ဩဂုတ် ၂၈၊ ၂၀၂၅ ခုနှစ်။ ကေအိုင်စီ
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်၊ ပေါင်းလောင်းမြို့ သစ်၊ သပြေကုန်းအုပ်စု ဧဒင်ရွာ၌ ဩဂုတ် ၂၇ ရက်နေ့၊ နံနက် ၂ နာရီ ဝန်းကျင်တွင် မိုးများပြီး တောင်ပြို၍ လူ ၂ ဦး သေဆုံးပြီး နေအိမ်များ ပျက်ဆီးသွားသည်ဟု ဒေသခံများထံမှ သိရသည်။
ကဂျိကိ မုန်တိုင်းအရှိန်ကြောင့် ပေါင်းလောင်းမြို့သစ်တွင် ဩဂုတ် ၂၆ ရက်နေ့ ညပိုင်းမှစ၍ မိုးသည်း ထန်စွာ ရွာသွန်းပြီး ၂၇ ရက်နေ့ နံနက် ၂ နာရီ ဝန်းကျင်အချိန်တွင် တောင်ပြိုပြီး ကျေးရွာထဲသို့ နှုန်းမြေများကျလာကာ လူနေအိမ်များ ထိခိုက်ပျက်ဆီးသွားခြင်း ဖြစ်သည်ဟု ကရင်ဖြူလူငယ်တစ်ဦးက ပြောသည်။
“ဖြစ်စဉ်က ညပိုင်းမှာ မိုးဆက်တိုက် ရွာတယ်။ တစ်ညလုံးဘဲ နံနက်ပိုင်း ၂ နာရီဝန်းကျင်ရောက်တော့ တောင်ပြို ကျပြီး ဝုန်းကနဲဆို ရွာထဲအရှိန်ထိုး ဝင်လာပါတယ်။ အိမ်လုံးကျွတ် ပါသွားတာ ရှိတယ်။ တချို့ အိမ်တွေကတော့ သဲ၊ နှုန်း၊ ဒိုက်တွေ တင်တော့ လူနေမရသေးဘူး “ဟု ၎င်းက ကေအိုင်စီသို့ ပြောသည်။
တောင်ပြိုကျမှုကြောင့် ၅၄ နှစ်အရွယ် အမျိုးသမီး တစ်ဦး၊ ၂၂ အရွယ် လူငယ် အမျိုးသားတစ်ဦး သေဆုံးပြီး ဒဏ်ရာ ပြင်းထန်သူ ၂ ဦးရှိသည့်အပြင် အနည်းငယ်ဒဏ်ရာရရှိသူ ၁၃ ဦး ရှိကြောင်းလည်း သိရသည်။
ရုတ်တရက်တောင်ပြိုသည့် အရှိန်ကြောင့် လူနေအိမ် (၅)လုံးသည် နှုန်း၊ ဒိုက်များနှင့်အတူ မျှောပါ သွားကာ တစ်ဝက် နီးပါး ပျက်ဆီးသွားအိမ်တစ်ချို့ရှိကာ စုစုပေါင်း လူနေအိမ် ၁၅ လုံး ပျက်ဆီးသွားသည်ဟု ဒေသခံ များထံမှ သိရသည်။
တောင်ပြိုမှု ဖြစ်ပွားခဲ့သည့် ပေါင်းလောင်းမြို့သစ်၊ သပြေကုန်း ကျေးရွာအုပ်စု ဧဒင်ကျေးရွာတွင် လူနေအိမ် စုစုပေါင်း အလုံး ၁၀၀ ခန့်ရှိကာ ကရင်ဖြူ၊ ကယန်း၊ ဗမာလူမျိုးများ ရောနှောနေထိုင်သည့် ကျေးရွာ တစ်ရွာ ဖြစ်ကြောင်း ဒေသခံများက ပြောသည်။
