ဇန်နဝါရီလ ၂၇ ရက်၊ ၂၀၂၁ ခုနှစ်။ စဖန်းရှောင်း
ဒေသတွင်း စစ်ရေးပဋိပက္ခများဖြစ်ပွားလာမည်ကို စိုးရိမ်မှုများဖြစ်ပေါ်နေသည့် ဘီးလင်းမြို့နယ်အတွင်းရှိ ဒေသခံ တစ်ထောင်ကျော်မှ ယနေ့ဇန်နဝါရီလ ၂၇ ရက်နေ့ နံနက်ပိုင်းက ကြွေးကြော်သံများဖြင့် စီတန်း လှည့်လည်ပြီး ဒုတိယအကြိမ်မြောက် ဆန္ဒထုတ်ဖော်ခဲ့ကြသည်ဟုသိရသည်။
ပြီးခဲ့သည့် ဒီဇင်ဘာလဆန်းပိုင်းက KNU -ကရင်အမျိုးသားအစည်းအရုံး တပ်မဟာ ၁ နယ်မြေများအတွင်း အစိုးရတပ်မတော်နှင့် KNU တို့အကြား ဖြစ်ပွားခဲ့သည့် တင်းမာမှုများမှတစ်ဆင့် နောက်ဆက်တွဲဖြစ်ပေါ် လာနိုင်သည့် အခြေအနေများကြောင့် ယခုလိုဆန္ဒထုတ်ဖော်ရခြင်းဖြစ်ကြောင်း ဆန္ဒထုတ်ဖော်သူများ ကပြောဆိုသည်။
ဆန္ဒထုတ်ဖော်ရာတွင် ပါဝင်သည့် ဒေသခံဖြစ်သူစောအယ်ဒိုက “ ဒီဇင်ဘာလကနေစပြီး ဒီဒေသမှာ စစ်ဖြစ်ဖို့အလားအလာတွေ တွေ့နေရတယ်။ ဒေသခံတွေကလည်း အဲဒီအပေါ်မှာ ညဘက်အိပ်မရဲဘူး၊ ရှောင် ပြေးနေရတယ်။ ဒီအခြေအနေတွေအပေါ်မှာ ပြည်သူတွေက စစ်ဖြစ်မှာကိုစိုးရိမ်နေကြတယ်။ ဒီလိုစိုး ရိမ်ကြောက်လန့်မှုတွေမဖြစ်အောင် အထက်က နှစ်ဖက်လူကြီးတွေ ညှိနှိုင်းဖြေရှင်းပေးကြဖို့နောက်ပြီး ကျနော်တို့ငြိမ်းချမ်းမှုကိုလိုချင်လို့ အခုလို ဆန္ဒထုတ်ဖော်တာဖြစ်တယ်” ဟုပြောသည်။
ယနေ့ပြုလုပ်သည့် ဆန္ဒထုတ်ဖော်မှုတွင် KNU -ကရင်အမျိုးသားအစည်းအရုံး ဘီးလင်းမြို့နယ်အတွင်းရှိ ကျသောင်းဆိပ်ကျေးရွာအုပ်စုမှ ၄ ရွာ၊ ပျဉ်းမပင်ဆိပ်ကျေးရွာအုပ်စုမှ ၆ ရွာ၊ မင်းဇောကျေးရွာအုပ်စုမှ ၂ ရွာ ၊ စုစုပေါင်း ၁၂ ရွာမှ ဒေသခံ ၁,၄၀ဝ ကျော်ပါဝင်သည်ဟုလည်း ဦးဆောင်သူများထံမှသိရသည်။
ထိုသို့ဆန္ဒထုတ်ဖော်ရာတွင် NCA စာချုပ်ပါအချက်များအား အကောင်အထည်ဖော်ရေးအပါအဝင် အောက်ခြေ တွင်ဖြစ်ပေါ်နေသည့် ပဋိပက္ခများအားအစိုးရမှ ညှိနှိုင်းဖြေရှင်းရေး၊ နိုင်ငံရေးပြဿနာကို နိုင်ငံရေး နည်းဖြင့်ဖြေရှင်းရေး ဒေသတွင်းလက်နက်ကိုင်ပဋိပက္ခများ၊ ကျေးရွာအတွင်း တပ်စွဲထားသည့် တပ်စခန်း များအား အလိုမရှိစသည့်အချက် ၆ ချက်ဖြင့် ကြွေးကြော်သံများဖြင့် စီတန်းလှည့်လည်ပြီး ဆန္ဒထုတ်ဖော်ခဲ့ကြသည်ဟုလည်းသိရသည်။
ပြီးခဲ့သည့် ဒီဇင်ဘာလ ၂၂ ရက်နေ့က KNLA တပ်မဟာ ၁ နယ်မြေ KNDO တပ်ရင်းမှူးတစ်ဦးမှ ကျသောင်းဆိပ်ရွာ ဘုန်းကြီးကျောင်းဝင်းတွင် တပ်စွဲထားသည့် မြန်မာ့တပ်မတော်တပ်စခန်းတစ်ခုအား ဒီဇင်ဘာလကုန်တွင် ဆုတ်ပေးရန်အကြောင်းကြားမှုများဖြစ်ပေါ်ခဲ့ပြီးနောက် ဇန်နဝါရီ ၂ ရက်နေ့တွင် နှစ်ဖက် ပစ်ခတ်မှုအနည်းငယ်ဖြစ်ပွားခဲ့သည်ဟု ဒေသခံများက ပြောသည်။
အဆိုပါ အခြေအနေများကြောင့် သွားလာကန့်သတ်ပိတ်ပင်မှုများ ရှိခဲ့သလိုစိုးရိမ်ထိတ်လန့်မှုများကြောင့် မိမိတို့နေအိမ်တွင် ညမအိပ်ရဲဘဲ တောထဲပြေးလွှားပုန်းရှောင်နေရသည့် အခြေအနေများဖြစ်ပေါ်ခဲ့သည်ဟု လည်းဒေသခံများ၏ပြောပြချက်များအရသိရသည်။
ပြီးခဲ့သည့် ဇန်နဝါရီလ ၂၄ ရက်နေ့ကလည်း ဘီးလင်းမြို့နယ်အတွင်းရှိ တာအူခီးကျေးရွာအပါအဝင် ကျေးရွာပေါင်း ၂ဝ ကျော်၊ ဒေသခံစုစုပေါင်း နှစ်ထောင်ကျော်မှ ယနေ့ပြုလုပ်သည့် ဆန္ဒထုတ်ဖော်မှုနှင့် အလားတူဆန္ဒထုတ်ဖော်မှုတစ်ခု ပြုလုပ်ခဲ့သည်။
