ဇူလိုင် ၈၊ ၂၀၂၅ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ မြိတ်-ထားဝယ် ခရိုင်၊ တပ်မဟာ(၄)နယ်မြေ၊ ထိုင်း-မြန်မာ နယ်စပ်ရှိ စစ်ကောင်စီ သုခနယ်စပ်စခန်းကို ယမန်နေ့ ဇူလိုင် ၇ ရက်နေ့တွင် ကရင်အမျိုးသား လွတ်မြောက်ရေးတပ်မတော်-KNLA၊ မဟာမိတ်တပ်များက တိုက်ခိုက်သိမ်းယူနိုင်ခဲ့သည်ဟု တပ်မဟာမှူး ဗိုလ်မှူးချုပ် စောဖိုးလေးက အတည်ပြု ပြောသည်။
အဆိုပါ သုခစစ်ကောင်စီတပ်စခန်းသည် ထီးခီးနယ်စပ်၏ မြောက်ဘက်တွင် တည်ရှိပြီး တပ်စခန်းတွင် စစ်ကောင်စီ ခြေလျင်တပ်ရင်း (ခလရ-၂၈၂) တပ်ဖွဲ့ဝင် အင်အား (၃၀) ခန့် အခြေချတပ်စွဲ ထားခြင်း ဖြစ်သည်။
“သုခစခန်းကို တိုက်ခိုက်သိမ်းယူတာ မနေ့က မွန်းတည့်အချိန်လောက်မှာ ရသွားတယ်။ အဲဒါအတည်ပြုလို့ ရပါတယ်။ နှစ်နိုင်ငံ နားလည်မှုယူပြီး စစ်ကောင်စီတပ်ဖွဲ့တွေက ထိုင်းဘက်ကို ထွက်ပြေးသွားတယ်။ ကျန်တာတော့ ကျနော်တို့ ဆက်လုပ်နေတယ်” ဟု ၎င်းက ကေအိုင်စီသို့ ပြောသည်။
၂၀၂၅ ခုနှစ်အတွင်း ထီးခီးနယ်စပ်တွင် စစ်ကောင်စီတပ်စခန်းများဖြစ်သည့် ထီးခီးစခန်း၊ ထီးထာဗျူဟာ ကုန်းစခန်း၊ အီးသာခေ(ဗောဓိ)စခန်းနှင့် ငါးရံ့နီစခန်း တို့ကိုလည်း KNLA နှင့်တော်လှန်ရေးပူးပေါင်းတပ် ဖွဲ့တို့က တိုက်ခိုက်သိမ်းပိုက်ခဲ့ပြီး ဖြစ်သည်။ ထို့ကြောင့် လက်ရှိ အဆိုပါ ထီးခီးနယ်စပ်တစ်လျှောက်နီးပါးကို KNU က ထိန်းချုပ်ထားနိုင်ပြီး ဖြစ်သည်။
စစ်ကောင်စီဘက်မှလည်း ထီးခီးနယ်စပ်ကို ပြန်လည် ရယူနိုင်ရန်အတွက် မေတ္တာမြို့ကို စစ်ကြောင်း တစ်ကြောင်း ရောက်ရှိလာသလို မောတောင်နယ်စပ်ဘက်သို့ သွားရန် သီခိုကျေးရွာထဲသို့ စစ်ကြောင်း တစ်ကြောင်း ရောက်ရှိနေသည်ဟု နယ်မြေခံ KNLA စစ်ရေးသတင်းအရင်းအမြစ်ထံမှ သိရသည်။
