မေ ၂ ရက်၊ ၂၀၂၁ ခုနှစ်။ ကေအိုင်စီ
ကရင်ပြည်နယ် ဖားအံမြို့နယ် အိန္ဒုကျေးရွာတွင် ယနေ့ (မေ ၂ ရက်) နံနက်တွင် ကမာ္ဘလုံးဆိုင်ရာ မြန်မာ့နွေဦးတော်လှန်ရေး သပိတ်စစ်ကြောင်းထွက်ရန်အတွက် ကျေးရွာဘောလုံးကွင်းအနီးတွင် လူငယ်များလူစုနေစဉ် အရပ်ဝတ်လူ ၄ ဦးမှ သေနတ်ဖောက်ပြီး လာရောက်ဖြိုခွင်းခဲ့သည်ဟု သိရသည်။
သပိတ်စစ်ကြောင်း ထွက်ရန်အတွက် လူစုသည့်နေရာအနီး နံနက် ၈ နာရီဝန်းကျင်ခန့်တွင် အရပ်ဝတ်လူ ၄ဦးမှ အိမ်စီးကား ဖြင့်ရောက်လာပြီး လူစုခွဲရန် သေနတ်ပစ်ဖောက်သည့်အတွက် လူငယ်များလူစုခွဲရပြီး ဆိုင်ကယ် အမြောက်အမြားလည်း လူစုရာနေရာတွင် ကျန်ခဲ့သည်ဟု သပိတ်တွင် ပါဝင်သည့် လူငယ်တစ်ဦးထံမှသိရသည်။
“ သေနတ်ပစ်ဖောက်တော့ အကုန်ပြေးရတယ်။ တစ်ချို့က ဆိုင်ကယ်ယူနိုင်တယ် တစ်ချို့က ယူမအားတော့ဘူး ပြေးနေရတယ်။ သူတို့က အိမ်စီးကားနဲ့ လာတော့ မသိရဘူး။ ကိုယ်တွေမသိတဲ့ အိမ်စီးကားနဲ့ ဘယ်နှစ်ဦးတောင်ပါလာလဲတော့မသိဘူး။ ကျန်တဲ့ ဆိုင်ကယ်တွေကို အခု သူတို့ကားနဲ့လာသယ်သွားလိုက်ပြီး” ဟု ကေအိုင်စီသို့ပြောသည်။
အဆိုပါနေရာတွင် ထွက်ပြေးနေရသည့် လူငယ်များ ကျန်ခဲ့သည့် ဆိုင်ကယ် အစီး ၃၀ကျော်ကို အရပ်ဝတ်နှင့် လူမှကား ၂ စီးဖြင့် လာရောက်သယ်ဆောင်သွားကာ အိန္ဒုရဲစခန်းတွင် သိမ်းယူထားလိုက်သည်ဟု သိရသည်။
စစ်အာဏာရှင် ဆန့်ကျင်သပိတ်မှောက်သည့်အနေဖြင့် အိန္ဒုသပိတ်စစ်ကြောင်းသည် မကြာခဏ ထွက်ပြီး ဆန္ဒထုတ်ဖော်ကြကာ စစ်ကောင်စီဘက်မှ အဖမ်းအဆီးများ ပြုလုပ်သည့် နောက်ပိုင်းတွင် ၎င်းသပိတ်စစ်ကြောင်းသည် မြို့ပေါ်မတက်တော့ ဘဲ ပုံစံပြောင်းပြီး ကျေးရွာများတွင် သွားရောက်ဆန္ဒ ထုတ်ဖော်မှုလည်းရှိသည်ဟု သိရသည်။
ယနေ့ မေလ ၂ရက်နေ့တွင် ကမာ္ဘလုံးဆိုင်ရာ မြန်မာ့ နွေဦးတော်လှန်ရေးနေ့ အဖြစ် သတ်မှတ်ပြီး အဖမ်းအဆီးများရှိသော်လည်း နေရာဒေသအသီးသီးတွင် စစ်အာဏာရှင်ဆန့်ကျင်သည့် သပိတ်စစ်ကြောင်း များ ပြန်လည်ချီတက်ပြီး တော်လှန်နေကြသည်ဟုသိရသည်။
