ဇွန် ၆၊ ၂၀၂၅ ခုနှစ်။ ကေအိုင်စီ
ကျုံဒိုး-ကော့ကရိတ် အာရှလမ်းပိုင်းနှင့် ကျေးရွာများသို့ စစ်ကောင်စီတပ်က ဇွန် ၅ ရက်နေ့ တစ်ရက်အတွင်း လက်နက်ကြီး အလုံး ၁၀၀ ကျော် ပစ်ခတ်ဖျက်ဆီးနေသည်ဟု ဒေသတွင်းရှိ သတင်းရင်းမြစ်များက ပြောသည်။
ကျုံဒိုးမြို့အခြေစိုက် ခမရ (၅၄၅)၊(၅၄၆) တပ်နှင့် စစ်တပ်လက်နက်ကြီးတပ်ဖွဲ့ နေရာယူထားသည့် ကုန်းများမှ ကော့ကရိတ်-ကျုံဒိုး အာရှလမ်းပိုင်းတစ်လျှာက်နှင့် ဒေသတွင်းကျေးရွာများဘက်သို့ ဇွန် ၅ ရက်နေ့ နံနက် ၈ နာရီ ခန့် မှစ၍ ယခုညနေပိုင်းအထိ တစ်နေကုန်နီးပါးလက်နက်ကြီး ပစ်ခတ်တိုက်ခိုက်နေသည်ဟု မြေပြင် သတင်းရင်း မြစ်က ယခုလို ပြောသည်။
“ခမရ ၅၄၅-၅၄၆ တပ်နဲ့ ကျုံဒိုးမီးပုံကွင်း၊ ဂျိုင်းတံတား လက်နက်ကြီးအဖွဲ့ နေရာတွေကနေ ၅ တိုင်၊ ၇ တိုင်၊ ၉ တိုင် အထိ လမ်းမပေါ်ပစ်တယ်။ နွားခြံကုန်း၊ ၄ တိုင်၊ ကော့ဝါလဲ ဘက်တွေလည်း ပစ်တယ်။ ညတုံးက ဒရုန်းနဲ့ ရွာတွေကို ကြဲချတယ်။ ဒီနေ့ကတော့ တစ်နေကုန်ပစ်တယ်။ ညနေအထိဆို အလုံး ၁၀၀ ကျော်ပြီး” ဟု ၎င်းက ပြောသည်။
စစ်ကောင်စီအနေဖြင့် ကော့ကရိတ်သို့ စစ်ကူစစ်ကြောင်း ထွက်မရသည့်အတွက် ယခုလို လမ်းမနှင့် ရွာများကို ပစ်ခတ် ဖျက်ဆီးနေခြင်းဖြစ်သည်ဟု ခန့်မှန်းပြောဆိုနေသော်လည်း သီးခြား အတည်မပြုနိုင်သေးသလို လက်ရှိ အချိန်ထိ ကျုံဒိုးမှ စစ်ကြောင်းထွက်မရအောင် တော်လှန်ရေးတပ်များက ပိတ်ဆို့ထားသည်ဟု သတင်းရင်းမြစ်က ပြောသည်။
ပြီးခဲ့သည့် သင်္ကြန်ကာလအတွင်းမှစ၍ ကျုံဒိုး-ကော့ကရိတ် အာရှလမ်းတလျှောက် တိုက်ပွဲများ စတင်ဖြစ်ပွားခဲ့ပြီး စစ်ကောင်စီက လက်နက်ကြီး၊ ဒရုန်း ဗုံးချခြင်းနှင့် ဗုံးကြဲတိုက်ခိုက်ခြင်းများ ပြုလုပ်နေသည်မှာ နှစ်လဝန်းကျင်ရှိ ပြီး ဖြစ်သည်။
တော်လှန်းရေးပူးပေါင်းတပ်များကလည်း ပြန်လည်ပစ်ခတ်မှုများ ပြုလုပ်ခဲ့ရာ စစ်ကောင်စီတပ်ဖွဲ့ဝင်များ သေဆုံး မှုများရှိနေပြီး သေဆုံးသွားသူများကို ဖားအံမြို့နယ်အတွင်းရှိ ဂျိုင်းကျေးရွာသုသန်သို့ သယ်ဆောင် သင်္ဂြိုလ် ပေးနေ သည်ဟု သိရသည်။
