ဇွန်လ ၃ ရက်၊ ၂၀၁၉ ခုနှစ်။ စောရှား
ကရင်ပြည်နယ် လူငယ်အဖွဲ့များနှင့် ကရင်ပြည်နယ်ကို လေ့လာရေးခရီး ရောက်ရှိနေသည့် ကချင်ပြည်နယ်ရှိ ကျောင်းသားလူငယ်တို့ ယနေ့ (ဇွန် ၃ ရက်) ဖားအံမြို့နယ်၊ ဒုံရင်းတိုက်နယ်ရှိ ဇွဲကပင် တောင်ခြေတွင် တွေ့ဆုံကာ အသိပညာဖလှယ်မှုများပြုလုပ်ခဲ့ကြသည်။
ယနေ့ပြုလုပ်သည့် လူငယ်များတွေ့ဆုံမှုမှာ တိုင်းရင်းသားလူငယ်များ အချင်းချင်း စည်းလုံးညီညွတ်မှုနှင့် ချစ်ကြည်ရင်းနှီးမှုရှိစေရန် ရည်ရွယ်ပြုလုပ်ခြင်းဖြစ်ကြောင်း ဦးဆောင်စီစဉ်ပေးသူ တစ်ဦးဖြစ်သည့် နော်ဇမ်းဘာ က ကေအိုင်စီသို့ ယခုလိုပြောသည်။
၎င်းက ̏ တွေ့ဆုံခြင်းအားဖြင့် စည်းလုံးညီညွတ်မှုကို တည်ဆောက်နိုင်အောင်၊ တွေ့ဆုံခြင်းအားဖြင့် ချစ်ခြင်း မေတ္တာတွေရှိသွားအောင်၊ တွေ့ဆုံခြင်းအားဖြင့် ငြိမ်းချမ်းခြင်းကို တည်ဆောက်နိုင်အောင် ရည်ရွယ်ထားတာပဲ ဖြစ်ပါတယ်↔ဟုပြောသည်။
တွေ့ဆုံပွဲတွင် ကချင်ပြည်မှ ကျောင်းသားလူငယ်များ၊ ကရင်ပြည်မှ ဒုံရင်းကရင်လူငယ်၊ လှိုင်းဘွဲ လူငယ် ကွန် ယက်၊ ကျေးဇူးတော်နှလုံးသားဂေဟာရှိ ကျောင်းသား၊ ကျောင်းသူများ၊ စုစုပေါင်း ၁၅ဝ ဦးခန့် တက်ရောက် ခဲ့ကြသည်။
ကချင်ပြည်ကျောင်းသားလူငယ်အဖွဲ့မှ ကချင်(ရဝမ်)အမျိုးသမီးဖြစ်သူ ဇီတာက ̏ ဒီက လူငယ်တွေက ဘယ်လို မျိုး ဦးဆောင်နေလဲ၊ ကရင်နှင့် ကချင်လူငယ်တွေရဲ့ ကွာခြားချက်တွေကဘာလဲဆိုတာ သိချင်လို့ လာတာပေါ့ နော်။ ဒီကိုလာတာ အရမ်းဝမ်းသာပါတယ်။ ကရင်လူမျိုးတွေက ဘာသာရေးအရ ခွဲခြားခြင်းမရှိဘဲနဲ့ ဦးဆောင် တဲ့အခါမှာ စည်းလုံးစွာနဲ့ ဦးဆောင်တာကို တွေ့ရတယ်↔ဟုပြောသည်။
ထိုသို့တွေ့ဆုံရာတွင် ပိုင်ယောင်းရွာဘုရားကျောင်း၌ လူငယ်များအပြန်အလှန်မိတ်ဆက်ခြင်း၊ အသိပညာ နှင့် ရိုးရာဓလေ့များဖလှယ်ခြင်း၊ သီချင်းသီဆိုခြင်း၊ ဒုံးအက ကပြခြင်းများအပြင် ကရင်ရွာဖြစ်သည့် မူ့ဆရီးရွာတွင် ရိုးရာဓလေ့များကို လေ့လာခြင်း၊ ကရင်နှင့်ကချင်လူငယ် ချစ်ကြည်ရေးဘောလုံးကန်ခြင်းများ ပြုလုပ်ခဲ့ကြ သည်။
လှိုင်းဘွဲလူငယ်ကွန်ယက်မှ စအောင်မိုးဟိန်းကလည်း ̏ ကချင်လူငယ်တွေနဲ့တွေ့ချင်လို့၊ အမြင်တွေ နှီးနှော ဖလှယ်ချင်လို့ လာခဲ့တယ်။ ဒီနေ့ တွေ့ရတဲ့ ကချင်လူငယ်တွေက ကျနော်တို့ထက် ပညာပိုတတ်တယ်။ အတွေ့ အကြုံ ပိုများတာကို တွေ့ရတယ်↔ဟုပြောဆိုသည်။
ယခုကဲ့သို့ ကရင်နှင့်ကချင်လူငယ်များအချင်းချင်း တွေ့ဆုံမှုမှာ ဒုတိယအကြိမ်မြောက်ဖြစ်ပြီး ယမန်နှစ်၊ ဇူလိုင်လတွင် ပထမဦးဆုံးအကြိမ် တွေ့ဆုံမှုပြုလုပ်ခဲ့ဘူးကြောင်း သိရသည်။