုံးဖြတ်ချက်ချလိုက်သည်ဟုသိရသည်။
ကရင်ပြည်နယ် လှှိုင်းဘွဲမြို့နယ် မဲဆမိတ်ကျေးရွာတွင် ဒီဇင်ဘာလ ၁၈ရက်နေ့မှ ၂ဝရက်နေ့အထိ အဆိုပါတွေ့ဆုံပွဲကိုကျင်းပခဲ့ကြရာပြည်နယ်၊ တိုင်းဒေသကြီးနှင့် အထက်မြန်မာပြည်ရှိဒေသအသီးသီးမှ ကရင်လူငယ်များတက်ရောက်ဆွေးနွေးခဲ့ကြပြီးယခုကဲ့သို့မူတစ်ခုဖော်ဆောင်ရန်ချမှတ်ဆုံးဖြတ်လိုက်ခြင်းဖြစ်သည်။
တစ်နိုင်ငံလုံးအတိုင်းအတာအမျိုးသားအဆင့် ကရင်လူငယ်အဖွဲ့ချိတ်ဆက်မှု တာဝန်ခံသူတစ်ဦးဖြစ်သူစဧရာဝင်းက “တချို့ကလူမျိုးစွဲဝါဒစွဲပြောကောင်းပြောလိမ့်မယ်။လူမျိုးတစ်မျိုးမှာဓလေ့ထုံးထမ်း၊ ယဉ်ကျေးမှုတွေ အသီးသီးရှိတဲ့အခါကျတော့ လွှမ်းခြုံပြီးယေဘုယျဆန်တဲ့ သဘောသဘာဝတွေ မူဝါဒတစ်ခုထဲရေးလို့မရဘူး။ကျနော်တို့ကရင်တွေကလည်းမတူညီတဲ့ဒေသမျိုးနွယ်စုတွေရှိတော့ အားလုံးကိုအတူတကွ ရေးဆွဲမယ်။ ဖြစ်သလိုရေးတာမဟုတ်ဘဲမဟာဗျူဟာကျကျသေသေချာချာရေးဆွဲဖို့ ဒီပွဲမှာမူအရချမှတ်တာဖြစ်တယ်။”ဟုကေအိုင်စီသို့ပြောသည်။
ကရင်လူငယ်ကွန်ရက်၏ ရှေ့လုပ်ငန်းစဉ်များတွင် ကရင်လူငယ်မူဝါဒရေးဆွဲရေးအပြင်နိုင်ငံရေးလုပ်ငန်းစဉ်တွင် လူငယ်များအနေနှင့် ကျရာအခန်းကဏ္ဍတွင်ပါဝင်ဆောင်ရွက်သွားရန်နှင့် ထိုသို့ဆောင်ရွက်ရာတွင် လူငယ်စွမ်းရည်မြှင့်တင်သည့် အခန်းကဏ္ဍများကိုကရင်လူငယ်ကွန်ရက်မှ တစိုက်မတ်မတ်ဆောင်ရွက်ရန်မူချမှတ်ထားမှုများရှိသည်ဟုစဧရာဝင်းက ဖြည့်စွက်ပြောဆိုသည်။
အဆိုပါကရင်လူငယ်တွေ့ဆုံပွဲတွင်မွန်၊ကရင်၊ကရင်နီ(ကယား)ပြည်နယ်များ၊တနသင်္ာရီ၊ ဧရာဝတီ၊ ရန်ကုန်၊ ပဲခူးတိုင်းဒေသ ကြီးများ၊ အထက်မြန်မာပြည်နှင့်နယ်စပ်ဒေသကိုယ်စားပြု စသည်ဖြင့်ဒေသအသီးသီးမှ ကရင်လူငယ် ၃၀၀ကျော်တက်ရောက် ပြီးကရင်လူငယ်များချိတ်ဆက်မှုပိုမိုအားကောင်းလာစေရေး၊ငြိမ်းချမ်းရေးလုပ်ငန်းစဉ်တွင် ပိုမိုသိလာစေရေးအပြင် ကရင်လူငယ်ကွန်ရက်၏လုပ်ငန်းစဉ်များပြန်လည်သုံးသပ်ခြင်းနှင့်ရှေ့လုပ်ငန်းစဉ် ဆွေးနွေးခြင်းများကို ပြုလုပ်ခဲ့ကြသည်။
ဧရာဝတီတိုင်းဒေသကြီးမှကရင်လူငယ်ကိုယ်စားလှယ်တစ်ဦးဖြစ်သည့် နန့်ချောစုခင်က “ကျမတို့ဒီပွဲမှာတက်ရောက်တာတစ်ယောက်နဲ့တစ်ယောက်မတူညီကြဘူး။တချို့ကနိုင်ငံရေး၊ ငြိမ်းချမ်းရေးအခြေအနေတွေကိုသိတဲ့လူငယ်တွေရှိသလိုမသိတဲ့လူငယ်တွေလည်းရှိတယ်။ ကျမတို့အနေနဲ့ကအတွေ့အကြုံလာယူသေးတဲ့ အဆင့်ပဲရှိပါသေးတယ်။ဒီလိုမျိုးလူငယ်များများတွေ့ဆုံပြီးမကြာခဏတွေ့ဆုံဆွေးနွေးပေးနိုင်ကြရင်ရှေ့ဆက်လုပ်ငန်းစဉ်တွေကိုအကောင်းဆုံးလုပ်ဆောင်သွားနိုင်မယ်လို့ကျမထင်ပါတယ်။”ဟုကေအိုင်စီသို့ပြောသည်။
သုံးရက်တာကျင်းပသည့် ၎င်းတွေ့ဆုံဆွေးနွေးပွဲတွင် လက်ရှိငြိမ်းချမ်းရေးဖြစ်စဉ်အခြေအနေများအပါအဝင်လာမည့် ၂၀၂ဝ ကရင်အမျိုးသား နိုင်ငံရေးအခြေအနေများနှင့်ပတ်သက်ပြီးကရင်နိုင်ငံရေးပါတီများဖြစ်သည့် KNP, KPP, PSDP, KNDP ပါတီများမှ လာရောက်ရှင်းလင်းခြင်းနှင့် ကရင်စာသင်ကြားပေးသည့်အခြေနေများကိုလည်းဆွေးနွေးခဲ့ကြသည်။
ကျင်းပပြုလုပ်ခဲ့သည့် ကရင်လူငယ်တွေ့ဆုံဆွေးနွေးပွဲကိုကရင်လူငယ်ကွန်ယက်-KYN က ဦးဆောင်ကျင်းပခဲ့ခြင်းဖြစ်ပြီးတိုင်းနှင့်ပြည်နယ်အသီးသီးရှိဒေသအလိုက် ကရင်လူငယ်ကွန်ယက် ချိတ်ဆက်တာဝန်ခံများနှင့် တစ်နိုင်ငံလုံးအဆင့် ကရင်လူငယ်ကွန်ရက် ချိတ်ဆက်တာဝန်ခံများကိုအဆိုပါကရင်လူငယ်တွေ့ဆုံပွဲတွင် အသစ်ထပ်မံရွေးချယ်ခဲ့ကြသည်။