ဧပြီ ၃ ရက်၊ ၂၀၂ဝ ပြည့်နှစ်။ နေနော်
ထိုင်းနိုင်ငံအစိုးရမှ ယမန်နေ့ (ဧပြီ ၂ရက်နေ့)က ညမထွက်ရ အမိန့် ထုတ် ပြန်လိုက်ပြီးနောက် ထိုင်း-မြန်မာနယ်စပ် ကရင်ပြည်နယ် မြဝတီမြို့ အမှတ်(၂)တံတားမှ တဆင့် မြန်မာနိုင်ငံသို့ နေရပ်ပြန်မြန်မာ လုပ်သား ဝင်ရောက်မှု မရှိသလောက်နည်းပါးသွားကြောင်း သိရသည်။
ထိုင်းအစိုးရ၏ ယမန်နေ့ ဧပြီလ ၂ ရက်နေ့က ထုတ်ပြန်သည့် Covid-19 ကူးစက်ပြန့်ပွားမှုထိန်းချုပ်ရေး အရေးပေါ်အမိန့်ကြောင့် ယနေ့ ဧပြီလ ၃ ရက်နေ့ နေ့လည်ပိုင်းအထိတွင် ပုံမှန်ပြန်နေကျ ထိုင်းပြန် မြန်မာလုပ်သား ဝင်ရောက်လာခြင်း မရှိတော့ကြောင်း မြဝတီခရိုင် အုပ်ချုပ်ရေးမှူး ဦးတေဇာအောင်က ပြောသည်။
မြဝတီနယ်စပ် အမှတ် ၂ တံတား B.C.F ဇုန်တွင် ကျန်းမာရေးစစ်ဆေးပေးခြင်းနှင့် ပြန်လည်ကြိုဆိုရေး လုပ်ငန်းစဉ်များကို စေတနာ့ဝန်ထမ်းအဖြစ် ဆောင်ရွက်ပေးနေသူ မြဝတီခရိုင် သူနာပြုတပ်ဖွဲ့ ဝင်တစ်ဦး က “ယခင်က လို ပုံမှန်ပြန်နေကျ ထိုင်းပြန်မြန်မာလုပ်သား အလုံးအရင်းနဲ့ ဝင်ရောက်လာမှု မရှိ တော့ပါဘူး။ ဒါပေမယ့် ထိုင်းမှာ အကြောင်းအမျိုးမျိုးကြောင့် ပြစ်ဒဏ်ကျခံရပြီး ပြန် လည်လွှဲပြောင်း ပေးမယ့် ပြည်တော်ပြန် မြန်မာလုပ်သားတွေရှိလာရင် လက်ခံပေးဖို့လောက်ပဲ ရှိပါတယ်။ ဒီနေ့ နေ့ လည် ၁၂ နာရီထိတော့ တစ်ယောက်မှ ဝင်လာတာ မရှိသေးဘူး” ဟု ပြောသည်။
ထိုင်းနိုင်ငံတွင် Covid-19 ကူးစက်ခံရသူ ယမန်နေ့ ဧပြီလ ၂ ရက်နေ့ ထုတ်ပြန်ချက်အရ ၁,၈၇၅ ဦးရှိလာပြီး တစ်ရက်လျှင် လူဦးရေ ၁၀ဝ ခန့် ကိုရိုနာ ဗိုင်းရပ်စ်ကူးစက်ခံနေရသဖြင့် ထိန်းချုပ်နိုင်ငံ ရေးအတွက် တာ့ခ်ခရိုင်အုပ်ချုပ်ရေးမှ နယ်မြေဖြတ်သန်းခရီးသွားလာမှုနှင့်ပတ်သက်၍ ထိန်းချုပ်ကန့် သတ်ချက်များ အပါအဝင် ယနေ့ ဧပြီလ ၃ ရက်နေ့တွင် အကျုံးဝင်မည့် ည ၁ဝ နာရီမှ မနက် ၄ နာရီအတွင်း ညမထွက်ရ အမိန့်အား တစ်နိုင်ငံလုံး အတိုင်းအတာဖြင့် ထုတ်ပြန်ထားသည်။
နယ်စပ်ဝင်ပေါက်များမှ ပြန်လာကြမည့် ပြည်ပရောက် မြန်မာနိုင်ငံသားများအနေဖြင့် လာမည့် ဧပြီလ ၁၅ ရက်နေ့ နောက်ပိုင်းမှသာ ပြန်လာကြရန် မြန်မာနိုင်ငံအစိုးရအဖွဲ့ နိုင်ငံခြားရေးဝန်ကြီးဌာန၏ မတ်လ ၃ဝရက်နေ့ ထုတ်ပြန်ချက်တွင် တိုက်တွန်းထားသည်။
မြဝတီနယ်စပ် ထိုင်း-မြန်မာ အမှတ် ၂ တံတားမှတဆင့် ယခင်လ မတ်လ ၂၁ ရက်နေ့မှစ၍ နေ့စဉ် ထောင်နှင့်ချိီ၍ ပြန်လာကြသော ထိုင်း ပြန်မြန်မာ လုပ်သားများမှာ ယမန်နေ့ ဧပြီလ ၂ ရက်နေ့ထိ ဝင်ရောက် နေဆဲဖြစ်ပြီး (၁၃) ရက်အတွင်း လူဦးရေ (၃၆,၈၅၀)ဦး ဝင်ရောက်လာခဲ့သည်။ ယနေ့ ဧပြီလ ၃ ရက်နေ့တွင်မူ ထိုင်းပြန်မြန်မာလုပ်သား ဝင်ရောက်မှု မရှိသလောက် နည်းပါးသွားကြောင်း သိရသည်။
