ဇွန် (၅)ရက်၊ ၂၀၂၆ ခုနှစ်။ ကေအိုင်စီ
ကရင်နီပြည်နယ်၊ ဒီးမော့ဆိုမြို့နယ်အနောက်ဖက်ခြမ်းသို့ ယမန်နေ့ ဇွန်လ(၄)ရက်နေ့ ညနေပိုင်းက စစ်အုပ်စုလေကြောင်းဗုံးကြဲတိုက်ခိုက်ခြင်းကြောင့် နှစ်ခြင်း ခရစ်ယာန် သင်းအုပ်ဆရာ(၁)ဦးသေဆုံးခဲ့ကြောင်း ဒေသခံများကပြောသည်။
ယမန်နေ့ ညနေ ၅ နာရီမှ ၆ နာရီကြားတွင် ဒေသခံပြည်သူများနေထိုင်ရာ နေရာကို လေယာဥ်ဗုံးကြဲတိုက်ခိုက်သွားခြင်းဖြစ်ပြီး စစ်ဘေးရှောင်ရင်း ဘုရားအမှုတော်ဆောင်နေသည့် သင်းအုပ်ဆရာ(၁)ဦး ဗုံးစထိမှန်သေဆုံးသွားခြင်းဖြစ်သည်။
ဒီးမော့ဆိုအနောက်ဖက်ခြမ်းတွင် စစ်ရှောင်ကူညီနေသူ အမျိုးသားတစ်ဦးက “ဟုတ်တယ် နှစ်ခြင်းသင်းအုပ်ဆရာတော်ပါ၊ သူလည်းစစ်ရှောင်ပဲ။ လေယာဥ်ကြဲတော့ ခေါင်းကိုထိပြီးဆုံးတယ်” ဟု ကေအိုင်စီကို ပြောသည်။
စစ်ရေးပြစ်မှတ်မဟုတ်သည့်နေရာကို စစ်အုပ်စုက လေယာဥ်ဖြင့် (၄)ကြိမ်တိုင်တိုင် ဗုံးကြဲချသွားခြင်းဖြစ်ပြီး ၎င်းအပြင် သက်ကြီးရွယ်အိုအမျိုးသား(၁)ဦးအပါအဝင် (၂)ဦးထိခိုက်ဒဏ်ရာရရှိခဲ့ကြောင်းလည်း ဒေသခံများကပြောသည်။
“ကလေးတွေအတွက် စာသင်ကောင်းတဲ့ ဆရာတစ်ဦးလည်းဖြစ်ခဲ့သလို လူငယ်တွေအတွက် အမြဲတမ်းအနစ်နာခံပေးတဲ့ ခေါင်းဆောင်တစ်ဦးလည်းဖြစ်တယ်။ အမြဲတမ်း ပျော်ပျော်နေတတ်ပြီး အမြဲတမ်း active ဖြစ်နေတဲ့သူ” ဟူ၍ သင်းအုပ်ဆရာ သေဆုံးခြင်းနှင့်ပတ်သက်ပြီး သူ၏လူမှုကွန်ရက်စာမျက်နှာတွင် မိတ်ဆွေတစ်ဦးက ရေးသားဖော်ပြထားသည်။
ထို့အပြင် လေကြောင်းတိုက်ခိုက်ခံရပြီးနောက် ထွက်ပေါ်လာသည့် ကရင်နီဒေသတွင်းသတင်းအရင်းအမြစ်၏ ဓာတ်ပုံမှတ်တမ်းအရ နေအိမ်အချို့လည်း ပျက်စီးမှုရှိခဲ့သည်။
ဒီးမော့ဆိုမြို့နယ်တွင် စစ်တပ်အာဏာသိမ်းပြီးကတည်းက လေကြောင်းဗုံးကြဲမှုနှင့်လက်နက်ကြီးပစ်ခတ်မှုများကြောင့် စစ်ဘေးရှောင်စခန်းများ၊ စာသင်ကျောင်းများ၊ ဘာသာရေးအဆောက်အအုံနှင့် ဆေးရုံများသို့ ကျရောက်ပေါက်ကွဲမှုဖြစ်ပွားပြီး အရပ်သားထိခိုက်သေဆုံးမှု မကြာခဏဖြစ်ပွားခြင်းရှိခဲ့သည်။
ပြီးခဲ့သည့် ၂၀၂၄ ခုနှစ် ဖေဖော်ဝါရီလ(၅)ရက်နေ့ကလည်း ဒီးမော့ဆိုအနောက်ဖက်ခြမ်းရှိ ဒေါဆီအီစာသင်ကျောင်းကို စစ်တပ်ကလေယာဥ်ဗုံးကြဲတိုက်ခိုက်ခဲ့သဖြင့် ကျောင်းနေအရွယ်ကလေး(၄)ဦး သေဆုံးပြီး (၁၀)ဦးထက်မနည်း ထိခိုက်ဒဏ်ရာရရှိခဲ့သည့် ဖြစ်စဥ် ထင်ထင်ရှားရှားရှိခဲ့ကြောင်း ဒေသတွင်းသတင်းများအရ သိရသည်။
