အောက်တိုဘာ (၁၅) ရက်၊ ၂၀၂၆ ခုနှစ်၊ ကေအိုင်စီ။
ကေအဲန်ယူ-ကရင်အမျိုးသားအစည်းအရုံး၊ မြိတ်-ထားဝယ်ခရိုင်၊ ကစယ်ဒို(သရက်ချောင်း) မြို့နယ်၊ လှဘော ကျေးရွာအုပ်စု၊ တာလေးခို(ဘုရင့်တောင်) ကျေးရွာအတွင်းသို့ အောက်တိုဘာလ (၁၄) ရက်နေ့က စစ်အုပ်စုလက်နက်ကြီးပစ်ခတ်သဖြင့် ရွာထဲရှိ ခရစ်ယာန်သာသနာပိုင် ခန်းမဆောင်(၁)လုံး ထိခိုက်ပျက်စီးခဲ့ကြောင်း ကေအန်ယူက ယနေ့၊ အောက်တိုဘာ(၁၅)ရက်တွင် ထုတ်ပြန်သည်။
စစ်အုပ်စု၏ အမြှောက်တပ် အမတ-၃၀၉ တပ်ရင်းမှ ပြည်သူလူထုနေထိုင်ရာ ကျေးရွာထဲသို့ လက်နက်ကြီးများ ပစ်ခတ်ခဲ့ခြင်းဖြစ်သည်။
ဒေသခံများ ရွာထဲမှရှောင်တိမ်းနေချိန်ဖြစ်သောကြောင့် ထိခိုက်မှုမရှိသော်လည်း ရွာရှိအဆိုပါ ဘာသာရေးအဆောက်အအုံမှာ လက်နက်ကြီးထိပြီးပျက်စီးမှုရှိခဲ့သည်ဟု ကေအဲန်ယူ မြိတ်-ထားဝယ်ခရိုင်က ဖော်ပြသည်။
ရေဘေးနှင့်မြေပြိုမှုကိုတွေ့ကြုံခဲ့ရသည့် ထားဝယ်ဒေသအတွင်း ပြန်လည်ထူထောင်ရေးအင်အား မလုံလောက်သည့်အခြေအနေ၌ အကူအညီပေးရန်အကြောင်းပြကာ စစ်အုပ်စုက သရက်ချောင်းမြို့နယ်ထဲ စစ်ကြောင်းထိုးဝင်လာခြင်းဖြစ်သည်ဟုလည်း လူ့အခွင့်အရေးအခြေအနေကို မှတ်တမ်းတင်နေသည့် FE5 တနင်္သာရီ သုတေသနအဖွဲ့က ဆိုသည်။
“ရေကြီးလို့ လမ်း၊ တံတားတွေ ပျက်သွားတာတွေရှိတယ်။ အဲဒါကိုပြုပြင်မယ်ဆိုပြီးတော့ သူတို့တွေ(စစ်အုပ်စု)က သရက်ချောင်းဖက်ကနေဆင်းတာ။ လမ်းတံတားပြင်တဲ့ ယန္တရားတွေနဲ့လာတယ်။ အဲဒီမှာသူတို့စစ်ကြောင်းတွေလည်း ရောပါနေတာပေါ့နော်” ဟု အဖွဲ့တာဝန်ရှိသူက ပြောသည်။
ထားဝယ်ဒေသ သတင်းအရင်းအမြစ်များ ဖော်ပြချက်အရ အောက်တိုဘာ (၁၀) ရက်နေ့နှင့် (၁၂) ရက်နေ့တို့တွင် မြိတ်-ထားဝယ်ကားလမ်းမကြီးပေါ်ရှိ ဘုရင့်တောင်ကျေးရွာတွင် အခြေချနေသည့်စစ်အုပ်စုနှင့် ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲဖြစ်ပွားခဲ့ကြောင်း သိရသည်။
ထို့အတူ အဆိုပါတိုက်ပွဲရက်တွင် အနီးအနားရှိကျေးရွာများကို စစ်အုပ်စုက လက်နက်ကြီးများဖြင့် ပစ်ခတ်ခဲ့သလို သရက်ချောင်းအောက်ဘက် ဝင်းဝရွာဘက်သို့ပါ စစ်ကြောင်းထိုးနေသည်ဟု ဒေသခံများက ဆိုသည်။
