ဇန်နဝါရီ ၂၄၊ ၂၀၂၅ ခုနှစ်။ ကေအိုင်စီ
တနင်္သာရီမြို့နယ်၊ ပဝကုန်းကျေးရွာသို့ စစ်ကောင်စီက နှစ်ဖက်ပစ်ခတ်မှုဖြစ်ပွားခြင်းမရှိဘဲ ဇန်နဝါရီ ၂၃ ရက်တွင် လက်နက်ကြီး ရမ်းသမ်းပစ်ခတ်ခြင်းကြောင့် ဒေသခံ ရွာသား ၇ ဦးထိခိုက်ပြီး ၎င်းတို့ထဲမှ အမျိုးသမီး ၂ ဦးနှင့် အမျိုးသား ၂ ဦးတို့ ပြင်းထန်ဒဏ်ရာများ ရရှိခဲ့သည်ဟု မြိတ်ခရိုင်တပ်ရင်း-၂ မှ ပြောရေးဆိုခွင့်ရှိသူ ရဲဘော် မျိုးကြီးက ပြောသည်။
အဆိုပါ ကျေးရွာသို့ အများပြည်သူ အိပ်စက်အနားယူ ချိန် ည ၁၁ နာရီကျော်ချိန်တွင် အရှေ့မော်တုန်းရွာ အခြေစိုက် စစ်ကောင်စီအမြောက်တပ်(အမတ-၃၀၆)တပ်ရင်းက ၁၂၀ မမ လက်နက်ကြီးဖြင့် ရမ်းသမ်းပစ်ခတ် သည့်အတွက် ယခုလို ဒဏ်ရာ ရရှိသွားခြင်းဖြစ်သည်။
“စုစုပေါင်း(၇)ဦးထိခိုက်ဒဏ်ရာရရှိထားပါတယ်။ အမျိုးသား(၂)ဦးနဲ့ အမျိုးသမီး(၂)ဦး ကတော့ဒဏ်ရာ ပြင်းထန်စွာ ရရှိထားပါတယ်။ ထိခိုက်ဒဏ်ရာရရှိသူတွေကိုတော့ နီးစပ်ရာကျန်းမာရေး စောက်ရှောက်မှုလုပ်တဲ့ နေရာစီကို ပို့ဆောင် ထားပါတယ်။ လက်နက်ကြီးပစ်ခတ်တဲ့အချိန်ကတော့ည ၁၁း၄၅ မိနစ်မှာ ပစ်ခတ်တာဖြစ်ပါတယ်”ဟု ရဲဘော်မျိုးကြီးက ပြောသည်။
ထို့အပြင် လက်နက်ကြီး ပစ်ခတ်မှုကြောင့် ဒေသခံတို့၏ နေအိမ် ၄ လုံး ထိမှန်ပျက်စီးသွားသည်ဟု ၎င်းက ဆက် ပြောသည်။
လက်ရှိ ကျေးရွာသားများသည် လက်နက်ကြီး ထပ်မံပစ်ခတ်မည်ကို စိုးရိမ်သည့်အတွက် နီးစပ်ရာသို့ တိမ်းရှောင် နေရသည်ဟု ဒေသခံများက ပြောသည်။
စစ်ကောင်စီအနေဖြင့် ပြည်သူများကို အဓိက ပစ်မှတ်ထားပြီး လေကြောင်းနှင့် မြေပြင်လက်နက်ကြီးပစ်ခတ်မှုကို ရည်ရွယ်ချက်ရှိရှိ ပြုလုပ်နေပြီး စစ်ရာဇဝတ်မှုကို နေ့စဉ်နှင့်အမျှ ကျူးလွန်နေခြင်းဖြစ်သည်ဟု ကေအဲန်ယူက ပြော ဆိုသည်။
