ဒီဇင်ဘာ ၉ ရက်၊ ၂၀၂၅ ခုနှစ်။ ကေအိုင်စီ
ထိုင်း-မြန်မာနယ်စပ်၊ မြဝတီမြို့တောင်ပိုင်း၊ မင်းလက်ပံကျေးရွာ၊ Shunda Park ငွေလိမ်ခြံဝင်းအတွင်းရှိ အဆောက်အဦးအချို့ ယမန်နေ့(ဒီဇင်ဘာ ၈)ရက်နေ့တွင် မီးလောင်မှုဖြစ်ပွားနေကြောင်း မျက်မြင်တွေ့ရှိခဲ့သူများ၏ ဖော်ပြပြောဆိုမှုအရ သိရသည်။
အဆိုပါခြံဝန်းကို ဒီဇင်ဘာ (၆) ရက်နေ့ကစ၍ ကရင်အမျိုးသားလွတ်မြောက်ရေးတပ်မတော်-KNLA က ထိန်းသိမ်းကိုင်တွယ်ထားပြီး နေရပ်မပြန်လိုသဖြင့်ကျန်ရစ်နေသူ ကျားဖြန့်လုပ်သားများအပါအဝင် ကေအဲန်ယူ-ကရင်အမျိုးသားအစည်းအရုံးနှင့် KNLA အဖွဲ့ဝင်များလည်း ဝန်းအတွင်းကျန်နေသည်။
“အတွင်းထဲကနေလောင်တာ၊ အတွင်းထဲ ဂိုဒေါင်ထဲမှာ ပစ္စည်းတွေလည်းရှိတော့ လှိုဏ်ပြီးလောင်တာ” ဟု လူမှုကွန်ရက်မီဒီယာရှိ အဆောက်အဦးမီးလောင်နေသည့် ရုပ်သံမှတ်တမ်းတွင် အမျိုးသားတစ်ဦးက ပြောဆိုထားသည်။
ထိုင်းနယ်စပ်သတင်းအရင်းအမြစ်များ၏ပြောပြချက်အရ သောင်ရင်းမြစ်တစ်ဖက်ကမ်း ထိုင်းနိုင်ငံဘက်ခြမ်းမှလည်း Shunda Park ခြံဝင်းအတွင်း မီးလောင်ရာမှထွက်ပေါ်လာသည့် မီးခိုးလုံးများကို မြင်တွေ့နေရကြောင်း သိရသည်။
မီးလောင်မှုဖြစ်ပွားရသည့် အကြောင်းအရင်းကိုမူ ကေအိုင်စီအနေဖြင့် စုံစမ်းမေးမြန်းနေဆဲဖြစ်သည်။
မင်းလက်ပံကျားဖြန့်လုပ်ငန်းနေရာများကို KNU/KNLA တာဝန်ရှိသူတို့ ဖော်ထုတ်ထိန်းသိမ်းထားသည့် နိုဝင်ဘာလကုန်ပိုင်းမှစ၍ စစ်အုပ်စုဘက်က လေကြောင်းတိုက်ခိုက်မှု (၃)ကြိမ်ထက်မနည်း ပြုလုပ်ခဲ့သလို လက်နက်ကြီးပစ်ခတ်မှုကြောင့်လည်း ထိခိုက်ဒဏ်ရာရရှိမှုများ ဖြစ်ပွားခဲ့ကြောင်း ကေအဲန်ယူမှ ဒီဇင်ဘာ(၆)ရက်နေ့က ထုတ်ပြန်ခဲ့သည်။
ကေအဲန်ယူအစီအစဥ်ဖြင့် နေရပ်ပြန်ရန်ငြင်းဆန်နေသူ ကျားဖြန့်လုပ်သားများကို ထိန်းသိမ်းစောင့်ရှောက်ထားသည့်ကာလတစ်လျှောက်တွင်လည်း ၎င်းလုပ်သားများက ဝန်းအတွင်းရှိ အဆောက်အဦး၊ ပစ္စည်းများကို ရည်ရွယ်ချက်ဖြင့် မီးရှို့ဖျက်ဆီးမှုလုပ်ဆောင်ခဲ့သည်ဟု ဆိုသည်။
