နိုဝင်ဘာလ ၂၂ရက်၊ ၂၀၂၄ခုနှစ်။ ကေအိုင်စီ
မူတြော် (ဖာပွန်) ခရိုင်၊ ဘူးသိုမြို့နယ်ရှိ မထောအခြေစိုက် စစ်ကောင်စီတပ်စခန်းအား ယနေ့နိုဝင်ဘာ ၂၂ ရက်နေ့ နံနက် ၇ နာရီခွဲကျော်တွင် ကရင်အမျိုးသားလွတ်မြောက်ရေးတပ်မတော်-KNLA တပ်မဟာ ၅ ပူးပေါင်းတပ်ဖွဲ့က အလုံးစုံသိမ်းပိုက်ရရှိပြီး လက်နက်အမြောက်အများ သိမ်းဆည်းရမိကြောင်း ကေအဲန်ယူ မူတြော်ခရိုင်သတင်းစဉ်က သတင်းထုတ်ပြန်ထားသည်။
စခန်းသိမ်းဆည်းရရှိခြင်းနှင့်ပတ်သက်၍ KNLA တပ်မဟာ ၅ ပြောရေးဆိုခွင့်ရှိသူ ဒုတိယဗိုလ်မှူးကြီး စောကလယ်ဒို့က ” ၁၉(နိုဝင်ဘာ)ရက်ကတည်းက စတိုက်တယ်။ ဒီနေ့ကတော့ အလုံးစုံ ရှင်းလင်းမှုလုပ်ဆောင်နိုင်ခဲ့တယ်။ “ဟု ကေအိုင်စီသို့ အတည်ပြု ပြောသည်။
စစ်ကောင်စီအတွက် မဟာဗျူဟာကျသည့် မထောစစ်စခန်းတွင် စစ်ဆင်ရေးကွပ်ကဲမှုဌာနချုပ် စကခ(၈)လက်အောက်ခံ ခြေမြန်တပ်ရင်း -ခမရ-၄၀၇၊ ခမရ-၄၀၈နှင့် ခမရ-၄၀၄ တို့ တပ်ရင်း ၃ ရင်းမှ တပ်အင်အား ၆၀ ကျော် အခြေချတပ်စွဲထားလျက်ရှိသည်ဟု ကေအဲန်ယူ မူတြော်ခရိုင်က ပြောသည်။
စခန်းသိမ်းတိုက်ပွဲအတွင်း စစ်ကောင်စီတပ်၏ သေဆုံး၊ ဒဏ်ရာရရှိမှုနှင့် လက်နက်သိမ်းဆည်းရရှိမှုစာရင်းအချက်အလက်အသေးစိတ်ကို ဆက်လက်ထုတ်ပြန်မည်ဟုလည်း မူတြော်ခရိုင် သတင်းစဉ်က ထုတ်ပြန်ထားသည်။
ပြီးခဲ့သည့် အောက်တိုဘာလ ၂၉ ရက်နေ့တွင်လည်း မူတြော်(ဖာပွန်)ခရိုင်၊ ဘူးသိုမြို့နယ်ရှိ တပ်ဖွဲ့ဝင်အင်အား ၁၂၀ ကျော်တပ်စွဲနေထိုင်သော စစ်ကောင်စီတပ် ခေါပုတ်စစ်စခန်းကို KNLA ပူးပေါင်းတပ်က သိမ်းပိုက်ရရှိပြီး လက်နက်ခဲယမ်းအမြောက်အများသိမ်းဆည်းရမိသေးသည်။
