ဇန်နဝါရီလ ၂ ရက်၊ ၂၀၂၃ခုနှစ်။ ကေအိုင်စီ
KNU-ကရင်အမျိုးသားအစည်းအရုံး ဒူးပလာယာခရိုင် ဝင်းရေးမြို့နယ်(ကြာအင်းဆိပ်ကြီးမြို့နယ်) တောင်စွန်းကျေးရွာတွင် ၃ ရက်ဆက်တိုက် လေကြောင်းတိုက်ခိုက်မှုကြောင့် ဒေသခံ အရပ်သား ၃,၀၀၀ ကျော် စစ်ဘေးတိမ်းရှောင်နေကြရသည်ဟု သိရသည်။
အဆိုပါ တောင်စွန်းရွာတိုက်ပွဲအတွင်း စစ်ကောင်စီက စစ်သုံးလေယာဥ်အကြိမ် ၂၀ နီးပါ လာရောက်ဗုံးကြဲတိုက်ခိုက်သည့်အတွက် အနန်းကွင်း၊ ဆင်ပြေး၊ ၀င်းခန ၊ တောင်စွန်းနှင့် ကျောက်ဘီလူး စသည့်ကျေးရွာများမှ ဒေသခံများသည် အသက်ဘေးလွတ်ရာနေရာများသို့ ထွက်ပြေးတိမ်းရှောင်ရပြီး လက်ရှိတွင် နေရာထိုင်ခင်းနှင့် အစားအသောက်ရရှိရေး ခက်ခဲနေလျက်ရှိသည်ဟု စစ်ရှောင်သူများထံမှ သိရသည်။
တောင်စွန်းကျေးရွာတွင် KNU -ကရင်အမျိုးသားအစည်းအရုံး တပ်ရင်း ၁၆ နှင့် စစ်ကောင်စီတို့ ၂၀၂၂ ခုနှစ် ဒီဇင်ဘာလ ၃၁ ရက်နေ့ ညမှ ယနေ့ ဇန်နဝါရီ ၂ ရက်နေ့အထိ နှစ်ဖက်တိုက်ပွဲ ပြင်းထန်နေဆဲဖြစ်ပြီး လေယာဥ်ဗုံးကြဲတိုက်ခိုက်မှုကြောင့် တောင်စွန်းရွာရှိ လူနေအိမ်အများအပြားလည်း ထိမှန်ပျက်စီးခဲ့သည်ဟု သိရသည်။
