ဇန်နဝါရီ (၃၀)ရက်၊ ၂၀၂၆ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ တပ်မဟာ(၁) သထုံခရိုင်၊ ကျိုက်ထို(ဘီးလင်းမြို့နယ်)၊ ဖိုးဝသိမ်စာသင်ကျောင်းကို ယမန်နေ့(ဇန်နဝါရီ ၂၉ရက်)က စစ်အုပ်စုဒရုန်းဗုံးကြဲတိုက်ခိုက်သဖြင့် ထိခိုက်ပျက်စီးမှုများပြားခဲ့ကြောင်း ဒေသခံများကပြောသည်။
သံတံတားဂိတ်အထိုင်ချ စစ်အုပ်စုက ယမန်နေ့ နေ့လည်(၁၂)နာရီဝန်းကျင်တွင် ဒရုန်းဗုံးသုံးလုံးဖြင့် ကြဲချတိုက်ခိုက်ခြင်းဖြစ်ပြီး ဗုံးနှစ်လုံးကျရောက်ပေါက်ကွဲခဲ့သည်ဟု သိရသည်။ ကျောင်းပိတ်ထားရသည့်ကာလဖြစ်သောကြောင့် ကျောင်းခေါင်မိုးနှင့်စာသင်ကျောင်းအဆောက်အဦးများ ထိခိုက်ပျက်စီးမှုများပြားသည်မှလွဲ၍ ထိခိုက်သူမရှိဟု ဘီးလင်းဒေသခံ အမျိုးသားတစ်ဦးကပြောသည်။
“အာဏာသိမ်းပြီးကတည်းက ကျောင်းပိတ်ထားတာ၊ ရွာမှာလည်းလက်နက်ကြီးအမြဲလိုလိုပစ်တော့ စစ်ဘေးရှောင်နေကြတယ်။ အဲဒါကြောင့်ထိခိုက်သွားတဲ့သူမရှိဘူး။ စာသင်ကျောင်းကတော့သွားကုန်ပြီး ကြေမွပျက်စီးကုန်တယ်” ဟု အဆိုပါအမျိုးသားကပြောသည်။
ဘီးလင်းမြို့နယ်အတွင်း အာဏာသိမ်းပြီးနောက် ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတော်လှန်ရေးတပ်များနှင့် စစ်အုပ်စုတို့ တိုက်ပွဲများဆက်တိုက်ရှိနေပြီး ယခုရက်ပိုင်းတွင်လည်း ရန်ကုန်-မော်လမြိုင်လမ်းဘေးကရွာများတွင် အင်အားတိုးချဲ့ထားသည်ဟုလည်း ကရင်စစ်ရေးသတင်းအရင်းအမြစ်မှ သိရသည်။
ထို့အပြင် တိုက်ပွဲမရှိသော်လည်း ကျေးရွာများဘက်ကို လက်နက်ကြီးပစ်ခတ်မှုကြောင့် ဖိုးဝသိမ်ရွာအပါအဝင် အနီးနားရှိ အလူးကျေးရွာအုပ်စုတွင် လနှင့်ချီစစ်ရှောင်နေရသလို တောင်ယာနှင့်ခြံအလုပ်ကောင်းစွာမလုပ်နိုင်ကြောင်း ဒေသခံများကပြောသည်။
ဖိုးဝသိမ်ကျေးရွာနှင့်အလူးကြီးကျေးရွာတို့တွင် ပြီးခဲ့သည့် ဇန်နဝါရီ(၂၆)ရက်နေ့ကလည်း ဘီးလင်းမြို့စစ်အုပ်စုမှပစ်ခတ်လိုက်သည့် လက်နက်ကြီးများကျရောက်ပေါက်ကွဲပြီး ဒေသခံထိခိုက်သေဆုံးမှုနှင့်စိုက်ခင်းအချို့ ပျက်စီးမှုဖြစ်ပွားခဲ့သေးကြောင်း ကေအဲန်ယူ သထုံခရိုင်ကထုတ်ပြန်ထားသည်။
