မတ်လ ၂ဝ ရက်၊ ၂၀၁၉ ခုနှစ်။ ကေအိုင်စီ
ကရင်ပြည်နယ် ဖားအံမြို့ရှိ ကြာအင်းတောင်ပေါ်သို့ ခရီးသွားပြည်သူများ အလွယ်တကူသွား ရောက်နိုင်ရန် အတွက် တောင်ကလေးဆရာတော် ဦးစီးညွှန်ကြားမှုဖြင့် ဖောက်လုပ်သည့် ကြာအင်းတောင်တက် ကွန် ကရစ် လမ်းဖွင့်ပွဲကို ယနေ့ (မတ်လ ၂ဝ ရက်) ဖားအံမြို့အမှတ် ၉ ရပ်ကွက်ရှိ ကြာအင်းတောင်ခြေတွင် အခမ်းအနားဖြင့် စတင်ဖွင့်လှစ်လိုက်ပြီဖြစ်သည်။
ယခုဖွင့်လှစ်လိုက်သည့် ကြာအင်းတောင်တက်လမ်းကို တောင်ကလေးဆရာတော်အရှင် ဒေါက်တာပညာသာ မိ ကိုယ်တိုင်ဦးဆောင်ပြီး တပြည့်ဒါယိကာများ၏ လှူဒါန်းငွေများ လုပ်အားများဖြင့် ယခင်ရှိပြီးသားမြေသား လမ်းကို ပြန်လည်ပြုပြုင်ကာ ကွန်ကရစ်လမ်းအဖြစ် ခင်းကျင်းဖောက်လုပ်ခဲ့ခြင်းလည်းဖြစ်သည်။
ဆရာတော်၏ တပြည့်ဒါယိကာတစ်ဦးဖြစ်သူ ဖလုံစဝေါ်ဒီမိုကရက်တစ်ပါတီ အတွင်းရေးမှူး စောကြည်လင်းက “ ဒီလမ်းကို ဆရာတော်ကပဲ ကိုယ်တိုင်ဦးစီးညွှန်ကြားပြီး ဖောက်လုပ်ကြတာပါ။ ကုန်ကျမှုကတော့ ဘိလပ်မြေ၊ သဲ၊ ကျောက်အတွက်ပဲ ကုန်ကျပါတယ်။ ဒါယိကာ၊ ဒါယိကာမတွေကတော့ လုပ်အား နဲ့ကုသိုလ်ယူ ဝိုင်းဝန်းကြ တာပေါ့။ အစိုးရနဲ့လည်းမသက်ဆိုင်သလို ဘာမှလည်းပံ့ပိုးတာမျိုးလည်းမရှိပါဘူး”ဟု ကေအိုင်စီသို့ ပြောသည်။
လမ်းအလျား အရှည် ၁ မိုင်ခန့် ၊ အကျယ် ၁၅ ပေနှင့် ၆ လက်မထုထည်ရှိသည့် ကြာအင်းတောင်တက်လမ်း ကွန်ကရစ်ခင်းခြင်းလုပ်ငန်းကို ၂၀၁၈ ခုနှစ်၊ ဒီဇင်ဘာလ ၄ ရက်နေ့မှစတင်ကာ လုပ်ဆောင်ခဲ့ခြင်းဖြစ်ပြီး ၂၀၁၉ ခုနှစ်၊ မတ်လ ၈ ရက်နေ့တွင် ကွန်ကရစ်ခင်းခြင်းလုပ်ငန်း ပြီးမြောက်သည်ဟု သိရသည်။
ခြေလျင်ဖြင့်တစ်နာရီအကြာ တက်ရောက်ရသည့် ကြာအင်းတောင်လမ်း ဖောက်လုပ်ပြီးစီးပြီဖြစ်သည့် အတွက် ကားဖြင့် အတက်၊ အဆင်း အလွယ်တကူတက်ရောက်နိုင်သည့်အပြင် တောင်ထိပ်မှ နေ၍ ဇွဲကပင်တောင် အလှ၊ သံလွင်မြစ်အလှနှင့် ဖားအံမြို့အလှကို ကြည့်ရှုခံစားနိုင်တော့မည်လည်း ဖြစ်သည်။
