အောက်တိုဘာ ၂၂ ရက်၊ ၂၀၂၅ ခုနှစ်။ ကေအိုင်စီ
လက်ရှိ စစ်အာဏာရှင်အုပ်စုကို ဖျက်သိမ်းပြီး ဖက်ဒရယ်ဒီမိုကရေစီပြည်ထောင်စုတည်ဆောက်ရေး လူထုကြိုးပမ်းမှုကို ထောက်ပံ့ကူညီမှ အွန်လိုင်းအသုံးပြု ရာဇဝတ်မှုကျူးလွန် ခြင်းများနှင့် မြန်မာ့နိုင်ငံ ရေးအကြပ်အတည်းကို ဖြေရှင်းနိုင်မည်ဟု Justice for Myanmar-JFM က ပြောသည်။
မြန်မာ့နယ်စပ်ဆိုက်ဘာရာဇဝတ်မှုများတွင် စစ်အုပ်စုလည်းပါဝင်ပတ်သက်နေကြောင်း ယမန်နေ့(အောက်တိုဘာ ၂၁)ရက်နေ့က ထုတ်ပြန်ချက်တွင် စစ်တပ်ဖျက်သိမ်းရေး၊ မြန်မာ့ဒီမိုကရေစီခရီးတွင်ကျယ်ရေးအတွက် ကူညီပေးရန် အာဆီယံနှင့်နိုင်ငံတကာအသိုင်းအဝိုင်းကို JFM က တိုက်တွန်းလိုက်ခြင်းလည်းဖြစ်သည်။
အောက်တိုဘာလ (၁၉)ရက်နေ့က မြဝတီနယ်စပ်ရှိ ဆိုက်ဘာရာဇဝတ်မှုလုပ်ဆောင်နေသည့် KK Park ကို ဝင်ရောက်၍ စတားလင့်ခ်စက်များအပါအဝင် အလုပ်သမား နှစ်ထောင်ကျော်ကို ဖမ်းမိခဲ့သည်ဟု စစ်အုပ်စုက ၎င်းထိန်းချုပ်ထားသော နိုင်ငံပိုင်မီဒီယာမှ ကြေညာသွားသည်။
သို့သော် JFM ၏ ထုတ်ပြန်ချက်တွင် KK Park အပါအဝင် နိုင်ငံဖြတ်ကျော်ရာဇဝတ်စီးပွားရေးလုပ်ငန်းများကို နယ်ခြားစောင့်တပ်-BGF အပါအဝင် ရာဇဝတ်ကုမ္ပဏီများနှင့်ပူးပေါင်းကာ အကျိုးအမြတ်ရှာဖွေနေသော စစ်အုပ်စု၏ ထိုလုပ်ရပ်မှာ အာဆီယံထိပ်သီးအစည်းအဝေးမတိုင်ခင် အချိန်ကိုက်အယောင်ပြ လုပ်ရပ်ဖြစ်သည်ဟု ဆိုသည်။
အာဆီယံဒေသတွင်းသတင်းများအရ မလေးရှားနိုင်ငံ ကွာလာလမ်ပူမြို့တွင် လာမည့် အောက်တိုဘာ ၂၆ မှ ၂၈ ရက်နေ့အထိ (၄၇) ကြိမ်မြောက်သော အာဆီယံထိပ်သီးအစည်းအဝေးကို ကျင်းပသွားမည်ဖြစ်ပြီး ထိုအစည်း အဝေးသို့ အမေရိကန်သမ္မတ ဒေါ်နယ်ထရမ့်လည်းတက်ရောက်မည်ဖြစ်ကြောင်း သိရသည်။
အမေရိကန်နှင့်ဗြိတိန်ဘက်က ကျားဖြန့်နှင့်လူမှောင်ခိုကိစ္စများနှင့် စပ်လျဥ်းပြီး တာဝန်ရှိသူများကို အရေးယူပိတ်ဆို့မှုများ လုပ်ခဲ့ခြင်းကြောင့် ထိုရာဇဝတ်မှုများတွင် ပတ်သက်နေသည့် စစ်အုပ်စုနှင့်အပေါင်းအပါများက အာရုံပြောင်းလှည့်စားနေခြင်းဖြစ်သည်ဟု JFM က ဆိုသည်။
စစ်တပ်ကသာ နေရပ်ရွှေ့ပြောင်းနေထိုင်ရသူ(IDP)များ ပိုမိုတိုးပွားစေ၍ အိမ်နီးချင်းနိုင်ငံများအထိ စီးပွားရေးအကြပ်အတည်းဖြစ်စေသည့် အဓိကတရားခံဖြစ်သည်။ အာဏာသိမ်းပြီးနောက်တွင်လည်း အာဆီယံကပေးထားသည့် နိုင်ငံရေးတရားဝင်မှု အမှားကြောင့် အပြစ်ပေးအရေးယူခံရမှုမှ ကင်းလွတ်ကာ နယ်စပ်ဖြတ်ကျော်ရာဇဝတ်မှုများကိုပါ ပိုမိုဆိုးရွားစေကြောင်း ထောက်ပြသွားသည်။
ထို့ကြောင့် အာဆီယံအစိုးရများအနေဖြင့် အစည်းအဝေးတွင် စစ်အုပ်စု၏ရွေးကောက်ပွဲကိုဆန့်ကျင်၍ ၎င်း၏ အထောက်အပံ့များကို ဖြတ်တောက်ပြီး ကျူးလွန်ထားသမျှတာဝန်ခံစေရန် လုပ်ဆောင်ရမည်ဟု JFM က တပါတည်းတိုက်တွန်းထားသည်။
စစ်အုပ်စုက KK Park မှအကျိုးအမြတ်ကို ၎င်းတို့နှင့်တိုက်ပွဲဖြစ်နေသည့် ကေအဲန်ယူက ခံစားခွင့်ရနေကြောင်း စွပ်စွဲထားသည်။ အမေရိကန်နှင့်အီးယူထံမှ အဆိုပါ ရာဇဝတ်မှုများနှင့်ပတ်သက်ပြီး အရေးယူခံထားရသော BGF နှင့်မူ အပြန်အလှန်ဆက်ဆံရေးရှိနေသည်ဟု JFM အပါအဝင် ကရင်ပြည်နယ်အရေး လေ့လာသုံးသပ်သူများက ထောက်ပြကြသည်။
