Home သတင်း KNU စစ်ဆေးရေးဂိတ်တစ်ခုနှင့် လူနေအိမ်တစ်လုံးကို စစ်ကောင်စီတပ်ဖွဲ့ မီးရှို့ဖျက်ဆီးခဲ့

KNU စစ်ဆေးရေးဂိတ်တစ်ခုနှင့် လူနေအိမ်တစ်လုံးကို စစ်ကောင်စီတပ်ဖွဲ့ မီးရှို့ဖျက်ဆီးခဲ့

274
Photo: KNLA

အောက်တိုဘာ ၂၃ ရက်၊ ၂၀၂၁ခုနှစ်။ ကေအိုင်စီ

ကေအဲန်ယူ-ကရင်အမျိုးသားအစည်းအရုံး သထုံနှင့် ဘီးလင်းမြို့နယ်နှစ်ခုအကြားရှိ ကေအဲန်ယူ တပ်မဟာ ၁ စစ်ဆေးရေးဂိတ်တစ်ခုနှင့် လူနေအိမ်တစ်လုံးကို စစ်ကောင်စီတပ်ဖွဲ့ဝင်များက မီးရှို့ဖျက်ဆီးခဲ့သည်ဟု ဒေသတွင်း သတင်းအရင်းအမြစ်များထံမှ သိရသည်။

ပြီးခဲ့သည့် အောက်တိုဘာလ ၂၁ ရက်နေ့ မွန်းလွဲပိုင်းတွင် လေးကေ-ဝင်းတာပန်မှ ပိန္နဲတောသို့ ပြန်လာသည့် စစ်ကောင်စီ၏ စစ်ဆင်ရေးကွပ်ကဲမှုဌာနချုပ် စကခ(၈) လက်အောက်ခံ ခြေမြန်တပ်ရင်း ခမရ ၄၀၆ နှင့် နယ်ခြားစောင့်တပ် -BGF ပူးပေါင်းတပ်ဖွဲ့တို့သည် သထုံ-ဘီးလင်းမြို့နယ်စပ်ကြားတွင် ကရင်အမျိုးသားလွတ်မြောက်ရေး တပ်မတော် (KNLA ) တပ်မဟာ ၁နှင့် ပစ်ခတ်မှုနှစ်ကြိမ်ဖြစ်ပွားခဲ့သည်။

ထိုသို့ ပစ်ခတ်မှုဖြစ်ပွားပြီးနောက် ၎င်းစစ်ကောင်စီ ပူးပေါင်းတပ်ဖွဲ့သည် ဘီးလင်းမြို့နယ်ထဲရှိ ဘီးလင်း-သထုံ ကားမဲစစ်ဆေးရေးဂိတ်(ဒေသအခေါ် နဂါးဂိတ်)နှင့် သထုံမြို့နယ်ဘက်ရှိ လူနေအိမ်တစ်အိမ်ကို ဝင်ရောက်မီးရှို့ဖျက်ဆီးလိုက်ခြင်းဖြစ်သည်ဟု ကေအဲန်ယူ သထုံမြို့နယ် တာဝန်ရှိသူတစ်ဦးက ပြောသည်။

“မွန်းလွဲ ၂ နာရီခွဲလောက်မှာ ကားမဲစစ်ဆေးရေးဂိတ်မှာ တစ်ကြိမ်၊ လားခိုးနေရာမှာတစ်ကြိမ် ပစ်ခတ်မှု ၂ ကြိမ်ဖြစ်တယ်။ ပစ်ခတ်မှုဖြစ်ပြီးတဲ့နောက်မှာ စစ်ဆေးရေးဂိတ်ကို သူတို့ဝင်မီးရှို့လိုက်တယ်။ ပြီးတော့ သထုံဘက်က မောကလိုးရွာက အိမ်တစ်အိမ်ကိုလည်း မီးရှို့ပစ်လိုက်တယ်။ မီးရှို့ခံရတဲ့အိမ်ကလည်း မုဆိုးမအိမ်ဆိုတော့ တဲသာသာရှိတဲ့ အိမ်ဖြစ်တယ်။ တိုက်ပွဲဖြစ်တော့ အိမ်ရှင်က ပြေးပြီလေ။ အိမ်မှန်း သူတို့လည်း သိကြပါတယ်။” ဟု ကေအိုင်စီသို့ ယနေ့တွင် ပြောသည်။

အဆိုပါ ပစ်ခတ်မှုတွင် စစ်ကောင်စီတပ်ဘက်မှ ၄ ဦးကျဆုံးပြီး ၅ ဦးခန့် ထိခိုက်ဒဏ်ရာရရှိခဲ့သည်ဟု ကနဦး သတင်းရရှိထားပြီး ၎င်းတို့ KNLA ဘက်တွင် စစ်ရေးဂိတ်တစ်ခု မီးရှို့ဖျက်ဆီးခံရမှုမှလွဲ ထိခိုက်ကျဆုံးမှုမရှိကြောင်း ၎င်းကေအဲန်ယူ သထုံမြို့နယ် တာဝန်ရှိသူက ပြောသည်။

ပစ်ခတ်မှုဖြစ်ပွားပြီးနောက် အဆိုပါ စစ်ကောင်စီတပ်နှင့် BGF ပူးပေါင်းတပ်ဖွဲ့ဝင်အချို့သည် ပိန္နဲတောစစ်စခန်းသို့ ပြန်လည်ဝင်ရောက်သွားသလို တပ်ဖွဲ့ဝင်အချို့မှာ အနီးအနား ကျေးရွာများရှိ ဘုန်းကြီးကျောင်းများတွင် ဝင်ရောက် ခိုအောင်း၊ နေရာယူထားမှုများရှိသည်ဟု သိရသည်။