မတ်လ ၆ ရက်၊ ၂၀၂၅ခုနှစ်။ ကေအိုင်စီ
ကရင်ပြည်နယ်၊ ဖားအံမြို့အဝင် စစ်ကောင်စီဂိတ်တွင် ထိုင်း-မြန်မာနယ်စပ် မြဝတီမြို့မှတဆင့် ထိုင်းကုန် စည်တင်ဆောင်လာသည့် ကုန်တင်ယာဉ် အစီးရေ ၅၀၀ ခန့်ကို ဖမ်းဆီးစစ်ဆေးလျက်ရှိကြောင်း ကုန်သည်များက ပြောဆိုချက်အရ သိရသည်။
ယခု မတ်လဆန်းရက်က ကုန်ကားတွင် တားမြစ်ကုန်စည်သတ်မှတ်ထားသည့် ဓာတုဆေးရည်များ တင်ဆောင် လာသည်ကို စစ်ဆေးဖမ်းဆီးရမိသည်ဟု ဆိုပြီးနောက် မတ်လ ၅ ရက်နေ့ ညပိုင်းမှစတင်ကာ ထိုင်းနိုင်ငံထုတ် ကုန်စည်များ တင်ဆောင်လာသည့် ကုန်တင်ယာဉ်များကို ဖမ်းဆီးစစ်ဆေးမှု လုပ်ဆောင်လာခြင်းဖြစ်ကြောင်း စစ် ကောင်စီ နှင့် နီးစပ်သည် ကုန်သည်တစ်ဦးက ကေအိုင်စီသို့ ပြောသည်။
၎င်းကုန်သည်က “မြဝတီ အဆင်းကားကို ဖားအံမှာ ဓာတုဆေးရည် တင်လာတာမိတယ်။ မူးယစ်ဆေးချက်တာ ၊ ရွှေတွင်းတွေမှာ ရွှေချက်တာမှာ သုံးတဲ့ဓာတုဆေးရည်လို့တော့ ပြောတယ်။ အဲကားမိရာကနေ၊ တိုင်းမှူး၊ ဒုတိုင်း မှူး၊ နေပြည်တော်ညွှန်ကြားချက်နဲ့ ကုန်စည်ကားတွေ အကုန်ပေါ့။ အခွန်ကျူတီဆောင်ထားတာရော ၊ မဆောင် ထားတာရော၊ အကုန်သိရီကွင်း၊ ရဲဝင်းနဲ့ ကြာအင်းကွေ့ကားဝင်းမှာရော အစီးရေ ၅၀၀ လောက်ဖမ်း ပြီး ရပ် ထားခိုင်းတယ်”ဟု ပြောသည်။
ထို့အပြင် ယခုလိုကုန်ကားကြီးများ ဖမ်းဆီးသည့် သတင်းကြောင့် ဖားအံမြို့ပြင် နေရာများတွင် ရှောင်တိမ်းစောင့် ဆိုင်းနေသည့် ကုန်ကားများကို ပြည်နယ်စစ်ကောင်စီ ရဲတပ်ဖွဲ့၊ ပြည်သူ့စစ်နှင့် စစ်ကောင်စီတပ်မှ လိုက်လံ ဖမ်းဆီးပြီး ဖားအံမြို့တွင်း ကုန်ကားဝင်းကို နေရာရွှေ့ဖမ်းဆီးမှုဆက်ရှိနေသည့်အတွက် ကျုံဒိုး ၊ ကော့ကရိတ် လမ်းပိုင်းတွင် ကုန်ကားများ ရပ်တန့်နေကြောင်း သိရှိရသည်။
“မနက်ကကုန်ကားဖားအံမှာ ဖမ်းနေပြီဆိုတဲ့ သတင်းကြားတော့ မြဝတီအဆင်းကားတွေ ကျုံဒိုးမီးပုံကွင်းနဲ့ ၊ လမ်း မဘေး ရာဘာခြံတွေထဲ ပါကင်ထိုးပြီး နေနေကြတယ်။ ဆက်မဆင်းတော့ဘူး၊ ထို့ကော်ကိုးကားဝင်း ၊ နဘူး၊ ထီလုံ လမ်းမှာလည်း ကုန်ကားတွေ ရပ်နေတယ်။ BGF ဂိတ်တို့၊ KNLA / PC ဂိတ် တို့မှာနေနေကြတယ်”ဟု ကျုံဒိုးတွင် ကုန်ကားများရပ်နားနေသည့် အခြေအနေကို မြင်တွေ့သူက ပြောသည်။
ယခုလက်ရှိ မတ်လ ၆ ရက်ညနေပိုင်းအထိ ကုန်စည်ကားပိုင်ရှင်များ၊ ကုန်ပစ္စည်းပိုင်ရှင်များ၊ ကုန်ကားလမ်း ကြောင်း ရှင်းပေးသည့် ပွဲစားများမှ ပြည်နယ်စစ်ကောင်စီ ရဲတပ်ဖွဲ့၊ အကောက်အခွန်ဌာန တာဝန်ရှိသူများကို ကုန်စည် ကားများလွှတ်ရေးအတွက် လာဘ်ငွေသိန်းရာချီပေးညှိနှိုင်းနေကြောင်း၊ ကုန်ကားအစီးရေရာချီ ဖမ်းဆီး ထားသည့် အခြေအနေမှာ ဆက်လက်မြင့်တက်နေသည့်အတွက် စိစစ်ပြီး ပြန်လွတ်ပေးရန် မသေချာသေးကြောင်း ဖားအံ မြို့ခံများ ပြောဆိုသည်။
